Ke Maua Se Kilokiloga Tonu Ki Te Avaga Telā E Se Fealofani

“E tuku atu ne au a fakatonuga konei ki tino a‵vaga, kae e se i a aku kae i a te Aliki.”—1 KOLINITO 7:10.

E MAFAI O FAKAMATALA MAI NE KOE?

I te auala fea e ‵sai fakatasi ei ne te Atua a te tauavaga?

E fesoasoani atu pefea a toeaina ki Kelisiano kolā ko fe‵paki mo fakalavelave i olotou avaga?

E ‵tau o pefea te ‵tou kilokiloga ki te avaga?

1. E ‵tau o pefea te kilokiloga a Kelisiano ki te avaga, kae kaia?

KAFAI e avaga se tokolua Kelisiano, e fai ne lāua se tautōga i mua o te Atua—se tiute telā e se ‵tau o manatu māmā a lāua ki ei. (Failauga 5:4-6) Ona ko ia ko te Māfuaga o te fakatokaga e uiga ki te avaga, “ko oti ne fakatasi ne te Atua” a lāua kolā ko avaga. (Maleko 10:9) Tenā eiloa te kilokiloga a te Atua ki ei faitalia te kese‵kese o tulafono e uiga ki ei. E ‵tau o ‵kilo atu a tavini a Ieova ki te avaga e pelā me se fakatokaga tumau, faitalia me ko oti ne fai latou mo fai ne tino tapuaki ki a Ieova i te taimi ne a‵vaga ei latou io me ikai.

2. Ne a fesili ka mafau‵fau tatou ki ei i te mataupu tenei?

² E iku atu a te avaga manuia ki te mauaga o te fiafia lasi. Kae se a te mea e mafai o fai māfai ko sē fealofani a te tauavaga? E mata, e mafai o toe fakamalosi aka te lā fesokotakiga fakatauavaga? Se a te fesoasoani e mafai o maua ne taki tauavaga kolā ko sē maua se filemu i te olaga avaga?

E MATA, SE MEA FAKAFIAFIA IO ME E FAKAFANOANOA?

3, 4. Se a te mea e mafai o tupu māfai e fai ne se tino se fakaikuga sē ‵lei e uiga ki te filifiliga o se avaga?

³ Kāfai e manuia te avaga a se Kelisiano, ka fakafiafia kae avatu i ei a tavaega ki a Ieova. Kāfai e sē manuia, e fakafanoanoa eiloa te mea tenā. A te Kelisiano taka telā e mafaufau o avaga, e mafai eiloa o fai ne ia se kamataga ‵lei mai te tautali atu ki fakatakitakiga a te Atua. I te suā feitu, a te tino telā e fai ne ia se fakaikuga sē ‵lei i te filifiliga o se avaga, e mafai o maua ne ia a te sē fiafia mo te fanoanoa. E pelā mo nisi talavou kolā ko kamata o fai famau kae seki toka mō tiute kolā e aofia i te olaga fakatauavaga. E maua ne se tino sena famau i te itaneti kae fai fakavave ne ia se mea telā ka iku atu ei ki se olaga avaga sē fakafiafia. E fai ne nisi tino se agasala matagā i te taimi koi fai famau ei, kae e mafai o kamata te lā olaga fakatauavaga ki te se āva o te suā tino ki te suā tino.

⁴ E seki a‵vaga a nisi Kelisiano “i te Aliki” kae e logo‵mae sāle ona ko ikuga o te mavae‵vae i mea tau lotu. (1 Kolinito 7:39) Kafai tenā te mea ko oti ne tupu ki a koe, ‵talo atu mō te fakamagaloga a te Atua mo tena fesoasoani. E se tapale ne ia kea‵tea a ikuga o mea ‵se kolā ne fai ne se tino i aso ko ‵teka, kae e fesoasoani a ia ki tino sala‵mo ke mafai o fakafesagai atu ki olotou tofotofoga. (Salamo 130:1-4) Ke saga tonu o fakafiafia a ia i te taimi nei ke oko eiloa ki te sē-gata-mai, kae ‘ko te fiafia o Ieova ka fai mo fai tou olo malosi.’—Neemia 8:10, NW.

