Ke Loto Fakafetai Ki Te Kaimalie Mo Te Loto Malamalama O Ieova

1, 2. Se a te avanoaga e maua ne taugasoa o Ieova?

“TOEITIITI kae kātoa te 35 tausaga ne avaga ei māua,” ko pati a te tuagane ko Monika. “E iloa ‵lei ne māua te suā tino mo te suā tino. E ui i ei, koi tauloto eiloa māua ki mea e uiga ki te suā tino mo te suā tino, mai tua o tausaga katoa konei!” E seai se fakalotolotolua, me e tenā foki te mea e tupu ki tauavaga mo taugasoa.

² E fia‵fia eiloa māua o fakamasani faka‵lei mo latou kolā e a‵lofa māua ki ei. Mai i va fakataugasoa katoa kolā e mafai o ati aka ne māua, e seai eiloa se mea e tāua atu i te va fakataugasoa o māua mo Ieova. Ka sē mafai lele o iloa katoa ne māua a mea e uiga ki a ia. (Lo. 11:33) Ka maua ne māua a te avanoaga mo te fiafia ke tauloto malosi ki uiga o Ieova ke oko eiloa ki te se-gata-mai.—Fai. 3:11.

3. Ne a mea ka mafau‵fau tatou ki ei i te mataupu tenei?

³ Ne fesoasoani mai a te mataupu mai mua ke fakalasi aka a ‵tou loto fakafetai ki te uiga faigofie mo te sē fakailoga tino o Ieova. Nei la, ke mafau‵fau tatou ki nisi uiga tāua e lua o Ieova—tena kaimalie mo tena loto malamalama. I te faiga tenā, ka iloa malosi i ei ne tatou me “e aga‵lei a ia [Ieova] ki tino katoa, e alofa a ia ki mea katoa a ia ne fai.”—Sala. 145:9.

A IEOVA E KAIMALIE

4. Se a te uiga o te kaimalie tonu?

⁴ Se a te uiga ke kaimalie? E maua ne tatou a te tali i pati a Iesu i te Galuega 20:35: “E sili atu te fiafia o te tino telā e tuku atu ana mea katoa i lō te maua ne ia.” Mai te faipatiga faigofie tenā, ne fakamalamalama mai ne Iesu a te uiga o te kaimalie tonu. E tuku atu ne te tino kaimalie a tena taimi, tena malosi, mo ana mea ke maua ne nisi tino a mea aoga—kae e fai eiloa ne ia mo te loto fiafia. A te tonuga loa, a te kaimalie e se fua ki te lasi o te meaalofa, kae ki te lagonaga o te tino telā e tuku atu ne ia. (Faitau te 2 Kolinito 9:7.) E seai se tino e kaimalie atu i lō te ‵tou “Atua fiafia,” ko Ieova.—1 Timo. 1:11.

5. I auala fea e fakaasi mai ei ne Ieova a te kaimalie?

⁵ E fakaasi mai pefea ne Ieova a te kaimalie? E tuku mai ne ia a manakoga o tino katoa, e aofia i ei latou kolā e seki tapuaki atu ki a ia. E tonu, “e aga‵lei a ia [Ieova] ki tino katoa.” “E fakamaina ne ia a te la ki luga i tino ma‵sei mo tino ‵lei kae e faka‵to ne ia te vaiua ki luga i tino amio‵tonu mo tino sē amio‵tonu.” (Mata. 5:45) Tenā te pogai ne fai mai ei a te apositolo ko Paulo i te taimi ne faipati atu ei ki tino sē tali‵tonu, i a Ieova e ‵lei me ne “tuku atu ki a koutou a vaiua mai te lagi mo tau o aso aoga, e faka‵fonu ei otou loto ki meakai mo te fiafia.” (Galu. 14:17) E manino ‵lei, i a Ieova e kaimalie ki tino katoa.—Luka 6:35.

6, 7. (a) Ko oi a tino kolā e fiafia a Ieova o tuku atu a mea kolā e ma‵nako latou ki ei? (e) Fakamatala mai te auala e tuku mai ei ne te Atua a mea e ma‵nako ki ei ana tino tapuaki fakamaoni.

