Ke Fakatau Fakamagalo Te Suā Tino Ki Te Suā Tino

“Ke fakatau fa‵ki faeloa koutou i a koutou eiloa kae fakatau fakamagalo atu te suā tino ki te suā tino.”​—KOLOSE 3:13.

KA TALI ATU KOE PEFEA?

aia e ‵tau ei o toka tatou o fakamagalo a nisi tino?

Ne fakaasi mai pefea ne Iesu a te tāua o te loto fakamagalo?

Ne a fakamanuiaga ka maua ne tatou māfai e fakamagalo ne tatou a nisi tino?

1, 2. Kaia e tāua ei ke mafau‵fau faka‵lei, me e ‵toka tatou o fakamagalo a nisi tino?

A TE Muna a Ieova e mafai o fesoasoani mai ke iloa ne tatou a tena kilokiloga e uiga ki te agasala mo ana faifaiga māfai ko fai ne tatou se agasala. E fakaasi mai foki i tena Muna a mea e uke atu e uiga ki te loto fakamagalo. I te mataupu mai mua, ne tauloto tatou ki te auala ne fakamagalo ei ne Ieova a Tavita mo Manase. A te lā sala‵mo mo te loto kātoa ki mea ne fai ne lāua, ne fai ei ke fakaasi atu ne lāua lā agasala, ke se toe fai lā amioga ma‵sei kae ke sala‵mo tonu. Ona ko te mea tenā, ne toe talia ei ne Ieova lāua.

² Ke na sau‵tala nei tatou ki te auala e mafai ei o fakaasi atu ne tatou te loto fakamagalo ki nisi tino. Ka pefea ou lagonaga māfai ne mate se tokotasi o ou kāiga i te mea ne fai ne Manase? E mata, ka fakamagalo ne koe a Manase? E aoga ‵ki eiloa te fesili tenā i aso nei, me ko ‵nofo nei tatou i se lalolagi telā e ‵fonu i amioga ma‵sei, amioga fakasaua mo te kaimanako. Se a la te pogai e ‵tau ei o ati aka ne Kelisiano a te uiga ko te loto fakamagalo? Kafai e isi ne faifaiga ma‵sei io me ne faifaiga sē fakamaoni ne fai atu ki a koe, se a te mea e mafai o fesoasoani atu ke mafai o taofi aka tou kaitaua, ke fai te mea telā e manako a Ieova ke fai ne koe, kae ke toka o fakaasi atu te loto fakamagalo?

POGAI E ‵TAU EI MO TATOU O LOTO FAKAMAGALO

3-5. (a) Se a te tala fakatusa ne fakaaoga ne Iesu ke fesoasoani atu ki tino fakalogo‵logo ke mafaufau ki te tāua o te loto fakamagalo? (e) Se a te manatu tāua i te tala fakatusa a Iesu i te Mataio18:​21-35?

³ E tāua ‵ki ke toka tatou o fakamagalo a tino kolā ne fai ne latou ke kaitaua tatou​—faitalia me se tino i loto i te fakapotopotoga Kelisiano io me ikai​—māfai e ma‵nako tatou ke maua se fesokotakiga filemu mo tino i loto i ‵tou kāiga, taugasoa, nisi tino e pelā foki mo Ieova. E fakaasi mai i te Tusi Tapu me kafai e toka tatou o fakamagalo a nisi tino, faitalia te uke o taimi e fai ei ne latou ke kaitaua tatou a te mea tenā se uiga faka-Kelisiano. Ko te mea ke malamalama i te tāua o te manakoga tenei, ne fakaaoga ne Iesu se tala fakatusa e uiga ki te pologa telā e isi sena kaitalafu.

⁴ Ne nofo kaitalafu a te pologa i tena matai i se aofaki telā e ‵pau mo te peofuga o se tino galue i aso 60,000,000. Kae ne fakamagalo ne tena matai a tena kaitalafu. Ne fano ei te pologa tenā kae maua ne ia te suā pologa telā ne kaitalafu i a ia i se aofaki e ‵pau mo te peofuga o se tino galue i aso e 100. Ne fakamolemole atu te pologa tenā ke kufaki malie aka, kae ko te pologa telā ne fakamagalo tena kaitalafu ne fakatonu atu ke ‵pei a tena taina pologa ki te falepuipui. Ne kaitaua malosi tena matai ona ko te mea tenā. “E a, e se ‵tau o fakamagalo foki ne koe tou taina pologa, e pelā mo koe ne fakamagalo ne au?” ne fesili atu tena matai. “Ona ko te mea tenā, ne kaitaua malosi ei te matai kae fakatonu atu ke ‵pei tou tagata ki te falepuipui, ke oko eiloa ki te taimi e ‵tina mai ei tena kaitalafu kātoa.”​—Mataio 18:​21-34.

