Akoako Au Tamaliki

E Mafai o Logo‵mae te Atua—Te Auala e Fakafiafia Atu ei Tatou ki a ia

Kai logo‵mae malosi aka eiloa koe ko ala ei koe o tagi?—a E se taumate ko oti tatou katoa ne ‵tagi. I nisi taimi, kāti e se ko ‵tou foitino e ‵mae. Kāti e faipati ne se tino a mea ma‵sei e se ‵tonu e uiga ki a tatou. A te mea tenā e mafai o faka‵mae mai, ne?— A te Atua foki e mafai o logo‵mae māfai e faipati ne tino a loi e uiga ki a ia. Ke fai‵pati tatou e uiga ki te mea tenei kae onoono aka me aumai pefea ne tatou a te fiafia i lō te ‵mae.

E fai mai te Tusi Tapu i nisi tino kolā ne fai mai me e a‵lofa latou ki te Atua ne “fakafanoanoa . . . ne latou a ia.” Ao, ne “faka‵mae ne latou” te Atua! E seai se tino e mafai o faka‵mae ne ia te foitino o Ieova te Atua. A iae malosi katoatoa. Ke onoono aka tatou me kaia e logo‵mae ei a Ieova māfai e se fai ne tatou a te mea telā e fai mai ne ia.

Ne fai ne tino muamua e tokolua kolā ne faite ne Ieova i te lalolagi ke logo‵mae malosi a ia. Ne tuku atu a te tokolua konei ke ‵nofo i te Palataiso i te lalolagi telā e taku ko “te fatoaga o Etena.” Ko oi la a lāua konei?— Ao, ko Atamu, kae fakamuli ifo, ko Eva. Ke onoono aka tatou ki te mea ne fai ne lāua telā ne ala ei o ‵mae a Ieova.

I te otiga ne tuku atu lāua ne Ieova ki te fatoaga tenā, ne fai atu a ia ki a lāua ke tausi ki ei. Ne fai atu foki a ia ki a lāua me e mafai o fai a lā tamaliki kae ola fakatasi i te fatoaga kae sē ‵mate. Kae koi tuai o isi ne tamaliki a Atamu mo Eva, ne tupu se mea matagā. E iloa ne koe me se a te mea tenā?— Ne fakamalosi ne se agelu a Eva kae oti aka ko Atamu, ke ‵teke atu ki a Ieova. Ke onoono aka tatou me ne tupu pefea a te mea tenei.

Ne fai ne te agelu se gata ke foliga mai pelā me faipati. Ne fiafia a Eva ki mea kolā ne lagona ne ia—ne fai atu ne te gata i a ia ka fai “pelā mo te Atua.” Tenā ne fai eiloa ne ia a te mea telā ne fai atu te gata ki a ia ke fai. E iloa ne koe me se a te mea tenā?—

Ne kai ne Eva te fuaga o te lakau telā ne fai atu a Ieova ki a Atamu ke sē ‵kai ki ei. A koi tuai o faite ne te Atua a Eva, ko oti ne fai atu a ia ki a Atamu: “E mafai ne koe o kai a fuaga o so se lakau i loto i te fatoaga, kae tapu koe e kai ki fuaga o te lakau telā e fai ne ia te tino ke iloa te ‵lei mo te masei. E se ‵tau eiloa mo koe o kai ki fuaga o te lakau tenā, me kafai e kai koe ki ei, a koe e mate eiloa i te taimi tenā.”

Ne iloa ne Eva a te tulafono tenā. E ui i ei, ne kilo atu faeloa tou fafine ki te lakau tenā, kae lavea ne ia me “ko mata ‵lei faka i te kai . . . Telā ne puke aka ne ia te fuagā lakau, kai ei ne ia.” Fakamuli ifo, ne tuku atu ne ia te fuaga ki a Atamu, kae “ne kai foki ki ei.” Se a tau faka‵tau, kaia ne fai ei ne tou tagata a te mea tenā?— Ona ko Atamu ko alofa atu ki a Eva i lō Ieova. Ne filifili a ia ke fakafiafia atu ki tou fafine i lō te fakafiafia atu ki te Atua. Kae ko te fakalogo ki a Ieova e tāua atu i lō te fakalogo ki so se tino!

E masaua ne koe te gata telā ne faipati atu ki a Eva? E pelā mo te mafai ne se tino o fai se mea faite ke foliga mai me faipati, ne fai eiloa ne se tino a te gata tenā ke foliga mai me e faipati. I oi te leo telā ne faipati mai i te gata?— Ko te leo o “te gata muamua telā e fakaigoa ki te Tiapolo io me ko Satani.”

E iloa ne koe te auala e mafai ei o fakafiafia ne koe a Ieova?— E mafai o fai ne koe mai te taumafai faeloa o fakafiafia a ia. Muna a Satani me e mafai ne ia o fai a tino katoa ke fai a te mea telā e manako a ia ki ei. Tenā te pogai ne fakamalosi mai ei a Ieova ki a tatou: “Taku tama, a koe ke atamai kae ka fiafia malosi eiloa au. Ka isi se tali e mafai o avatu ne au ki so se tino telā e fakamasei ne ia au.” E fakamasei io me fakalīlī ne Satani a Ieova. Ana muna me e mafai ne ia o ‵fuli kea‵tea a tino katoa mai te tapuaki atu ki a Ia. Tela la, fai a Ieova ke fiafia mai te fakalogo kae tavini atu ki a ia! E mata, ka taumafai malosi koe o fai a te mea tenā?—

Faitau ki Tau Tusi Tapu

Salamo 78:40, 41

Kenese 1:26-28; 2:15-17; 3:1-6

Fakaasiga 12:9; Faataoto 27:11

[Fakamatalaga fakaopoopo]

[Ata i te itulau e 14]

[Ata i te itulau e 15]