TE TAIMI KO SĒ FEALOFANI EI TE AVAGA

5. Ne a vaegā mafaufauga e ‵tau o ‵kalo kea‵tea mai ei e uiga ki se avaga sē fiafia?

⁵ A tino kolā ko fanoa‵noa i olotou fesokotakiga fakatauavaga, e mafai o mafau‵fau penei: ‘E mata, e aoga ke taumafai o toe faka‵lei aka te tulaga tenei? Kāfai e mafai, kāti e mafai o toe kamata au i te faiga o se avaga fou!’ Kāti e mafai o mafau‵fau latou ke ‵tala te avaga—‘Ko toe saoloto ei! Kaia e sē ‵tala ei te avaga? Kāfai foki loa e seai se pogai faka-te-Tusi Tapu ke ‵tala ei te avaga, kaia e se māvae ei māua ke toe maua se olaga fiafia?’ I lō te mafaufau penā io me mafaufau ki mea kolā ne seki mafai o ‵tupu, e ‵tau o fakaaogā faka‵lei ne Kelisiano te tulaga ko ‵nofo latou i ei mai te ‵sala atu ki fakatakitakiga a te Atua kae tau‵tali i ei.

6. Fakamatala mai a pati a Iesu i te Mataio 19:9.

⁶ Kafai e ‵tala te avaga a se Kelisiano, kāti ka saoloto io me e se saoloto a ia o toe avaga e ‵tusa mo pati i te Tusi Tapu. Muna a Iesu: “So se tagata e ‵tala tena avaga kae seki aofia tena avaga i amioga fakatauavaga sē ‵tau, kae toe avaga ki se isi fafine ko mulilua a ia.” (Mataio 19:9) I konei, “a amioga fakatauavaga sē ‵tau” e aofia i ei te mulilua mo nisi agasala matagā i faifaiga fakatauavaga. Se mea tafasili i te tāua ke fuafua faka‵lei kae ‵talo foki māfai ko mafau‵fau ki te ‵talaga o te avaga kae seai se tino i a lāua kai agasala i te mulilua.

7. Ne a mafaufauga o nisi tino māfai ko sē fealofani a te avaga a se Kelisiano?

⁷ E mafai o isi se fakalotolotolua ki te tulaga faka-te-agaga o se tino māfai ko sē fealofani a te avaga. Ne fakasae aka ne te apositolo ko Paulo a te fesili tāua tenei: “Kafai e se iloa ne se tagata o tausi faka‵lei atu ki tena kāiga, e mafai la pefea o tausi ne ia te fakapotopotoga a te Atua?” (1 Timoteo 3:5) E tonu, kafai e fai mai i a lāua ne Kelisiano kae e se fealofani, e mafai o mafau‵fau a nisi tino me i tino konā e sē tau‵tali tonu i mea kolā e talai atu ne lāua.—Loma 2:21-24.

8. Se a te mea ‵se māfai ko fakaiku aka se tauavaga Kelisiano ke ‵tala te lā avaga?

⁸ Kafai ko mafau‵fau se tauavaga papatiso ke māvae io me ke ‵tala te lā avaga kae e se ne pogai faka-te-Tusi Tapu, e mautinoa eiloa me e isi se mea ‵se i te lā olaga i te feitu faka-te-agaga. E mautinoa eiloa me e isi ne fakatakitakiga faka-te-Tusi Tapu ne seki fakaaogā ne se tino e tokotasi io me ko lāua tokolua. Kafai ne ‘tali‵tonu lāua ki a Ieova mo lā loto kātoa,’ e seai se pogai ke tali‵tonu me e se mafai o fakafesagai atu lāua ki te mea tenā.—Faitau te Faataoto 3:5, 6.

9. Ne taui atu pefea ki nisi Kelisiano mō te lotou kufaki e uiga ki mea tau te avaga?

⁹ E uke a avaga kolā ko kamata o sē fealofani, kae ne iku atu eiloa ki te manuia mai tua o se vaitaimi. A Kelisiano kolā e se ‵fiu vave māfai ko faigata te olaga avaga e maua sāle ne latou a ikuga ‵lei fakamuli. Mafaufau ki te mea telā e mafai o tupu i se kāiga telā e mavae‵vae i mea tau lotu. Ne tusi mai penei te apositolo ko Petelu: “E penā foki koutou e fāfine, ke faka‵logo koutou ki otou avaga, ko te mea kafai e isi ne tino i a latou e se faka‵logo ki te muna, e mafai o tosina mai latou e aunoa mo se pati ona ko amioga a olotou avaga, me ko oti ne lavea ne latou otou amioga ‵ma mo te lasi o te otou āva.” (1 Petelu 3:1, 2) E tonu, ona ko amioga ‵lei a tena avaga, e mafai o puke ‵mau se tino sē talitonu ki te munatonu! E mafai o fakaaloalo atu ki te Atua se vaegā avaga penā, kae e mafai foki o fai mo fai se fakamanuiaga lasi ‵ki ki te tagata, tena avaga, mo so se tamaliki e maua ne lāua.

