Faka‵logo Ki Tausi Mamoe A Ieova

“Ke faka‵logo koutou ki a latou kolā e fai ne latou te takitakiga i a koutou kae ke ‵lago atu ki ei, me e puipui ne latou otou ola.” ​—EPE. 13:17.

KA TALI MAI PEFEA NE KOE?

E tausi pefea ne toeaina o te fakapotopotoga a mamoe a te Atua?

Kaia e ‵tau ei mo mamoe o faka‵logo ki tausi mamoe fesoasoani?

Kaia e se ‵tau ei o fai a te tulaga sē ‵lei katoatoa o tausi mamoe fesoasoani mo fakamasakoga ke se faka‵logo tatou ki olotou pati fakatonutonu kolā e fakavae mai te Tusi Tapu?

1, 2. Kaia e tāua ei me e faka‵tusa ne Ieova a ia eiloa ki se tausi mamoe?

E FAKA‵TUSA ne Ieova a ia eiloa ki se tausi mamoe. (Eseki. 34:11-14) E tāua a te mea tenā me e fesoasoani mai ke malama‵lama tatou me ko Ieova se vaegā tino pefea. E saga tonu a te tausi mamoe alofa o tausi a te lafu mamoe telā e tausi ne ia ke ‵sao kae ola ‵lei. E ‵taki ne ia latou ki koga kolā e maua i ei a mouku lausiusi mo vai (Sala. 23:1, 2); e onoono faka‵lei ki ei i te ao mo te po (Luka 2:8); e puipui latou mai manu fe‵kai (1 Samu. 17:34, 35); e tauave a tamā mamoe (Isa. 40:11); e salasala ki mamoe kolā ko takase‵se kae tausi faka‵lei ki mamoe kolā e pa‵kia.​—Eseki. 34:16.

² Ona ko tino o Ieova i aso taumua ne tausi mamoe mo tino ‵toki fatoaga, ne malama‵lama latou i te tāua o te faka‵tusa o Ieova ki se tausi mamoe alofa. Ne iloa ne latou me e ‵tau o tausi kae saga tonu atu ki mamoe ko te mea ke ‵sao. E penā foki ki tino i te feitu faka-te-agaga. (Male. 6:34) Kafai e se tausi kae takitaki faka‵lei a tino i te feitu faka-te-agaga, ka logo‵mae latou. Ka seai se lotou puipuiga kae takase‵se​—e pelā mo “mamoe ko seai se lotou takitaki” kolā ko mafuta valevale. (1 Tupu 22:17) E ui i ei, e alofa eiloa a Ieova o tuku mai a mea e ma‵nako ki ei ana tino.

3. Ne a mea ka sau‵tala tatou ki ei i te mataupu tenei?

³ A te faka‵tusa o Ieova ki se tausi mamoe e tāua ‵ki ke oko mai eiloa ki aso nei. Koi tausi mai eiloa a Ieova ki ana tino e pelā me ne mamoe. Ke onoono aka tatou me e fakatonu pefea ne ia ana tino kae fakama‵lie aka pefea olotou manakoga i aso nei. Ka mafaufau foki tatou ki te auala e ‵tau ei o ‵saga atu a mamoe ki te tausiga alofa a Ieova ki a latou.

E TUKU MAI NE TE TAUSI MAMOE ‵LEI A TAUSI MAMOE FESOASOANI

4. Se a te tusaga o Iesu i te tausiga o mamoe a Ieova?

⁴ Ko oti ne fakaeke ne Ieova a Iesu e pelā me ko te Ulu o te fakapotopotoga Kelisiano. (Efe. 1:22, 23) E fakaata mai ne Iesu, “te tausi mamoe ‵lei,” a mea kolā e fiafia ki ei tena Tamana, ana fuafuaga, mo uiga. Ne ‘tuku mai foki ne Iesu a tena ola e sui ei a mamoe.’ (Ioa. 10:11, 15) A te taulaga togiola a Keliso se fakamanuiaga eiloa ki tino! (Mata. 20:28) Ko te fuafuaga eiloa a Ieova “ko te mea ke se fakaseai atu so se tino e fakatuanaki ki a [Iesu] kae ke maua ne ia te ola se-gata-mai”!​—Ioa. 3:16.

5, 6. (a) Ko oi ne filifili aka ne Iesu ke tausi atu ki ana mamoe, kae ne a mea e ‵tau o fai ne mamoe ke maua ne latou a mea aoga mai te fakatokaga tenei? (e) Se a te pogai tonu e ma‵nako ei tatou o faka‵logo ki toeaina i te fakapotopotoga?

