Tauloto Mai te Muna a te Atua
E Pokotia Pefea Tatou i Agelu mo Temoni?
E mafaufau a te mataupu tenei ki fesili kolā, kāti ne faka‵sae aka ne koe kae e fakaasi atu foki i ei a te koga e mafai ei o faitau ne koe a tali i loto i tau Tusi Tapu. Ka fia‵fia eiloa a Molimau a Ieova o sau‵tala mo koe ki tali konei.
1. Ko oi a agelu?
A agelu ko tino faka-te-agaga kolā e ola i te lagi. A te vaegā olaga telā e maua ne latou e tai maluga atu i te vaegā olaga telā e maua ne te tagata. A te Atua tonu telā se agaga eiloa a ia, ne faite ne ia a agelu koi tuai o faite ne ia a te lalolagi. (Iopu 38:4, 7; Mataio 18:10) Ne sikomia eiloa a Ieova ne te fia miliona o agelu a‵lofa fakamaoni.—Faitau te Salamo 103:20, 21; Tanielu 7:9, 10.
2. E mata, e fesoasoani atu agelu ki tino?
Ne fesoasoani atu agelu ki se tagata amiotonu e igoa ki a Lota. Ne ola a ia i se fa‵kai telā ne fakaiku aka ne te Atua ke fakamasei ona ko te ma‵sei o amioga a tino i ei. Ne fakailoa atu ne agelu e tokolua ki a Lota mo tena kāiga ke ‵tele kea‵tea. Ne ma‵natu aka a nisi tino me i te faka‵pulaga se mea faifa‵kata kae ‵teke atu ki ei. Kae ko Lota mo ana tama fa‵fine ne ‵sao me ne faka‵logo ki te faka‵pulaga telā ne fakailoa atu ne te Atua e auala i agelu.—Faitau te Kenese 19:1, 13-17, 26.
E ‵tusa mo pati i te Tusi Tapu, e fesoasoani atu agelu ki tino i aso nei mai te takitakiga o te galuega a latou kolā e talai atu mo te fakamaoni a te tala ‵lei e uiga ki te Malo o te Atua. (Mataio 24:14) A te tala ‵lei e aofia i ei se faka‵pulaga. E pelā eiloa mo te faka‵pulaga telā ne avatu ki a Lota, e sē se mea faifa‵kata. Ne aumai a te mea tenā mai i te Atua e auala i agelu.—Faitau te Fakaasiga 1:1; 14:6, 7.
E mafai ne te Atua o fakaaoga agelu ke fakama‵losi ei tatou māfai e fe‵paki tatou mo fakalavelave. Ne fakaaoga ne ia se agelu ke fakamalosi atu ki a Iesu.—Faitau te Luka 22:41-43.
Ko pili o fakaaoga ne te Atua a agelu i se isi auala aka—ke fakaseai a tino amio ma‵sei kolā e māfua mai i ei a logo‵maega. Ka aumai ne te mea tenā se fakatapūga fiafia ki tino.—Faitau te 2 Tesalonia 1:6-8.
3. E pokotia pefea tatou i te kau temoni?
E pelā mo te tokoukega o tino i te lalolagi kolā ko oti ne fai ne latou a amioga ma‵sei mai te sē faka‵logo ki te Atua, ko oti foki ne ‵teke atu agelu e tokouke i te lagi ki te Atua. (2 Petelu 2:4) Ne taku a agelu ‵teke ki temoni. E tulaga muamua i a latou a Satani, te Tiapolo. E takitaki ‵se ne Satani mo ana temoni a tino.—Faitau te Fakaasiga 12:9.
Ko oti ne fakaaoga ne Satani a pisinisi faivalevale, malo o tāgata, mo lotu ‵se ke fakamalosi atu ki tino kae ke ‵fuli kea‵tea latou mai te Atua. Tela la, e māfua mai eiloa i a Satani a te sē fai mea tonu, fakasauāga, mo logo‵maega kolā e tigāina i ei a tino.—Faitau te 1 Ioane 5:19.
4. E takitaki ‵se pefea ne temoni a tino?
Ko oti ne fakaloiloi ne Satani a tino e tokouke mai te akoako atu me i tino ‵mate e fai pelā me ne agaga kolā e mafai o fesokotaki atu ki a latou. E ui i ei, e fai mai te Tusi Tapu me e seai se mea e mafai ne tino ‵mate o fai. (Failauga 9:5) Kae e fakaloiloi faeloa ne temoni a tino mai te fakaakoako atu ki leo o tino pele kolā ko ‵mate. (Isaia 8:19) E takitaki ‵se ne temoni a nisi tino e auala i tino fesokotaki ki agaga, tino fakamatala mea ‵tupu, mo tino faikaiva kae iloilo fetu. E fakailoa mai te Muna a te Atua ke ‵kalo kea‵tea tatou mai vaegā faifaiga katoa penā. Tela la, e ‵tau o ‵pei ne tatou kea‵tea so se mea i ‵tou kopekopega telā e isi sena sokoga ki temoni mo mea faivailakau.—Faitau te Teutelonome 18:10, 11; Galuega 19:19.
Kafai e a‵lofa tatou ki a Ieova, e se ‵tau o ‵nofo ma‵taku tatou ki te kau temoni. I te taimi e suke‵suke ei tatou ki te Muna a te Atua kae fai a mea kolā e fai mai i ei, ko ‵teke atu tatou ki te Tiapolo kae fakapili‵pili atu ki te Atua. E malosi fakafia atu a Ieova i lō te kau temoni. E mafai ne ana agelu fakamaoni o fakama‵losi aka tatou i te taimi e manakogina ei ne tatou.—Faitau te Salamo 34:7; Iakopo 4:7, 8.
Ke maua a fakamatalaga e uke atu, onoono ki te mataupu e 10 o te tusi ko te Ne a Mea e Akoako ‵Tonu Mai i te Tusi Tapu? telā ne ‵lomi ne Molimau a Ieova.