⁵ Se a te manatu tāua i te tala fakatusa tenei a Iesu? Ne fai mai a ia: “E penā foki eiloa a mea ka fai ne toku Tamana i te lagi ki a koutou māfai e se fakamagalo ne koutou otou taina mo otou loto kātoa.” (Mataio 18:35) E manino ‵lei te manatu o Iesu. E fakamaoni mai ne agasala kolā ne fai ne tatou ona ko ‵tou tulaga sē lei katoatoa, me e se mafai eiloa o fakafetaui aka ‵tou tulaga mo tulaga o Ieova. E tiga eiloa te feitu tenā e fakamagalo ne ia tatou kae kilo mai ki a tatou e pelā me ne tino seki agasala aka eiloa. Tela la, so se tino telā e manako ke fai taugasoa mo Ieova e ‵tau o toka faeloa o fakamagalo a mea ‵se a nisi tino. Io me e pelā mo pati a Iesu i tena Lāuga i te Mauga, penei: “Kafai e fakamagalo ne koutou olotou agasala ka fakamagalo foki koutou ne te otou Tamana telā i te lagi; kae kafai e se fakamagalo ne koutou olotou agasala ka se fakamagalo foki otou agasala ne te otou Tamana.”​—Mataio 6:​14, 15.

6. Kaia e se faigofie ei ke fakamagalo faeloa ne tatou a nisi tino?

⁶ Kāti e lotomalie koe me e ‵tau eiloa o fakamagalo ne tatou a nisi tino. Kae e mafai o mafaufau koe ‘me e sē se mea faigofie ke fai penā,’ ona ko te mea e mafai o pokotia malosi ‵tou lagonaga māfai ko fai ne se tino ke kaitaua tatou. E mafai o kaitaua se tino, io me mafaufau me ko fakatogafiti a ia ne te suā tino, kae ko manako ke taui atu a mea katoa konā ne fai atu ki a ia. A te tonuga loa, e mafau‵fau a nisi tino me e se mafai eiloa o fakamagalo ne latou a te tino tenā. Kafai e penā foki koe, e mafai pefea o ati aka ne koe te loto fakamagalo telā e manako a Ieova ki ei?

KE ILOILO NE KOE OU LAGONAGA

7, 8. Ne a mea e mafai o fesoasoani atu ki a koe ke maua te loto fakamagalo ona ko faifaiga sē ‵lei a nisi tino?

⁷ E mafai o pokotia malosi ‵tou lagonaga ona ko mea ma‵sei e fai mai ne tino ki a tatou. Ke mafaufau ki te mea ne fai ne se tamaliki tagata i te taimi ne kaitaua ei a ia: “I te taimi e tasi ne kaitaua malosi ei au, ne sasale au ki tua mai te fale kae tauto atu i a au ka se toe foki eiloa ki te fale. Ko oko eiloa te gali o te aso i te taimi tenā e penā foki mo te auala ne sasale atu ei au. I taku sasalega i konā ne gasolo ifo toku kaitaua kae ne foki atu au ki te fale mo te salamō i a au ne kaitaua.” E pelā mo te mea e fakaasi mai i te tala tenei, kafai e fakaavanoa ne koe ne taimi ke faka‵noga aka ei tou kaitaua kae ke kilo atu ki te fakalavelave tenā i se auala ‵lei, ka mafai eiloa o fesoasoani atu ki a koe ke mo a ma se fakamagalo ne koe te tino tenā, se tulaga telā e mafai o salamō fakamuli koe i ei.​—Salamo 4:4; Faataoto  14:29; Iakopo 1:​19, 20.

⁸ Kae pefea la māfai e seki ‵noga eiloa tou kaitaua? Taumafai o fai ke iloa ne koe me kaia e kaitaua ei koe. E mata, e fai koe penā ona ko faifaiga sē ‵lei io me ne faifaiga sē āva ne fai atu ne se tino ki a koe? Io me e mafaufau koe me ne taumafai eiloa se tino o fakalogo‵mae ne ia koe? E mata, e masei ‵ki tena mea ne fai? Kafai e iloilo kae malamalama faka‵lei koe i te pogai ne kaitaua ei koe, ka fesoasoani atu eiloa a te mea tenā ke iloa ne koe a te ‵toe auala ‵lei mo manatu mai te Tusi Tapu ke fakafesagai atu ki te mea tenā. (Faitau te Faataoto 15:28; 17:27.) Ka fesoasoani atu a mea konā ke maua ne koe te loto fakamagalo. E tiga eiloa te faigata o te mea tenā, kae ko talia eiloa ne koe ke iloilo ou “mafaufauga mo manakoga o [tou] loto” ne te Muna a te Atua, kae takitaki ei koe ke fakaakoako atu ki te uiga fakamagalo o Ieova.​—Epelu 4:12.