⁵ E ‵saga atu pefea a mamoe ki te Tausi Mamoe ‵Lei, ko Iesu Keliso? Muna a Iesu: “E faka‵logo aku mamoe ki toku leo, kae e iloa ne au latou, kae e tau‵tali mai latou i a au.” (Ioa. 10:27) A te uiga o te fakalogo ki te leo o te Tausi Mamoe ‵Lei ko te tautali i tena takitakiga i mea katoa. E aofia i ei a te faka‵logo ki tausi mamoe fesoasoani faka-te-agaga kolā ne ‵tofi aka ne ia. Ne fakaasi mai ne Iesu me e ‵tau o faka‵soko ne ana soko mo apositolo a te galuega telā ne kamata ne ia. E ‵tau mo latou o ‘akoako’ kae ‘fagai a tamā mamoe a Iesu.’ (Mata. 28:20; faitau te Ioane 21:15-17.) A koi salalau atu te tala ‵lei mo te aofaki o soko ko gasolo aka ki luga, ne fakatoka ne Iesu a Kelisiano ma‵tua ke tausi atu ki te fakapotopotoga.​—Efe. 4:11, 12.

⁶ I te taimi ne tusi atu ei ki ovasia o te fakapotopotoga i Efeso i te senitenali muamua, ne fai atu a te apositolo ko Paulo me ne filifili latou ne te agaga tapu ke fai mo ovasia o tausi te “fakapotopotoga a te Atua.” (Galu. 20:28) E penā foki a ovasia Kelisiano i aso nei, me e filifili foki latou e ‵tusa mo mea e manakogina i te Tusi Tapu kolā ne fakaosofia ne te agaga tapu. Tela la, a te faka‵logo ki ovasia Kelisiano e fakaasi atu i ei a ‵tou āva ki a Ieova mo Iesu, te avā Tausi Mamoe Sili. (Luka 10:16) E tonu, tenei eiloa te pogai tonu e ma‵nako ei tatou o faka‵logo ki toeaina. Kae isi aka foki ne nisi pogai e ‵tau ei o tau‵tali tatou i olotou fakatakitakiga.

7. E fesoasoani atu pefea a toeaina ki a koe ke fakatumau se fesokotakiga ‵lei mo Ieova?

⁷ I fakatonuga kolā e tuku atu ki taina mo tuagane, e tuku atu ne toeaina a fakamalosiga mo pati fakatonutonu io me ko fakatakitakiga fakavae mai te Tusi Tapu. I te tukuatuga o fakatakitakiga penā, e se fakamoe‵moe latou ke pule atu latou ki te auala e ola ei olotou taina mo tuagane. (2 Koli. 1:24) E tuku atu eiloa ne latou a fakatakitakiga mai te Tusi Tapu o fesoasoani atu ki taina mo tuagane Kelisiano ke fai a fakaikuga ‵lei kae ke fakamalosi aka a te ‵kau fakatasi mo te filemu i loto i te fakapotopotoga. (1 Koli. 14:33, 40) A toeaina e ‘puipui ne latou a ola’ i se auala fakatusa me e ma‵nako latou o fesoasoani ki tino taki tokotasi i te fakapotopotoga ke fakatumau se fesokotakiga ‵lei mo Ieova. Ka fesoasoani fakavave atu latou māfai e lavea ne latou me ko pili, io me ko “seke te auala” o se taina io me se tuagane. (Kala. 6:1, 2; Iuta 22) E mata, e se ne pogai ‵lei konei “ke faka‵logo [tatou] ki a latou kolā e fai ne latou te takitakiga.”?​—Faitau te Epelu 13:17.

