Te Akoakoga ‵Se Telā e Fai ei ke se Iloa ‵Lei a te Atua

MEA E TALI‵TONU KI EI A TINO E TOKOUKE

A te Lotu Kelisiano “i vaega lasi e tolu o te Lotu Katolika Loma, Lotu Orthodox ki Saegala, mo te Lotu Polotesano e ‵kilo atu ki te Atua e tokotasi i Tino e Tokotolu: te Atua te Tamana, te Atua te Tama, mo te Atua te Agaga Tapu. E ‵tusa mo te fakamatalaga a lotu Kelisiano, a te kilokiloga tenei e se ko atua e tokotolu kae ko tino tokotolu konei e tasi eiloa.”​—The New Encyclopædia Britannica.

TE MUNATONU MAI TE TUSI TAPU

A Iesu, te Tama a te Atua, ne seki taumafai eiloa ke ‵pau io me ke tasi lāua mo tena Tamana. I lō te fai penā, ne fai atu a ia: “Au e fano ki te Tamana, me e sili atu te Tamana i a au.” (Ioane 14:28) Ne fai atu foki a ia ki ana soko: “Au ka fanaka ki toku Tamana telā ko te otou Tamana foki, ki toku Atua telā ko te otou Atua foki.”​—Ioane 20:17.

A te agaga tapu e sē se tino. A Kelisiano mua “ne ‵fonu latou katoa i te agaga tapu,” kae ne fai atu a Ieova: “Ka ‵ligi atu ne au a nisi vaega o toku agaga ki luga i vaegā tino valevale.” (Galu. 2:1-4, 17) A te agaga tapu e sē se vaega o te Tolutasi. Ko te malosi galue o te Atua.

TE POGAI E TĀUA EI

A te Tolutasi, ko te fakamatalaga se tino sukesuke ki te Lotu Katolika ko Karl Rahner mo Herbert Vorgrimler, me “e se mafai o iloa te mea tenā seiloga ke isi se fakaasiga e uiga ki ei, kae kafai ko oti te fakaasiga tenā, e se mafai foki o maina katoatoa se tino i ei.” E mata, e mafai eiloa o alofa tonu koe ki se tino telā e se mafai o iloa io me e malamalama koe i ei? Tela la, a te akoakoga o te Tolutasi, e fai pelā me se ‵pui telā e taofi aka ei koe mai i te iloa mo te alofa ki te Atua.

A Marco, telā ne taku atu i te mataupu muamua, ne kilo atu a ia ki te Tolutasi e pelā me se ‵pui. “Au ne mafaufau me ko ‵muni a te Atua mai i a au,” ana muna, “kae ne fai ne te mea tenā a ia ke ‵mao malosi, ke se iloa, kae faigata ke oko atu ki a ia.” Kae ko te “Atua e sē se Atua o te ‵numi.” (1 Kolinito 14:33, American Standard Version) Ne seki ‵muni eiloa a ia mai i a tatou. E manako a ia ke iloa ne tatou a ia. Ne fai mai a Iesu: ‘E tapuaki atu matou me e iloa ne matou.’​—Ioane 4:22.

“I te taimi ne iloa ei ne au me i te Atua e sē se vaega o te Tolutasi,” muna a Marco, “ne fatoa mafai ei ne au o ati aka se va fakataugasoa totino mo ia.” Kafai e ‵kilo atu tatou ki a Ieova e pelā me se Tino tu ‵kese i lō se tino fou telā e se iloa, e sili atu i te faigofie ke alofa koe ki a ia. “A te tino telā e se alofa e seki iloa ne ia te Atua, me i te Atua ko te alofa eiloa a ia.”​—1 Ioane 4:8.