Kaia e Manakogina ei ke Iloilo ne Koe a Lotu?

Mafaufau me ko manakogina ke ‵tipi koe me e isi sou masaki fakamataku. E ‵tau mo koe o talitonu katoatoa ki te tokita tipitipi, me ka fakalagolago eiloa tou ola ki a ia. E mata, e sē se mea poto ke toe onoono koe ki te tala o ana mea ne fai?

I se auala tai ‵pau, se mea poto ke iloilo faka‵lei ne tatou a lotu. Kafai koe e kau ki se fakapotopotogā lotu, ko tuku atu eiloa ne koe tou olaga faka-te-agaga ki lima o te lotu tenā. E aofia i te mea tenei ou fakamoemoega ke maua te fakaolataga.

Ne tuku mai ne Iesu se fakatakitakiga fakavae ke fesoasoani mai ke fakaiku aka ne tatou me ko te lotu telā e ‵kau tatou ki ei e tonu io me ikai. Ana muna: “E iloa a lakau takitasi i olotou fua.” (Luka 6:44) Pelā me se fakaakoakoga, kafai koe e kilokilo ki se lotu e tasi io me se fakapotopotogā lotu, ne a fuataga e ‵fua mai ne ia? E mata, e fakatāua malosi ne ana takitaki a mea tau tupe? E mata, e tau‵tali ana tino i fakatakitakiga fakavae mai te Tusi Tapu e uiga ki te ‵kau ki taua mo amioga ‵lei? I te fakaotiga loa, e mata, e isi se lotu e ‵tau o tali‵tonu fakamaoni tatou ki ei? E ‵kami ne matou a koe ke sukesuke ki mea kolā e ‵soko mai.