⁶ E fiafia eiloa a Ieova o tuku atu ki ana tino tapuaki fakamaoni a mea kolā e ma‵nako latou ki ei. Muna a te tupu ko Tavita: “Au nei ko toeaina, ko leva eiloa toku olaga, kae seki iloa eiloa ne au se tino amio ‵lei ke tiakina ne te Aliki [Ieova] io me ko ana tamaliki foki ke akai meakai.” (Sala. 37:25) E tokouke a Kelisiano fakamaoni ko oti ne fetaui mo fakamaoniga penā o te atafai o Ieova. Mafaufau ki se fakaakoakoga.

⁷ I te fia tausaga ko ‵teka, ne pokotia a Nancy telā e galue i te taviniga tumau i se fakalavelave. “E manako au ki se $66 mo ‵togi a toku koga nofo telā e oti te malosi i te suā aso,” ko pati a Nancy. “E se iloa ne au me ka maua pefea ne au a tupe. Ne ‵talo atu au e uiga ki te fakalavelave, kae oti aka, fano ei au ki taku galuega e pelā me se situati i te fale‵kai. Ne seki fakamoemoe au ke maua ne tupe fakameaalofa e uke i te afiafi po tenā me i te taimi tenā ko te taimi o te vaiaso telā e se masani o fakalavelave malosi. Kae poi au me e tai isi eiloa ne tino ne o‵mai ki te fale‵kai i te po tenā. I te otiga o taku tūga kae faopoopo aka a tupe fakameaalofa kolā ne maua ne au, e ‵tusa mo te $66.” Ne talitonu a Nancy me ko Ieova telā ne kaimalie o tuku mai a te aofaki tonu telā e manakogina ne ia.—Mata. 6:33.

8. Se a te ‵toe meaalofa kaimalie a Ieova?

⁸ E mafai o maua ne tino katoa a te ‵toe meaalofa kaimalie a Ieova. Se a te mea tenā? Ko te taulaga togiola a tena Tama. Muna a Iesu: “Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino e fakatuanaki ki a ia kae ke maua ne ia te ola se-gata-mai.” (Ioa. 3:16) I konei, e fakasino atu a “te lalolagi” ki tino. Ao, e ‵tala atu a te ‵toe meaalofa kaimalie a Ieova ki tino katoa kolā e filifili ke talia ne latou. A latou kolā e fakatuanaki ki a Iesu ka maua ne latou a te ola se-gata-mai! (Ioa. 10:10) Se a foki te suā fakamaoniga e sili atu i te kaimalie o Ieova?

FAKAAKOAKO KI TE KAIMALIE O IEOVA

9. E mafai pefea o fakaakoako atu tatou ki te kaimalie o Ieova?

⁹ E mafai pefea o fakaakoako tatou ki te kaimalie o Ieova? A Ieova “e tuku mai ne ia ki a tatou a mea katoa ke fia‵fia ei tatou”; tela la, e ‵tau mo tatou o “toka o fetufaaki” ‵tou mea mo nisi tino, e maua i ei ne latou a te fiafia. (1 Timo. 6:17-19) E fia‵fia eiloa tatou o fakaaoga ‵tou mea e maua ke tuku atu a meaalofa ki ‵tou tino pele kae fesoasoani atu ki a latou kolā e ma‵nako ki ei. (Faitau te Teutelonome 15:7.) Se a te mea e mafai o fakamasaua mai ke kaima‵lie tatou? E fai ne nisi Kelisiano a te auala masani tenei: So se taimi e maua ei ne latou se meaalofa, e ‵sala atu latou ki se avanoaga ke tuku atu ki se tino fakaa‵tea se meaalofa. E tokouke a taina mo tuagane i te fakapotopotoga Kelisiano e ati aka ne latou a te uiga kaimalie.