E MATA, E ‵TAU EILOA KOE O KAITAUA?

9, 10. (a) Ne a au mea ka fai māfai ne fai ne se tino se mea ke kaitaua koe? (e) Ka pefea ou lagonaga māfai e taumafai koe ke mo a e kaitaua vave io me toka o fakamagalo a nisi tino?

⁹ E uke a fakalavelave o te olaga e fai ei ke kaitaua se tino. Kāti e tele atu koe i tau pasikaiti kae toeitiiti ko ‵tui koe ne se isi motoka. Ne a au mea ka fai? Kāti ne faitau koe i tala o nisi tino kolā ne kaitaua malosi kae fusu ne latou te suā tino fakateletele. E pelā me se Kelisiano, kāti ka se manako eiloa koe o fai a te mea tenā.

¹⁰ E ‵lei atu ke mafaufau muamua a koi tuai o fai ne koe se mea. Kāti e mafai foki o ‵losi atu ki a koe ona ko te sē saga faka‵lei atu ki tou auala. Kāti ne isi se fakalavelave ki te motoka a te suā tino. E fakaasi mai i te tala tenei me kafai e mafaufau faka‵lei tatou kae e toka foki o fakamagalo a nisi tino, ka fesoasoani mai eiloa a mea konā ke mo a e kaitaua malosi koe. E fai mai te Failauga 7:​9, penei: “Taofiofi sale tou kaitaua; se uiga valea o ‵teu se mea masei i tou loto.” Ke mo a e mafaufau me e isi se tino e kaitaua ki a koe. I te ukega o taimi, a te mea telā e mafaufau koe me se faifaiga ne fai ke kaitaua koe, kāti ne māfua mai fua ona ko ‵tou tulaga sē ‵lei katoatoa io me ko te sē malamalama faka‵lei o koe i te tala kātoa. Tela la, taumafai ke maua ne koe te loto malamalama māfai e isi ne faifaiga io me ne pati sē ‵lei e fai atu ki a koe, kae ke toka koe o fakamagalo a te tino tenā mo te alofa. Ka fiafia malosi eiloa koe māfai e fai penā.​—Faitau te 1 Petelu 4:8.

‘KE TOE FAKAFOKI MAI TE OTOU FILEMU’

11. E pelā me ne tino talai o te Malo, ne a ‵tou mea ka fai ki te auala e ‵saga mai ei a tino ki te tala ‵lei?

¹¹ E mafai pefea o fakatumau ne koe te loto pulea māfai e se āva atu se tino ki a koe i te galuega talai? I te taimi ne uga atu ei ne Iesu a tino talai e toko 70, ne fai atu a ia ke fakamanuia atu latou ki fale katoa kolā e olo latou ki ei. Ne fai mai a Iesu, “Kafai e nofo i konā se taugasoa o te filemu, ka maua ei ne ia te otou filemu. Kae kafai e seai, ko toe fakafoki mai ei te otou filemu ki a koutou.” (Luka 10:​1, 5, 6) E fia‵fia eiloa tatou māfai e ‵saga tonu mai a tino ki ‵tou galuega talai, me e mafai o maua ne latou a mea aoga mai te fekau telā e folafola atu ne tatou. Kae i nisi taimi e seai se filemu e maua mai i tino. Ne a la ‵tou mea ka fai? Ne fai mai Iesu me e ‵tau o toe fakafoki mai a te filemu telā ne tuku atu ki te tino i te fale. Kafai e fai penā, ka olo ei tatou mo te filemu i ‵tou loto māfai ko tiaki ne tatou te fale, faitalia a faifaiga ne fai mai ne tino ki a tatou. Kafai e kaitaua tatou ona ko faifaiga sē ‵lei a te tino i te fale, ka se mafai o maua ne tatou te ‵tou filemu.