10, 11. Ne a fakalavelave e seki fakamoemoegina e mafai o ‵sae aka i se avaga, kae se a te mea e mafai o mautinoa i se Kelisiano?

¹⁰ Ona ko te lotou ma‵nako ke fakafiafia atu ki a Ieova, e filifili ne te tokoukega o tino ‵nofo taka ke a‵vaga latou ki taina mo tuagane tali‵tonu. Kae e mafai o tupu se mea telā e seki fakamoemoegina. E mafai o oko atu i nai taimi ki se tino avaga se masaki masei faka-te-mafaufau. Io me mai tua o te fakaipoipōga, e mafai o sē malosi se tino i te galuega talai. Ke fai se fakatusa: Ne kilokilo atu eiloa a Linda,a se Kelisiano loto finafinau kae se mātua fakamaoni, ki tena avaga papatiso kae sē salamō, ko fai ne ia a mea kolā e se fetaui mo te Tusi Tapu kae ne fakatea i ei a ia. Se a te mea e ‵tau o fai ne se Kelisiano māfai ko seai se mea e mafai o fai ki tena avaga?

¹¹ ‘E mata, ka taumafai faeloa au o fakatumau taku avaga faitalia me se a te mea e tupu?’ kāti ka fesili mai koe. E seai se tino e mafai io me e ‵tau o fai ne ia se fakaikuga mō koe. Kae e isi ne pogai ‵lei ke mo a ma ‵fiu vave koe māfai ko kamata o vāivāi a te fesokotakiga fakatauavaga. A te tagata io me se fafine telā e kufaki i tofotofoga faiga‵ta o te olaga fakatauavaga ona ko te mea e se talia ne te loto lagona ke tiakina te avaga, e tāua ‵ki ki te Atua. (Faitau te 1 Petelu 2:19, 20.) E auala i tena Muna mo tena agaga, ka fesoasoani atu eiloa a Ieova ki se Kelisiano telā e taumafai tonu o fakamalosi aka a te avaga telā ko sē fealofani.

E TOKA LATOU O FESOASOANI

12. Se a te kilokiloga a toeaina ki a tatou māfai e ‵sala atu tatou ki te lotou fesoasoani?

¹² Kafai ko fepaki koe mo se fakalavelave i te olaga avaga, sa fakatalave o ‵sala atu ki se fesoasoani faka-te-agaga mai Kelisiano ma‵tua. E tavini atu a toeaina e pelā me ne tausi mamoe o te lafu, kae ka ‵saga tonu atu latou mo te fia‵fia ki pati fakatonutonu kolā e maua i te Tusi Tapu. (Galuega 20:28; Iakopo 5:14, 15) Sa mafau‵fau pelā me ka sē āva atu a toeaina māfai e ‵sala atu koulua ki se fesoasoani faka-te-agaga, kae sau‵tala mo latou e uiga ki fakalavelave faiga‵ta o te olaga fakatauavaga. Ka momea aka eiloa te lotou a‵lofa mo te amanaia māfai e ‵kilo atu me e taumafai eiloa koulua o fakafiafia atu ki te Atua.

13. Ne a pati fakatonutonu kolā e maua i te 1 Kolinito 7:10-16?

¹³ Kafai e fakamolemole atu a Kelisiano kolā e ola i kāiga e mavae‵vae i mea fakalotu mō se fesoasoani, e fakasino atu a toeaina ki pati fakatonutonu a Paulo, kolā ne tusi mai penei: “E tuku atu ne au a fakatonuga konei ki tino a‵vaga, kae e se i a aku kae i a te Aliki, me e se ‵tau o tiakina ne te fafine tena avaga. Kafai e ‵tau o tiaki ne ia, e se ‵tau o toe avaga kae e mafai o toe faka‵lei a lāua mo tena avaga; kae e se ‵tau o tiaki ne te tagata a tena avaga. . . . Te fafine avaga, ko oi e iloa ne ia me ka fakasao ne koe tau avaga? Io me ko te tagata avaga, ko oi e iloa ne ia me ka fakasao ne koe tau avaga?” (1 Kolinito 7:10-16) Ma‵faga o fakamanuiaga māfai ko ‵fuli mai se avaga sē talitonu ki te tapuakiga tonu!

