“Onoono ki te Faiga o Ata!”

E fia taimi ne faipati ei ne koe te mea tenā ki a koe eiloa io me ko nisi tino māfai e ‵suke koe ki se mekesini fou? E isi se pogai ne fai faka‵lei ei a ata ‵gali konā. E akoako mai a ata konā ke mafau‵fau tatou kae ke isi ne ‵tou lagonaga e uiga ki ei. E fesoasoani mai ki a tatou i te taimi e fakatoka ei io me fai ‵tou tusaga i te Sukesukega ki te Faleleoleo Maluga.

Pelā me se fakaakoakoga, ke mafaufau faka‵lei ki te pogai ne filifili ei a te tala fakatusa muamua eiloa i mataupu mō sukesukega takitasi. Se a te mea e fakaata mai i ei? E tau atu pefea ki te ulutala o te mataupu io me ko te tusi siki fakavae o te mataupu? I nisi tala fakatusa katoa, mafaufau me e tau atu pefea ki te mataupu telā e sau‵tala ki ei mo tou olaga totino.

Ka tuku atu ne te tino telā e takitaki ne ia te Sukesukega ki te Faleleoleo Maluga a te avanoaga ki te fakapotopotoga ke fai olotou manatu ki ata takitasi, ke taku mai te auala e fetaui ei mo te mataupu kae aoga pefea ki a latou. I nisi taimi, e isi se fakamatalaga o te ata telā e ‵soko ei te ata ki se palakalafa. I nisi mea, kāti e fakaiku aka ne te takitaki o te sukesukega a te palakalafa telā e ‵lei ke sau‵tala ki ata takitasi. I te auala tenei, ka maua ne tino katoa a mea aoga mai mea kolā ko oti ne fakatoka ke fesoasoani ki te tino faitau ke fakaataata i te mafaufau a akoakoga kolā e maua i te Muna a te Atua.

E fai mai penei se taina e tokotasi, “Mai tua o te faitauga ki se mataupu telā ne fakaofoofogia te tusiga, e fakaopoopo ne ata a te gali mo te fia faitau ki te mataupu.”