12. E ‵tusa mo pati a Paulo i te Efeso 4:​31, 32, ne a ‵tou mea e ‵tau o fai?

¹² Taumafai ke maua faeloa ne koe te filemu i taimi katoa, kae e se i te taimi fua o te galuega talai. E tonu, a te toka o tatou o fakamagalo a nisi tino e se fakauiga i ei me e ‵tau o talia ne koe olotou amioga sē ‵tonu io me manatu māmā ki fakamaseiga kolā e iku mai i ei. Ke fakamagalo ne tatou se tino e fakauiga loa ki te fakapuli atu o te mea ‵se ne fai kae ke maua faeloa ne koe te filemu. A te mafaufau faeloa ki faifaiga sē ‵lei ne fai atu ki a latou, e mafai o ave keatea ne ia a te fiafia mai nisi tino. Ke mo a eiloa e talia ne koe ke pule atu a mafaufauga konā ki a koe. Ke masaua me e se mafai eiloa koe o fiafia māfai e ita fakamoemoe faeloa koe. Tela la, e ‵tau eiloa o toka koe o fakamagalo a nisi tino!​—Faitau te Efeso 4:​31, 32.

KE SAGA ATU I SE AUALA TELĀ E FIAFIA KI EI A IEOVA

13. (a) I te auala fea e ‵luku ei ne se Kelisiano a “malala ‵ka” ki te ulu o tena fili? (e) Se a te ikuga e mafai o iku mai i te tali atu mo te leo filemu ki faifaiga sē ‵lei e fai mai ki a tatou?

¹³ I nisi taimi, kāti e mafaufau koe me e mafai o fesoasoani atu koe ki se tino telā ne fai ne ia se mea ‵se ki a koe ke talia ne ia a tulaga faka-Kelisiano. Ne tusi mai a te apositolo ko Paulo, penei: “‘Kafai e fiakai tou fili, fagai atu a ia. Kafai e fiainu, fainu atu a ia. Me i te faiga o mea konā ka ‵luku atu ei ne koe a malala ‵ka ki luga i tena ulu.’ Ke se fakatakavale koutou ne te masei, kae ke fakatakavale faeloa ne koutou a te masei ki te ‵lei.” (Loma 12:​20, 21) Kafai e fakaasi atu ne koe te āva māfai e kaitaua mai se tino, e mafai eiloa o ‵fuli ei ana uiga faiga‵ta kae ke fakaasi mai ana uiga ‵lei. A te fakaasi atu o te loto malamalama, te atafai mo te loto alofa ki te tino telā e fai ne ia koe ke kaitaua, e mafai eiloa o fesoasoani atu ki a ia ke fia tauloto ki munatonu mai i te Tusi Tapu. Faitalia me se a te mea e mafai o tupu, a te tali atu i te leo filemu e tuku atu i ei se avanoaga ki te tino ke toe mafaufau faka‵lei ki ou uiga ‵gali.​—1 Petelu 2:12; 3:16.

14. E tiga eiloa te ma‵sei o faifaiga a se tino ne fai ki a koe, kaia e se ‵tau ei mo koe o ita fakamoemoe?

¹⁴ I nisi fakanofonofoga, e se ‵tau o ‵kau fakatasi tatou mo nisi tino. E aofia i ei ko tino kolā ne fai muamua mo fai ne vaega o te fakapotopotoga kae ne fai ne latou se agasala, ne seki sala‵mo kae faka‵tea. Kafai ne fakalogo‵mae koe ne se vaegā tino penā, e tai faigata eiloa ke fakamagalo ne koe a ia, faitalia me ko salamō tonu a ia. E fai eiloa penā ona ko te leva o te taimi e manakogina ke faka‵lei aka ei te logo‵mae o koe. I vaegā tulaga penā, se mea ‵lei ke fakamolemole atu faeloa ki a Ieova ke fesoasoani mai ke ati aka ne koe te loto fakamagalo ki te tino fai mea ‵se telā ko salamō tonu. I tafa i ei, e mafai pefea o iloa ne koe a mea i te loto o te tino? Ko Ieova fua e iloa ne ia. E iloilo ne ia te loto o te tino kae loto kufaki foki a ia i mea ‵se e fai ne tino. (Salamo 7:9; Faataoto 17:3) Tenā eiloa te pogai e fai mai ei te Tusi Tapu, penei: “Sa taui atu te masei ki te masei. Taumafai o fai a mea ‵lei i te kilokiloga a tino katoa. Fai te mea e mafai o fai ne koutou ke tausi te filemu i te va o koutou mo tino katoa. Aku fagasele, sa taui ma sui, kae tuku atu eiloa ki te kaitaua o te Atua, me ne tusi mai penei: ‘I a aku te taui ma sui. Ka toe ‵togi atu ne au, ko muna a Ieova.’” (Loma 12:​17-19) E mata, e mafai o taku fakamasei ne koe a te suā tino? Ikai. (Mataio 7:​1, 2) Kae e mafai eiloa o talitonu koe me ka fai ne Ieova a te fakamasinoga tonu.

