A Mose Se Tagata Loto Maulalo
SE A TE LOTO MAULALO?
A te loto maulalo e aofia i ei a te saoloto mai i te fiasili io me ko te fakamatamata. A te tino loto maulalo e se kilo atu ki nisi tino e pelā me e ma‵lalo ifo i a ia. So se tino loto maulalo e masaua ne ia i a ia e se ‵lei katoatoa kae e iloa ne ia ana tapulā.
NE FAKAASI MAI PEFEA NE MOSE A TE LOTO MAULALO?
Ne seki fakamatamata a Mose i te taimi ne tuku atu ei ki a ia a te tulaga pule. E pelā mo te masani, kafai e maua ne se tagata se tulaga pule, se mea vave eiloa o lavea atu me ko ia se tino loto maulalo io me se tino fakamatamata. Ne fai mai penei te tino tusitala o te sefulu iva senitenali ko Robert G. Ingersoll: “E mafai ne tino e tokouke o fakafesagai ki mea faiga‵ta. Kae kafai e fia iloa ne koe a te loto maulalo o se tagata, tuku atu ki ei se tulaga pule.” I te feitu tenā, ne fai ne Mose se fakaakoakoga sē fuafuagina o te loto maulalo. E pefea la?
Ne maua ne Mose se pulega lasi me ne fakatonu atu a Ieova ki a ia ke ‵taki te kau Isalaelu. E ui i ei, ne seki fai ne te mea tenā ke fakamatamata a Mose. Mafaufau ki te auala ne fakatoka ei ne ia mo te loto maulalo se fesili faigata e uiga ki te saolotoga o tamaliki ke maua olotou tofi. (Numela 27:1-11) A te fesili tenei se fesili faigata, me e se pokotia fua i ei a fāfine konā kae ko kautama foki i aso mai mua.
Ne tali atu pefea a Mose? E mata, ka fai atu a ia e pelā me se takitaki o te kau Isalaelu, me iloa ‵lei ne ia a te fakaikuga telā e ‵tau o fai ne ia? E mata, ka fakalagolago tou tagata ki te mea e mafai ne ia o fai, tena apo, mo te ‵poko o tena iloa i mafaufauga o Ieova?
E se taumate e fai ne se tagata fakamatamata a te mea tenā. Kae e se ko Mose. E fai mai te Tusi Tapu ki a tatou: “Ne fakaasi atu ne Mose ki te Aliki [Ieova] a te fakatagi tenā.” (Numela 27:5) Mafau‵fau faka‵lei! Mai tua foki eiloa o te ‵takiga o te fenua o Isalaelu i se 40 tausaga, ne seki fakalagolago a Mose ki a ia eiloa, kae ki a Ieova. E lavea ‵lei ne tatou i konei a te lasi o te loto maulalo o Mose.
Ne seki mafaufau a Mose me e ‵tau fua o maua ne ia te tulaga pule. Ne fiafia tou tagata i te taliaga ne Ieova a nisi tino Isalaelu ke fai pelā me ne pelofeta. (Numela 11:24-29) I te taimi ne fakaasi atu ei a manatu o te tamana o tena avaga ke filifili aka ne tāgata ke fesoasoani atu ki a ia i te faiga o nisi galuega, ne loto maulalo a Mose o fakagalue a manatu konā. (Esoto 18:13-24) I te taimi ko pili ei a ia o mate, faitalia me koi malosi tena foitino, ne fakamolemole atu a Mose ki a Ieova ke fili aka se sui mō ia. I te filifiliga ne Ieova a Iosua, ne ‵lago atu a Mose mo te loto kātoa ki te tamataene tenā, kae fakamalosi atu ki tino ke tau‵tali atu i a Iosua ki loto i te Fenua o te Folafolaga. (Numela 27:15-18; Teutelonome 31:3-6; 34:7) Ne talitonu a Mose me se tauliaga ke ‵taki atu te kau Isalaelu i te faiga o te tapuakiga. Kae ne seki fakatāua atu ne ia a tena pulega i lō te ola ‵lei o nisi tino.
NE A MEA AOGA E MAUA NE TATOU MAI I EI?
E se ma‵nako tatou o fakamatamata ona ko tulaga pule ko maua ne tatou io me ko mea e mafai ne tatou o fai. Masaua: Ke fai te galuega a Ieova i te ‵toe auala ‵lei, e tāua atu te loto maulalo i lō ‵tou mea e mafai o fai. (1 Samuelu 15:17) Kafai e loto mau‵lalo tatou, ka taumafai eiloa tatou o fakagalue a te fakatakitakiga poto mai i te Tusi Tapu: “Talitonu ki te Aliki [Ieova] mo tou loto kātoa. Sa fakalagolago lele eiloa ki tou iloa.”—Faataoto 3:5, 6.
E akoako mai foki a te fakaakoakoga a Mose ke sē fakatāua malosi ne tatou a ‵tou tulaga io me ko pulega.
E mata, e maua ne tatou e mea aoga mai te tau‵tali atu i te fakaakoakoga o te loto maulalo o Mose? E seai se fakalotolotolua ki ei! Kafai e ati aka ne tatou a te loto maulalo tonu, ka fakafaigofie ne tatou te olaga o tino i ‵tou tafa, kae fai ei ke alofagina tatou ne latou. Kae sili atu i te tāua, me ko alofagina tatou ne Ieova te Atua, telā e fakaasi mai eiloa ne ia te uiga gali tenei. (Salamo 18:35) “E ‵teke ne te Atua a tino fakamata‵mata, kae e tuku atu ne ia te alofa tauanoa ki tino loto mau‵lalo.” (1 Petelu 5:5) Ko oko eiloa i te tāua ke fakaakoako tatou ki te loto maulalo o Mose!