10. Se a te auala tu ‵kese e tasi e kaima‵lie ei tatou?

¹⁰ A te ‵toe auala ‵lei e tasi e kaima‵lie ei tatou ko te tuku atu o tatou eiloa e auala i ‵tou pati mo faiga. E mafai pefea o fai ne tatou a te mea tenā? Mai te fakaaogaga o ‵tou taimi mo malosi ke fesoasoani kae fakamalosi atu ki nisi tino. (Kala. 6:10) Ke tofotofo aka me e pefea tatou i te feitu tenei, e ‵tau mo tatou o fesili ifo ki a tatou eiloa: ‘E mata, e mafau‵fau a nisi tino i a au e fiafia o fesoasoani kae fakalogologo ki a latou? Kafai e fakamolemole mai se tino ke fesoasoani atu au ki tena galuega io me uga au o fai se fekau, e mata, e tali atu au ao? Se a loa te ‵toe taimi ne fakamālō atu ei au ki se tino i te kāiga io me se tino i te fakapotopotoga?’ Kafai tatou e “fakamasani o tuku atu,” ka gasolo eiloa tatou o ‵pili atu ki a Ieova mo ‵tou taugasoa.—Luka 6:38; Faata. 19:17.

11. Ne a nisi auala e mafai ei o kaima‵lie tatou ki a Ieova?

¹¹ E mafai foki o kaima‵lie tatou ki a Ieova. E fakamalosi mai a Tusitusiga Tapu ke “avatu ki te Aliki [Ieova] a fua tafasili i te ‵lei.” (Faata. 3:9) “A fua tafasili i te ‵lei” konā e aofia i ei ‵tou taimi, malosi, mo ‵tou mea e mafai o maua, kolā e mafai o fakaaoga ne tatou i tena taviniga. Ke oko ki tamaliki, e mafai foki o tauloto ke kaima‵lie latou ki a Ieova. “Kafai e fai te motou meaalofa i te Kingdom Hall, e tuku ne māua ki tamaliki ke faulu ki loto i te pokisi o meaalofa,” ko pati a te lā tamana, ko Jason. “E fia‵fia lāua ki ei, me kafai e faulu ne lāua, ko ‘tuku atu ne lāua se mea ki a Ieova.’” A tamaliki kolā ne fia‵fia o tuku atu a mea ki a Ieova i te fo‵likiga, e mafai o tumau i te kaima‵lie ki a ia māfai ko ma‵tua.—Faata. 22:6.

A IEOVA E LOTO MALAMALAMA

12. Se a te uiga ke loto malamalama?

¹² A te suā uiga tāua e tasi o Ieova ko te loto malamalama. Se a te uiga ke loto malamalama? (Tito 3:1, 2) A te tino loto malamalama e se tautali faeloa i mataimanu o te tulafono, io me faigata, mata kaitaua, io me sauā. I lō te fai penā, e taumafai a ia o uiga filemu i ana faifaiga e fai ki nisi tino, kae mafaufau ki olotou fakanofonofoga. E fiafia a ia o fakalogo ki nisi tino kae kafai e ‵lei, ke talia olotou manakoga kae fakatonutonu aka ana manakoga.

13, 14. (a) E fakaasi mai pefea ne Ieova a te loto malamalama? (e) Se a te mea e mafai o tauloto ne tatou e uiga ki te loto malamalama mai i faifaiga a Ieova ki a Lota?

¹³ E fakaasi mai pefea ne Ieova a te loto malamalama? E mafaufau a ia mo te atafai ki lagonaga o ana tavini, kae masani o talia ne ia olotou manakoga. Pelā me se fakaakoakoga, mafaufau ki faifaiga a Ieova ki te tagata amiotonu ko Lota. I te taimi ne fakaiku aka ei ne Ieova ke fakamasei a fa‵kai o Sotoma mo Komolo, ne tuku atu ne ia ki a Lota se fakatonuga manino ke tele ki mauga. Kae ona ko nisi pogai, ne fakamolemole atu a Lota ke talia mai ke tele a ia ki te suā koga. Mafaufau la—ne fakamolemole tonu atu a Lota ki a Ieova ke ‵fuli a Tena fakatonuga!—Faitau te Kenese 19:17-20.