8. E puipui pefea ne te kau toeaina a te lafu mamoe a te Atua?

⁸ Ne tusi atu te apositolo ko Paulo, se tausi mamoe faka-te-agaga, ki ana taina i Kolose: “Ke fakamautinoa aka ke mo a eiloa e fakapologa koutou ne se tino ki poto mo takolekolega mo munatuku a tino e ‵tusa mo tuu mo aganuu, mo poto fakavae o te lalolagi kae e se fakavae ki a Keliso.” (Ko. 2:8) E fesoasoani mai a te faka‵pulaga tenei ke lavea ne tatou a te suā pogai ‵lei e ‵tau ei o ‵saga tonu atu tatou ki pati fakatonutonu a toeaina mai te Tusi Tapu. E puipui ne latou a te lafu mamoe mai te fakamalosiga o olotou taina ke ‵teke atu ki so se tino telā e taumafai o fakavāivāi te lotou fakatuanaki. Ne fai atu te apositolo ko Petelu ke fakaeteete i “pelofeta ‵loi” mo “faiakoga ‵loi” kolā e taumafai o “fakalata ne latou a tino sē ma‵losi” ke fai a mea ‵se. (2 Pe. 2:1, 14) E ‵tau foki mo toeaina i aso nei o tuku atu ne faka‵pulaga e tai ‵pau māfai e manakogina. E pelā me ne tāgata Kelisiano ma‵tua, ko oti ne iloa ne latou te olaga tenei. E se gata i ei, koi tuai o filifili aka, ko oti ne fakaasi mai ne latou me e malamalama ‵lei latou i Tusitusiga Tapu, tela la, ko mafai ne latou o akoako atu te munatonu mai te Tusi Tapu. (1 Timo. 3:2; Tito 1:9) Ne fesoasoani atu te ma‵tua, paleni, mo te poto o latou telā e fakavae mai te Tusi Tapu ke tuku atu a fakatakitakiga ‵lei ki te lafu mamoe.

E FAGAI KAE PUIPUI NE TE TAUSI MAMOE ‵LEI A MAMOE

9. E takitaki kae fagai pefea ne Iesu a te fakapotopotoga Kelisiano i aso nei?

⁹ E auala i tena fakapotopotoga, e tuku mai ne Ieova a mea‵kai faka-te-agaga e uke ki taina mo tuagane i te lalolagi kātoa. E tuku mai foki a pati fakatonutonu e uke mai te Tusi Tapu e auala i ‵tou tusi. I nisi taimi, e aumai tonu a fakatakitakiga ki toeaina i te fakapotopotoga e auala i se tusi io me auala i fakatonuga kolā e fakaoko mai ne ovasia faima‵laga. I auala penā, e maua eiloa ne mamoe a fakatakitakiga manino.

10. Ne a tiute o tausi mamoe faka-te-agaga ki a latou kolā ne takase‵se kea‵tea mai te lafu?

¹⁰ I te feitu faka-te-agaga, e panaki mo ovasia a te tiute o puipui kae tausi faka‵lei a tino o te fakapotopotoga ke ma‵losi ‵lei, kae maise eiloa a latou kolā ne pa‵kia io me ne ma‵saki i te feitu faka-te-agaga. (Faitau te Iakopo 5:14, 15.) Kāti ne ‵sipa kea‵tea a nisi tino taki tokotasi mai te lafu kae fakagata i ei a te ‵kau atu ki galuega faka-Kelisiano. I feitu penā, e mata, e se fakaoti ne se toeaina atafai a tena malosi o ‵sala a mamoe takitasi kolā ne ‵galo kae fakamalosi ki ei ke toe ‵foki mai ki te lulu, telā ko te fakapotopotoga? Ao, e ‵tau eiloa! Ne fakamatala mai ne Iesu, penei: “E penā foki a toku Tamana i te lagi, e se manako ke mate se tokotasi o tino fatauva konei.”​—Mata. 18:12-14.

E ‵TAU O ‵KILO ATU PEFEA TATOU KI MEA ‵SE A TAUSI MAMOE FESOASOANI?

11. Kaia e faigata ei ki nisi tino ke tau‵tali i takitakiga a te kau toeaina?

¹¹ A Ieova mo Iesu ne Tausi Mamoe ‵lei katoatoa. A tausi mamoe fesoasoani kolā ne tuku atu ne lāua ke tausi a te fakapotopotoga e se ‵lei katoatoa. Kāti e fai ne te mea tenei ke faigata ki nisi tino o tau‵tali i takitakiga a te kau toeaina. Kāti e fai mai a nisi tino: ‘A latou ne tino fua e se ‵lei katoatoa penei mo tatou. Kaia e ‵tau ei o faka‵logo tatou ki olotou pati fakatonutonu?’ E tonu, a toeaina ne tino e se ‵lei katoatoa. Tela la, e ‵tau o maua ne tatou se kilokiloga tonu ki olotou mea ‵se mo vāivāiga.

12, 13. (a) Ne a mea ‵se ne fai ne nisi tino kolā ne fakaaoga ne Ieova? (e) Kaia ne tusi ei a mea ‵se a tāgata kolā e isi ne olotou tauliaga i te Tusi Tapu?

