“E Avatu ne Ia te Taui ki Tino Kolā e ‵Sala Malosi Atu ki a Ia”

E mata, e fakatāua ne Ieova a taumafaiga ana tino tapuaki ke fakafiafia atu ki a ia? E mafai o fai mai a nisi tino ikai, mai te kinau mai me e se fia saga mai te Atua ki a tatou. Kae e fakamalosi aka ne te vaegā kinauga tenā a fakamatalaga kolā e fakamasei atu ki te Atua. E faka‵tonu aka i tena Muna, ko te Tusi Tapu a te manatu tenā. E fakatalitonu mai ki a tatou me e fakatāua ne Ieova a taumafaiga a ana tavini fakamaoni. Mafaufau ki pati a te apositolo ko Paulo i te Epelu 11:6.

Se a te mea e manakogina ke fakafiafia atu ki a Ieova? “E aunoa mo te fakatuanaki e se mafai o fakafiafia faka‵lei atu se tino ki te Atua,” ne tusi mai a Paulo. Masaua la me ne seki fai mai a Paulo me e faigata ke fakafiafia atu ki te Atua e aunoa mo te fakatuanaki. I lō te fai penā, e fai mai te apositolo me e se mafai o fai penā. I nisi tugapati, e aoga eiloa te fakatuanaki ki te fakafiafia atu ki te Atua.

Se a te vaegā fakatuanaki telā e fakafiafia atu ki a Ieova? E lua a mea e ‵tau o aofia i te ‵tou fakatuanaki ki te Atua. Muamua la, e “‵tau o tali‵tonu” tatou “me e ola tonu te Atua.” E fai mai a nisi ‵fuliga ke “talitonu i a ia se tino tonu” mo te “talitonu me e ola eiloa a ia.” E mafai pefea o fakafiafia atu tatou ki te Atua māfai e fakalotolotolua tatou me e ola tonu a ia? E tonu, e aofia a mea e uke i te fakatuanaki tonu, e tali‵tonu foki a temoni me i a Ieova se tino tonu. (Iakopo 2:19) A te ‵tou fakatuanaki me e ola tonu te atua e ‵tau o fakamalosi aka ei tatou ke gasue‵sue, ke fakamaoni atu te ‵tou fakatuanaki mai i te ola i se auala telā e fakafiafia atu ki a ia.​—Iakopo 2:20, 26.

A te lua, e “‵tau o tali‵tonu” tatou me i te Atua “e avatu ne ia te taui ki tino.” A te tino telā e fakatuanaki tonu e talitonu katoatoa me i ana taumafaiga ke ola i se auala telā fakafiafia atu ki te Atua ka aoga eiloa. (1 Kolinito 15:58) E mafai pefea o fakafiafia atu tatou ki a Ieova māfai e fakalotolotolua tatou ki tena malosi io me ko tena manakoga ke taui mai ne ia tatou? (Iakopo 1:17; 1 Petelu 5:7) A te tino telā e fakaiku aka ne ia me e se atafai, e se loto fakafetai, kae e se kaimalie a te Atua, e se iloa ne ia te Atua o te Tusi Tapu.

Ko oi e taui ne Ieova? Ko “tino kolā e ‵sala malosi atu ki a ia,” ko muna a Paulo. E fai mai se fakamatalaga mō tino ‵fulitusi o te Tusi Tapu me i te pati Eleni telā ne ‵fuli ki te “‵sala malosi” e se fakauiga ki te “fanatu ki tua o ‵sala” kae i lō te fai penā, e fakauiga ki te olo atu ki te Atua i “te tapuakiga.” E fakaasi mai i te suā fakamatalaga me i te veape Eleni tenei e faka‵mafa mai i ei a taumafaiga e uke kae saga tonu atu foki ki ei. Ao, e taui ne Ieova a latou kolā e fakamalosi ne te lotou fakatuanaki ke tapuaki atu ki a ia mo te loto kātoa mo te loto finafinau.​—Mataio 22:37.

E taui pefea ne Ieova ana tino tapuaki? Ko oti ne folafola mai ne ia se olaga tafasili i te gali i aso mai mua telā e fakaasi mai i ei a te lasi o tena kaimalie mo te alofa​—ko te ola se-gata-mai i te lalolagi Palataiso. (Fakaasiga 21:3, 4) Ke oko foki eiloa ki aso nei, a latou kolā e ‵sala malosi atu ki a Ieova ka maua eiloa ne latou a fakamanuiaga e uke. Fakatasi mo te fesoasoani o tena agaga tapu mo te poto telā e maua i tena Muna, e maua ne latou se olaga gali kae fakalotomalie nei.​—Salamo 144:15; Mataio 5:3.

A te ‵tonuga loa, a Ieova se Atua loto fakafetai telā e fakatāua ne ia a te tavini atu mo te fakamaoni o ana tino tapuaki. E mata, e fakaosofia koe ne te iloaga tenā ke fia fakapilipili atu koe ki a ia? Kafai e penā loa, kaia e se tauloto ei koe ki mea e uke atu e uiga ki te auala e mafai o ati aka kae fakaasi atu ne koe a te vaegā fakatuanaki telā ka fakamanuia malosi ei koe ne Ieova?