¹⁴ E faigofie o mafaufau se tino i a Lota e vāivāi io me sē fakalogo. E mautinoa ‵lei me ne mafai ne Ieova o tausi a Lota ke tumau i te ola i so se koga, tela la, e seai se pogai ne ‵tau ei o mataku a Lota. E ui i ei, ne mataku eiloa a Lota, kae ne talia ne Ieova a tena manakoga. Ne talia ne ia ke tele a Lota ki te fa‵kai telā ne manako a ia o fakamasei. (Faitau te Kenese 19:21, 22.) E manino ‵lei i a Ieova e se faigata io me sauā. A iae loto malamalama faeloa.

15, 16. Ne fakaasi mai pefea a te loto malamalama o Ieova i te Tulafono a Mose? (Onoono ki te ata i te kamataga.)

¹⁵ Mafaufau ki te suā fakaakoakoga o te loto malamalama o Ieova e pelā mo te mea e fakaasi mai i te Tulafono a Mose. Kafai se tino Isalaelu e mativa malosi kae se mafai o ofo mai se mamoe io me se kouti mo fai se taulaga, e mafai ne ia o ofo mai se avā lupe io me ne tamā lupe e lua. Kae e a māfai se tino Isalaelu ko tō mativa kae sē mafai ne ia o ‵togi a tamā lupe e lua? I te feitu tenā, ne talia ne Ieova ke ofo mai ne te tino Isalaelu mativa ne falaoa. Kae tenei eiloa te mea tāua: A te falaoa telā e ofo mai mo fai te taulaga ko te “falaoa tafasili i te ‵lei” telā e fakaaoga ki mālō tāua, kae e sē se isi falaoa aka. (Kene. 18:6) Kaia e tāua ei a te mea tenā?—Faitau te Levitiko 5:7, 11.

¹⁶ Ia, mafaufau i a koe se tino Isalaelu kae mativa ‵ki eiloa. I tau okoatuga ki te faleie tapu mo mu falaoa mo fai tau taulaga, e matea ne koe a tino Isalaelu mau‵mea e o‵mai mo manu. E mafai koe o ma i tau falaoa telā e foliga mai me e se tāua malosi. Kae ko masaua aka ne koe me i te kilokiloga a Ieova, a tau taulaga e tāua ‵ki eiloa. Kaia? A te mea e tasi, me e manakogina ne Ieova a te falaoa tafasili i te ‵lei. E pelā me fai atu a Ieova ki tino Isalaelu ma‵tiva: ‘E lavea ne au me e se mafai ne koutou o ofo mai a mea e uke e pelā mo nisi tino, kae e iloa foki ne au me i mea kolā e tuku mai ne koutou ki a au ko toe mea ‵lei eiloa.’ E tonu, e fakaasi mai ne Ieova a te loto malamalama mai te mafaufau ki mea e mafai ne ana tavini o fai mo olotou fakanofonofoga.—Sala. 103:14.

17. Se vaegā taviniga pefea e talitonu koe me e talia ne Ieova?

¹⁷ E fakamafanafana mai a te iloa ne tatou me ona ko tena loto malamalama, e talia ne Ieova a ‵tou tavini katoatoa atu ki a ia. (Ko. 3:23) Muna a se tuagane matua i Italia e igoa ki a Constance: “A te faipati atu ki nisi tino e uiga ki toku Mafuaga ko te mea telā ne fiafia faeloa au o fai. Tenā te pogai e tumau ei au o talai kae fai akoga faka-te-Tusi Tapu. I nisi taimi e fanoanoa au me e se mafai ne au o fai a mea e uke atu ona ko te malosi o toku foitino. Kae e malamalama au me e iloa ne Ieova oku tapulā kae e alofa mai a ia ki a au kae amanaia ki te mea e mafai ne au o fai.”

