Tauloto Mai te Muna a te Atua

Ne a Mea ka ‵Tupu i te Aso Fakamasino?

Ka mafaufau a te mataupu tenei ki fesili kolā ne faka‵sae aka ne koe kae e fakaasi atu foki a te koga telā e mafai ei o faitau ne koe a tali i tau Tusi Tapu. Ka fia‵fia eiloa a Molimau a Ieova o sau‵tala mo koe ki tali konei.

1. Se a te Aso Fakamasino?

E pelā mo te mea e fakaata mai i te ata i te feitu fakaatamai, e mafau‵fau a tino e tokouke me e lau i piliona a tino ka aumai ki mua o te nofogaaliki o te Atua i te Aso Fakamasino, ke fakamasino latou e ‵tusa mo olotou amioga mua ne fai​—ka maua ne nisi tino a taui ke ola i te lagi, kae ko nisi tino ke fakapuapuagatia i seoli. E ui i ei, e fakaasi mai i te Tusi Tapu me i te aoga o te Aso Fakamasino ko te faka‵sao mai o tino mai fakamasinoga sē ‵tonu. (Salamo 96:13) Ko oti ne filifili ne te Atua a Iesu ke fai mo fai te Famasino telā ka toe fakafoki mai ne ia te fai mea tonu ki tino.​—Faitau te Isaia 11:​1-5; Galuega 17:31.

2. Ka toe fakafoki mai pefea ne te Aso Fakamasino a te fai mea tonu?

I te taimi ne ‵teke tonu atu ei a te tagata muamua ko Atamu ki te Atua, ne tuku atu ne ia ana fanau katoa ke ‵nofo mai lalo i te agasala, logo‵maega, mo te mate. (Loma 5:12) Ke fakatonu aka a te mea ‵se tenā, ka toe fakafoki mai ne Iesu ki te ola, io me toe faka‵tu mai, a te fia piliona o tino mai te mate. E fakaasi mai i te tusi ko Fakaasiga me ka tupu a te mea tenei i te pulega a Keliso Iesu i te afe tausaga.​—Faitau te Fakaasiga 20:​4, 11, 12.

Ka fakamasinogina a latou kolā ka toe faka‵tu aka, e se fakavae ki luga i mea kolā ne fai ne latou a koi tuai o ‵mate, kae ki luga i mea kolā e fai ne latou i te taimi e fakaasi mai ei a mea i loto i “pelugā tusi” kolā ne taku mai i te Fakaasiga mataupu e 20. (Loma 6:7) E aofia i a latou kolā ka toe ola mai kae maua te avanoaga ke tauloto e uiga ki te Atua ko “tino amio‵tonu mo tino amio sē ‵tonu,” ko muna a te apositolo ko Paulo.​—Faitau te Galuega 24:15.

3. Ne a mea ka fakataunu ne te Aso Fakamasino?

Ka maua ne tino kolā ko ‵mate kae seki iloa ne latou a Ieova kae tavini atu ki a ia a te avanoaga ke ‵fuli kae fai te mea ‵lei. Kafai e fai latou penā, ka fai te lotou toe‵tuga mo fai ‘se toe‵tuga ki te ola.’ A nisi tino kolā ka toe‵tu aka, ka sē fia tauloto ki auala o Ieova. Ka fai te toe‵tuga o latou mo fai ‘se toe‵tuga ki te fakamasinoga.’​—Faitau te Ioane 5:​28, 29; Isaia 26:10; 65:20.

I te fakaotiga o te Aso o te Fakamasinoga telā e afe tausaga te leva, ko oti ne ‵tau o toe faka‵foki atu ne Ieova a tino faka‵logo ki te tulaga ‵lei kātoatoa i te kamataga. (1 Kolinito 15:​24-28) Se matugā fakamoemoega gali ‵ki mō tino faka‵logo! I te ‵toe tofotofoga, ka ‵tala mai ne te Atua a Satani te Tiapolo, telā ne ‵sai i loto i te lua ‵poko i te afe tausaga. Ka toe taumafai a Satani o ‵fuli kea‵tea a tino mai i a Ieova, kae ko tino kolā e tumau i te ‵teke atu ki a Satani ka ola fia‵fia i te lalolagi ki te se-gata-mai.​—Faitau te Isaia 25:8; Fakaasiga 20:​7-9.

4. Se a te suā aso o te fakamasinoga ka aoga ki tino?

E fakaaoga foki i te Tusi Tapu a te tugāpati ko te “aso o te fakamasinoga” ke fakasino atu ki te mea e tupu telā ka aumai ei te gataga ki te olaga tenei. Ka oko fakapoi mai a te aso o te fakamasinoga tenei e pelā mo te Lolo i aso o Noa, telā ne ‵fulu faka‵ma kātoatoa i ei se kautama masei. Se mea fakafiafia, me i te pili mai o te fakaseaiga o “tino sē amioatua” ka ‵teu faka‵ma i ei te auala ki se lalolagi fou o tino telā “e maua i ei te amiotonu.”​—Faitau te 2 Petelu 3:​6, 7, 13.

Mō fakamatalaga e uke atu, ke onoono ki te itulau e 213-215 o te tusi tenei, Ne a Mea e Akoako ‵Tonu Mai i te Tusi Tapu?, ne ‵lomi ne Molimau a Ieova.

[Ata i te itulau e 16]

“The Last Judgement,” by Gustave Dorè, 1832-1883

[Ata i te itulau e 16]

Engravings by Doré