FESILI MAI TINO FAI‵TAU
Kaia ne tagi ei a Iesu a koi tuai o toe fakatu aka a Lasalo, e pelā mo te mea ne fakamatala mai i te Ioane 11:35?
E masani tatou o ‵tagi māfai e mate se tino pele me ko sē sologa tatou ki a ia. E ui eiloa ne alofa a ia ki a Lasalo, ne seki tagi a Iesu ona ko Lasalo ko mate. Ne tagi a ia ona ko te alofa ki kāiga mo taugasoa o Lasalo, e pelā mo te mea ne fakaasi mai i te tala a Ioane.—Ioa. 11:36.
I te taimi muamua ne logo ei a Iesu i a Lasalo ko masaki, ne seki fano fakavave a ia o faka‵lei a Lasalo. E fai mai te tala: “Kae i te logoga a Iesu i a Lasalo ko masaki, ne nofo eiloa a ia i te koga tenā i aso e lua.” (Ioa. 11:6) Kaia ne fakatalave ei a Iesu? E isi se pogai ne fai ei a ia penā. Ana muna: “A te masaki tenei e se iku atu ki te mate, kae e fai penā ke faka‵malu ei te Atua, ko te mea ke faka‵malugina te Tama a te Atua i te mea tenei.” (Ioa. 11:4) A te masaki o Lasalo e se “iku” ki te mate. Ne fakamoemoe a Iesu ke fakaaoga te mate o Lasalo e “faka‵malu ei te Atua.” E pefea la? Ko pili o fai ne Iesu se vavega fakaofoofogia mai te fakatuakaga o tena taugasoa pele mai te tanuga.
I tena sau‵talaga mo ana soko i te taimi tenei, ne faka‵tusa ne Iesu a te mate ki te moe. Tenā te pogai ne fai atu ei a ia ki a latou i a ia “ka malaga atu . . . o ‵fagu aka a [Lasalo].” (Ioa. 11:11) Ki a Iesu, a te fakatuakaga o Lasalo mai te mate e ‵pau mo se mātua e ‵fagu aka tena tamaliki mai te moe. Tela la, e seai se pogai ke logo‵mae ei a ia i te mate o Lasalo.
Kae se a la te mea ne fai ei ke tagi a Iesu? E maua te tali mai te tala kātoa. I te fetauiga a Iesu mo te tuagane o Lasalo ko Malia kae kilo atu ki tou fafine mo nisi tino e ‵tagi, “ne mafatia kae otia malosi tena loto.” I te laveaga ne ia te logo‵mae o latou ne lagona ei ne Iesu a te ‵mae ke oko ki te tulaga telā ne ‘otia malosi ei tena loto.’ Tenā te pogai ne tagi ei a Iesu. Ne fakafanoanoa malosi ki a Iesu a te kilo atu ki ana taugasoa pele ko logo‵mae malosi.—Ioa. 11:33, 35.
E fakaasi mai i te tala tenei me e isi se malosi o Iesu o toe faka‵foki mai ‵tou tino pele ki te ola mo foitino malosi i te lalolagi fou telā ko pili mai. E fakaasi mai foki i ei me e isi ne lagonaga o Iesu ki a latou ne ‵mate olotou tino pele ona ko te mate telā ne māfua mai i a Atamu. A te suā akoakoga e mafai o tauloto ne tatou mai i te tala tenei me e ‵tau o a‵lofa tatou ki a latou kolā e fanoa‵noa ona ko te ‵mate o olotou tino pele.
Ne iloa ne Iesu me ka toe fakatu aka ne ia a Lasalo. Kae ne tagi eiloa a ia ona ko te ‵poko o tena alofa ki ana taugasoa. I se auala tai ‵pau, e mafai ne ‵tou loto a‵lofa o fakaoso tatou ke “‵tagi fakatasi mo latou kolā e ‵tagi.” (Lo. 12:15) A te fakaasiga o te loto fanoanoa penā e se fakauiga i ei me e se lava te fakatuanaki o se tino ki te fakamoemoega ko te ‵toetuga. Se mea ‵lei me ne fai ne Iesu se fakaakoakoga i te fakaasiatuga o lagonaga a‵lofa ki tino fanoa‵noa mai te ma‵ligi o ana loimata faitalia me ko pili o fakatu aka ne ia a Lasalo.