14, 15. Ko taimi fea e mafai ei o mafaufau se Kelisiano avaga ke tiaki ne ia tena avaga, kae kaia e tāua ke mafaufau ‵mafa ki ei mo te faiga o ‵talo?

¹⁴ Kāti ne a fakanofonofoga “e ‵tau [ei] o tiaki” ne se fafine avaga Kelisiano tena avaga? Ko oti ne filifili ne nisi fāfine ke māvae ona ko te sē fia tausi atu o te avaga ki a latou. A ko nisi tino ko oti ne fai penā ona ko amioga fakasauā io me ko te fakamataku o te tulaga faka-te-agaga o se Kelisiano.

¹⁵ Ke māvae io me ikai, a te mea tenā se filifiliga totino a te tino. Kae ko te avaga papatiso e ‵tau o mafaufau ‵mafa kae ‵talo foki e uiga ki ei. Fesili ifo penei, E mata, e ‵tau o ‵losi kātoatoa atu ki te avaga sē talitonu e uiga ki te fakamataku o te lā tulaga faka-te-agaga, io me ko oti ne fakatamala te avaga Kelisiano i te faiga o akoga faka-te-Tusi Tapu, te sē fakatumau te ‵kau atu ki fakatasiga, mo te sē olo sāle i te galuega talai?

16. Se a te mea e taofi aka ei a Kelisiano mai te fai fakavave o fakaikuga e uiga ki te ‵talaga o avaga?

¹⁶ Ona ko te mea e fakatāua ne tatou te ‵tou fesokotakiga mo te Atua, kae e fakafetai foki tatou ki tena meaalofa ko te avaga, e fakaeteete eiloa tatou mai te faiga fakavave o fakaikuga e uiga ki te ‵talaga o avaga. E pelā me ne tavini a Ieova, e manava‵se eiloa tatou e uiga ki te faka‵maluga o tena igoa tapu. Tela la, e se ‵tau lele eiloa o fai se ‵tou aofaga ke tiakina ‵tou avaga kae taumafai o toe avaga ki te suā tino.—Ielemia 17:9; Malaki 2:13-16.

17. Ne a fakanofonofoga e mafai ei o fai atu me ko kalagagina ne te Atua a Kelisiano a‵vaga ke maua ne latou te filemū?

¹⁷ A te Kelisiano telā e avaga ki se tino sē talitonu, e ‵tau o taumafai malosi ke fakatumau te fesokotakiga fakatauavaga. E ui i ei, e se ‵tau o ma‵sei a lagonaga o se Kelisiano, māfai e se talia ne te avaga sē talitonu ke tumau i te ‵nofo tasi mo tena avaga, faitalia a taumafaiga a te Kelisiano ke fakatumau te fesokotakiga tenā. Ne tusi mai penei a Paulo: “Kae kafai e fakaiku aka ne te tino sē talitonu ke fano keatea a ia, tuku loa ke fano; e se ligina se taina io me se tuagane mai lalo i fakanofonofoga penā, kae ko kalagagina koutou ne te Atua ke maua te filemu.”—1 Kolinito 7:15.b

FAKAMOEMOE KI A IEOVA

18. Kafai foki loa e se manuia a taumafaiga ke sē ‵tala te avaga, ne a mea ‵lei e mafai o iku mai i te taumafai ke sē fai penā?

¹⁸ Kafai ko fakafesagai atu koe ki so se fakalavelave fakatauavaga, kilo atu ki a Ieova ke maua se loto malosi, kae fakamoemoe faeloa ki a ia. (Faitau te Salamo 27:14.) Mafaufau ki a Linda telā ne fai‵pati muamua tatou ki ei. Ne iku atu eiloa ki te ‵talaga o tena avaga, e tigā eiloa ne taumafai a ia i tausaga e uke ke mo a ma tupu te mea tenā. E mata, ne mafaufau a ia me ne māumāu fua tena taimi? “Ikai,” ko ana pati. “Ne maua ne nisi tino se molimau ‵lei e auala i aku taumafaiga. E ‵ma eiloa toku loto lagona. A ko te ‵toe mea ‵lei, ko te fesoasoani atu o tausaga konā ke tu ‵mautakitaki te mā tamaliki fafine i te munatonu. Ne tupu aka tou fafine mo fai se Molimau fakamaoni kae loto finafinau a Ieova.”