15. Se a te mea e ‵tau o iloa ne tatou, telā e mafai ei o pokotia ‵tou faifaiga ki tino kolā ne fai ne latou ke kaitaua tatou?

¹⁵ Kafai e mafaufau koe me ne fai atu ne se tino a faifaiga sē ‵tonu ki a koe kae faigata ke fakamagalo ne koe se tino fai mea ‵se telā ko oti ne salamo, se mea ‵lei ke masaua ne koe me e penā foki a ia. E maua foki ne ia te tulaga sē ‵lei katoatoa. (Loma 3:23) E alofa atafai a Ieova ki tino sē ‵lei katoatoa katoa. Tela la, se mea ‵lei eiloa ke ‵talo mō te tino telā ne fai ne ia koe ke kaitaua. E mautinoa eiloa me ka se mafai o tumau tou kaitaua ki te tino telā ne ‵talo koe mō ia. E manino ‵lei a pati a Iesu ke mo a ma ita fakamoemoe ki tino kolā ne fai ne latou a faifaiga sē ‵lei ki a tatou, i ana pati konei: “Ke tumau koutou i te a‵lofa ki otou fili kae ‵talo mō latou kolā e fakasaua atu ki a koutou.”​—Mataio 5:44.

16, 17. Ne a au mea e ‵tau o fai māfai ko oti ne fakaiku aka ne toeaina Kelisiano me ko salamō tonu se tino, kae kaia?

¹⁶ E ‵tusa mo te loto o Ieova, ko oti ne tuku atu ki toeaina Kelisiano a te tiute ke fakatoka ne latou a mea ‵se kolā e fai i loto i te fakapotopotoga. E se ‵pau a te malamalama o taina konei mo te Atua, kae e taumafai latou ke fakafetaui aka olotou fakatakitakiga mo mea kolā e fakaasi mai i te Muna a te Atua e auala i te takitakiga a te agaga tapu. Tela la, a fakaikuga katoa kolā e fai ne latou ki vaegā mea penei māfai ko oti ne ‵talo atu latou ki a Ieova, ka fakaata mai i ei tena kilokiloga.​—Mataio 18:18.

¹⁷ E ‵tau eiloa o fakamaoni tatou i vaegā tulaga penei. E mata, e mafai o fakamagalo kae fakamautinoa aka ne koe tou alofa mō tino kolā ko oti ne fakamasino me ko sala‵mo tonu? (2 Kolinito 2:​5-8) E se faigofie faeloa a te mea tenei, maise eiloa māfai ne fai atu ki a koe a faifaiga sē ‵lei io me kāiga koe mo te tino telā ne fai ki ei a faifaiga sē ‵lei. Kae kafai e talitonu koe ki a Ieova mo te auala e fakatonutonu aka ei ne ia a mea i te fakapotopotoga, ka gasuesue eiloa koe mo te ‵poto. Ka fakaasi atu eiloa ne koe me e toka koe o fakamagalo a nisi tino.​—Faataoto 3:​5, 6.

18. Ne a mea aoga ka maua māfai e loto fakamagalo koe?

¹⁸ Ko oti ne iloa aka ne tino ‵poto i masaki tau te mafaufau a te aoga o te loto fiafia o fakamagalo. E fai ei ke fakaasi mai ki tua a lagonaga sē ‵lei kolā e mafai o fai ei ke masaki se tino, kae fesoasoani mai ke ati aka a fesokotakiga fia‵fia kae fakamalosi loto mo nisi tino. Kafai e seai se loto fakamagalo e iku atu a te mea tenā ki masaki, mavae‵vaega, te loto mafatia kae fakafaigata foki ei te fesokotaki atu ki nisi tino. Kae ko te ‵toe fakamanuiaga tāua eiloa o te loto fakamagalo ko te mauaga o se fesokotakiga ‵lei mo te ‵tou Tamana faka-te-lagi ko Ieova.​—Faitau te Kolose 3:​12-14.

[Ata i te itulau e 29]

Se a te uiga o te tala fakatusa tenei a Iesu?

[Ata i te itulau e 32]

A te toka o fakamagalo se manakoga faka-Kelisiano