Vavega Kolā Ko Pili o ‵Tupu
KAFAI ne fakatoka se tokitā tipitipi ke fai se tipitipiga tai faigata ki a koe, ka pefea ou lagonaga māfai ne iloa ne koe me e seki fai aka eiloa ne tou tagata se vaegā tipitipiga penei? E seai se fakalotolotolua me ka mafaufau ‵mafa koe ki ei. Kae i te suā feitu, e a māfai ne iloa aka ne koe me i te tokitā tenei ko te takitaki o te kau tipitipi kae ko oti ne iku manuia a te fia selau o tipitipiga ne fai ne ia e pelā mo te mea tenā ko pili o fai ne tou tagata ki a koe? E mata, ka sē momea aka tou loto talitonu me e mafai eiloa o fesoasoani atu tou tagata ki a koe?
E manakogina ke fai se matugā “tipitipiga” lasi ‵ki ki te lalolagi masaki tenei e ‵nofo tatou i ei i aso nei. E auala i tena Muna ko te Tusi Tapu, ko oti ne tauto mai a Ieova te Atua me ka toe fakafoki mai ne ia a te Palataiso ki te lalolagi tenei. (2 Petelu 3:13) Kae ke tupu a te mea tenā, e ‵tau o ave muamua kea‵tea a amioga ma‵sei, fakaseai kātoatoa atu eiloa. (Salamo 37:9-11; Faataoto 2:21, 22) A tulaga fakafanoa‵noa katoa kolā e lavea ne tatou i ‵tou tafa e ‵tau eiloa o fakaseai kātoatoa atu a koi tuai o toe fakatu aka se palataiso. Ka fai tonu eiloa se vavega ko te mea ke tupu a te mea tenā!—Fakaasiga 21:4, 5.
E tali‵tonu a Molimau a Ieova me ko pili o ‵tupu a ‵fuliga ‵lasi konā. Kaia? Me e fakatalitonu mai i vavega kolā ne fai ne Ieova me e nofo eiloa mo ia te malosi ke fakataunu ana folafolaga. Ke faka‵tusa aka a vavega e ono i loto i te Tusi Tapu mo tautoga kolā e fai mai i ei e uiga ki te taimi mai mua.
Ke na tumau koe i te tauloto e uiga ki tautoga i te Tusi Tapu mō te taimi mai mua. I te taimi e tupu aka ei tou fakatuanaki, ka tupu aka foki a tou fakamoemoega—se fakamoemoega ke ola i se taimi telā ka maua totino ei ne koe a mea aoga mai i vavega kolā e fai ne Ieova.
[Ata i te itulau e 7]
VAVEGA:
NE FAGAI NE IESU A TE FIA AFE KI NĀI FALAOA MO IKA.—MATAIO 14:13-21; MALEKO 8:1-9; IOANE 6:1-14.
TAUTOGA:
“E fua mai eiloa ne te laukele ona taukai; ko te Atua eiloa te motou Atua e fakamanuia ki a matou.” —SALAMO 67:6.
TE UIGA O TE MEA TENĀ MŌ TATOU:
KA SĒ TOE AI LELE EILOA SE TINO E FIA KAI.
VAVEGA:
NE TOE FAKA‵LEI NE IESU A MATA O TINO ‵KIVI.—MATAIO 9:27-31; MALEKO 8:22-26.
TAUTOGA:
“A tino kivi ka lavea ne latou a mea.”—ISAIA 35:5.
TE UIGA O TE MEA TENĀ MŌ TATOU:
KA TOE ILE A MATA O TINO ‵KIVI KATOA.
VAVEGA:
NE FAKA‵LEI NE IESU A TINO SĒ KĀTOATOA.—MATAIO 11:5, 6; IOANE 5:3-9.
TAUTOGA:
“A tino vae ma‵sei ka eva ki luga kae ‵saka.”—ISAIA 35:6.
TE UIGA O TE MEA TENĀ MŌ TATOU:
A FEITU SĒ KĀTOATOA KATOA O TE FOITINO KA FAKA‵LEI.
VAVEGA:
NE FAKA‵LEI NE IESU A MASAKI KESE‵KESE.—MALEKO 1:32-34; LUKA 4:40.
TAUTOGA:
“Ka seai eiloa se tino i luga i te ‵tou fenua e tagi i a ia e masaki.”—ISAIA 33:24.
TE UIGA O TE MEA TENĀ MŌ TATOU:
KA AVE KATOA KEA‵TEA A MASAKI KOLĀ E FAKAVĀIVĀI MALIELIE MAI. KA MAUA EILOA NE TATOU SE MALOSI ‵LEI KĀTOATOA.
VAVEGA:
NE PULE ATU A IESU KI TE MATAGI MO TE TAI.—MATAIO 8:23-27; LUKA 8:22-25.
TAUTOGA:
“A tino ka faite olotou fale ko ‵nofo ei i ei . . . Ka ‵toki olotou togāvine kae inu fia‵fia i te uaina mai i olotou togāvine konā . . . A te galuega e fai ne latou ka iku manuia.” —ISAIA 65:21, 23.
“A te fai mea tonu mo te tonu ka fai ne ia koe ke malosi. Ka sao koe mai i pulega fakasaua mo mea fakama‵taku.”—ISAIA 54:14.
TE UIGA O TE MEA TENĀ MŌ TATOU:
KA SĒ TOE AI NE FAKALAVELAVE O TE NATULA.
VAVEGA:
NE FAKA‵TU AKA NE IESU A TINO ‵MATE.
—MATAIO 9:18-26; LUKA 7:11-17.
TAUTOGA:
“Tino katoa kolā e i loto i tanuga . . . ko ulu mai ei ki tua.”—IOANE 5:28, 29.
“Kae ne tuku mai ne te tai a tino ‵mate kolā e ‵nofo i ei, kae ne tuku mai foki ne te mate mo te Tanuga a tino ‵mate kolā e ‵nofo i ei.”—FAKAASIGA 20:13.
TE UIGA O TE MEA TENĀ MŌ TATOU:
KA TOE FAKA‵TU AKA ‵TOU TINO PELE KOLĀ NE ‵MATE.