FAKAAKOAKO KI TE LOTO MALAMALAMA O IEOVA

18. Se a te auala e tasi e mafai ei o fakaakoako a mātua i te fakaakoakoga a Ieova?

¹⁸ E mafai pefea o fakaakoako atu tatou ki te loto malamalama o Ieova? Toe mafaufau ki faifaiga a Ieova ki a Lota. A Ieova ko te tino pule; e ui i ei, ne fakalogologo a ia mo te atafai i te fakaasiatuga ne Lota ana lagonaga. Kae ne talia ne te Atua a te fakamolemole a Lota. Kafai koe se mātua, e mafai ne koe o fakaakoako ki te fakaakoakoga a Ieova? E mata, e mafai ne koe o fakalogologo ki fakamolemole a au tamaliki kae, kafai e ‵lei, ke talia olotou manakoga? E fai mai i Te Faleleoleo Maluga o Setema 1, 2007, kāti a nisi mātua e fakalogo‵logo ki olotou tamaliki māfai e sau‵tala ki tulafono o te fale. Pelā me se fakaakoakoga, e fakaiku aka ne mātua ke fai se tulafono ki te taimi, kae tonu la me e isi se saolotoga o mātua o filifili se taimi fakapito e ‵tau ei o oko mai a tamaliki ki te fale. Kae ‵tau mo mātua o faka‵logo muamua ki faipatiga a tamaliki e uiga ki te taimi telā ka fakamoe. I nisi fakanofonofoga, kafai e se fe‵paki mo fakatakitakiga mai te Tusi Tapu, kāti ko filifili a mātua ke fai ne fakamafuli‵fuliga ki te taimi. E iloa aka ne mātua me kafai e mafau‵fau latou ki manatu o tamaliki e uiga ki tulafono i te fale, e malamalama ‵lei atu a tamaliki i tulafono kae faka‵logo ki ei.

19. E mafai pefea ne toeaina o fakaakoako ki te loto malamalama o Ieova?

¹⁹ E taumafai a toeaina i te fakapotopotoga o fakaakoako ki te loto malamalama o Ieova mai te mafau‵fau ki fakanofonofoga o olotou taina mo tuagane. Masaua me ne fakatāua ne Ieova a taulaga a tino ma‵tiva o Isalaelu. E penā foki a nisi taina mo tuagane, e mu‵tana ‵ki a mea e mafai o fai ne latou i te galuega talai, kāti ona ko masaki o te foitino io me ko te tulaga matua. Kae e a māfai a tino pele konei e loto vāi‵vai ona ko olotou tapulā? E mafai ne toeaina o toe fakapatonu atu ki a latou i a Ieova e alofa ki a latou i te faiga o te ‵toe mea e mafai ne latou o fai.—Male. 12:41-44.

20. E mata, e fakauiga a te loto malamalama ki te mu‵tana o mea e fai i te taviniga ki te Atua? Fakamatala mai.

²⁰ E tonu, e se fakauiga a te loto malamalama ki te mu‵tana o mea e ‵tau o fai i te taviniga ki te Atua, ko te mea fua ke a‵lofa tatou ki a tatou eiloa. (Mata. 16:22) E se ma‵nako tatou ke mu‵tana ‵tou mea e fai kae oti aka ko fai atu ei i a tatou e loto malamalama. I lō te fai penā, e ‵tau mo tatou o “fakapalele [‵tou] mafi” o ‵lago atu ki te fekau o te Malo. (Luka 13:24) A te tonuga loa, e taumafai tatou o fakapaleni a fakatakitakiga fakavae e lua. I te feitu e tasi, e fakapalele ne tatou a ‵tou mafi i ‵tou taviniga. I te suā feitu, e masaua ne tatou i a Ieova e se mafai o fakamolemole mai ke tuku atu ne tatou a mea e uke atu i lō te mea e mafai ne tatou. Kafai e tuku atu ne tatou a te ‵toe mea e mafai ne tatou, e tali‵tonu tatou me ka fiafia eiloa a ia. E mata, e se fia‵fia tatou o tavini atu ki se Matai loto fakafetai kae loto malamalama? I te mataupu telā e ‵soko mai, ka mafau‵fau tatou ki nisi uiga ‵gali e lua o Ieova.—Sala. 73:28.