19. Se a te mea e mafai o tupu māfai e taumafai o fakatumau a te avaga?

¹⁹ E fiafia eiloa te fafine Kelisiano e igoa ki a Marilyn me ne talitonu a ia ki te Atua i ana taumafaiga ke sē ‵tala tena avaga. “Ne tofotofogina au ke māvae mo taku avaga ona ko tena sē tausi mai i mea tau tupe, mo te fakamataku o toku tulaga i te feitu faka-te-agaga,” ko ana pati. “E ui i ei, ne tavini atu eiloa taku avaga e pelā me se toeaina a koi tuai o aofia a ia i faifaiga fakapisinisi sē ‵lei. Ne kamata o sē kau atu tou tagata ki nisi fakatasiga, kae ne fakagata i ei a mā fesokotakiga. Ne mataku malosi au i te otiga ne fakatupu ne tino takafia‵toa se mea fakamataku i te motou fa‵kai, telā ne nofo ‵mu ei au. Kae ne iloa aka ne au i a au foki e ‵se. Ne toe kamata a mā fesokotakiga, toe kamata te mā akoga faka-te-kāiga, kae olo atu faeloa ki fakatasiga. Ne atafai mai a toeaina kae fesoasoani malosi mai. Ne toe maua ne māua se malosi fou i te mā kāiga. te tauliaga o taku avaga i te fakapotopotoga. Se akoakoga faigatā kae se ikuga fakafiafia.”

20, 21. Se a te mea e ‵tau o fakaiku aka ne tatou e uiga ki te avaga?

²⁰ Faitalia me e ‵nofo taka tatou io me e a‵vaga, ke fai faeloa ne tatou a mea mo te loto malosi, kae fakamoe‵moe ki a Ieova. Kafai ko fe‵paki tatou mo mea faiga‵ta i te olaga avaga, e ‵tau o taumafai malosi tatou ke faka‵lei aka, kae ke masaua me i tino kolā ko a‵vaga “ko se tokolua a lāua a ko fai lāua mo foitino e tasi.” (Mataio 19:6) Kae ke masaua ne tatou me kafai e tumau tatou i loto i se kāiga mavae‵vae faitalia a mea faiga‵ta, ka mafai eiloa o fia‵fia tatou ke matea atu me ko kau mai tau avaga ki te tapuakiga tonu.

²¹ Faitalia me ne a ‵tou fakanofonofoga, ke na fakaiku aka ne tatou ke sa‵sale atu mo te fakaeteete ko te mea ke mafai o taku ‵lei tatou ne tino mai tua o te fakapotopotoga. Kafai ko fakamataku a tulaga o ‵tou avaga, ke na ‵talo atu tatou mo te loto kātoa, iloilo aka mo te fakamaoni a ‵tou lagonaga, mafaufau faka‵lei ki fakatakitakiga mai te Tusi Tapu, kae ‵sala atu ki se fesoasoani faka-te-agaga mai toeaina. Kae e sili i mea katoa, ke na fakafiafia atu tatou ki te Atua i mea katoa, kae fakaasi atu te ‵tou loto fakafetai tonu ki tena meaalofa tafasili i te gali ko te avaga.

[Fakamatalaga fakaopoopo]

[Ata i te itulau e 20]

A Kelisiano kolā e sē ‵fiu vave i se avaga sē fealofani e masani o maua a ikuga ‵lei

[Ata i te itulau e 22]

Ke talitonu faeloa ki a Ieova, kae ‵talo ke maua te loto malosi

[Ata i te itulau e 19]

E fakamanuia ne Ieova a avaga Kelisiano kolā e taumafai o fakamalosi aka se avaga e se fealofani

[Ata i te itulau e 21]

E mafai o fai te fakapotopotoga Kelisiano mo fai te pogai o fakamafanafanaga mo te fesoasoani i te feitu faka-te-agaga