¹² E fakaasi tonu mai i loto i te Tusi Tapu a mea ‵se a tino kolā ne fakaaoga ne Ieova o ‵taki ana tino i taimi ko ‵teka. Pelā me se fakaakoakoga, ne fakasopo a Tavita mo fai te tupu mo te takitaki o Isalaelu. E ui i ei, ne takavale tou tagata i te fakaosoosoga kae agasala i te mulilua mo te tatino. (2 Samu. 12:7-9) Ke mafaufau foki ki te apositolo ko Petelu. Faitalia te ‵lasi o tiute ne tuku atu ki a ia i te fakapotopotoga Kelisiano i te senitenali muamua, ne fai ne ia ne agasala matagā. (Mata. 16:18, 19; Ioa. 13:38; 18:27; Kala. 2:11-14) E seai eiloa ne tino ne ‵lei katoatoa talu mai i a Atamu mo Eva, kae nā ko Iesu fua.

¹³ Kaia ne fai ei a Ieova ke tusi ne tino tusitala o te Tusi Tapu a mea ‵se a tāgata kolā ne fakaaoga ne ia? I tafa o nisi pogai, ne fakaasi mai ne te Atua i te mea tenei me e mafai o fakaaoga ne ia a tino sē ‵lei katoatoa ke ‵taki ana tino. A te tonuga loa, ne fai faeloa a ia penā. Tela la, e se ‵tau o fakaaoga ne tatou a te tulaga sē ‵lei katoatoa o latou kolā e fai ne latou te takitakiga i a tatou i aso nei mo fai se fakamasakoga e mui‵mui ei tatou ki a latou io me ‵teke atu ki te lotou pulepulega. E fakamoemoe a Ieova ke āva tatou ki taina penā kae faka‵logo ki a latou.​—Faitau te Esoto 16:2, 8. 

14, 15. Ne a mea e mafai o tauloto ne tatou mai te auala ne fesokotaki atu ei a Ieova ki ana tino i taimi ko ‵teka?

¹⁴ A te faka‵logo ki a latou kolā e fai ne latou te takitakiga i a tatou i aso nei e tāua. Ke mafau‵fau ki te auala ne fesokotaki atu ei a Ieova ki ana tino i taimi faiga‵ta ko ‵teka. I te taimi ne tiakina ei ne tino Isalaelu a Aikupito, ne tuku atu ne te Atua ana fakatonuga ki a latou e auala i a Mose mo Alona. Ko te mea ke ‵sao latou mai te sefulu o mala, e ‵tau o faka‵logo te kau Isalaelu ki te fakatonuga ke fai se ‵kaiga fakapito kae nani a nisi toto o te tamā mamoe telā ne ta ki luga i pou o mataloa mo ulu o mataloa o olotou fale. Ne seki fakaoko atu a te fakatonuga tenā e auala i se leo mai te lagi. Ne ‵tau o faka‵logo latou ki tāgata ma‵tua o Isalaelu kolā ne maua ne latou ne fakatonuga fakapito mai i a Mose. (Eso. 12:1-7, 21-23, 29) I fakanofonofoga konā, ne fai a Mose mo tāgata ma‵tua e pelā me ne tino kolā e fakaoko atu a fakatonuga a Ieova ki ana tino. E fakataunu foki ne toeaina Kelisiano i aso nei se galuega tāua e tai ‵pau.

¹⁵ E se taumate, e mafai foki koe o mafaufau i nisi taimi ki tala fakasolopito i te Tusi Tapu i te fakaaogaga ne Ieova a tino mo agelu ke auala mai i ei a fakatonuga e ‵sao ei ana tino. I mea katoa konei, ne matea ne te Atua me e ‵tau o tuku atu a tauliaga ki nisi tino ke pulepule. E fai‵pati a avefekau i tena igoa kae fai atu ki ana tino a mea e ‵tau o fai ne latou ko te mea ke ‵sao latou mai se fakalavelave. E mata, e se mafau‵fau tatou me e mafai ne Ieova o fai se mea penā i Amaketo? Tela la, so se toeaina i aso nei telā ne tuku ki ei a te tiute ke sui ne ia a Ieova io me ko tena fakapotopotoga, e ‵tau o fakaeteete malosi ke mo a e fakaaoga ‵se ne latou a tulaga pule kolā ne tuku atu ki a latou.

“LAFU MAMOE E TASI, MO TE TAUSI MAMOE E TOKOTASI”

16. Se a te “leo” telā e ‵tau o ‵saga tonu tatou ki ei?

¹⁶ A tino o Ieova ko te “lafu mamoe e tasi” mai lalo i “te tausi mamoe e tokotasi,” ko Iesu Keliso. (Ioa. 10:16) Ne fai mai a Iesu me ka fakatasi a ia mo ana soko i “aso katoa ke oko eiloa ki te gataga o te olaga tenei.” (Mata. 28:20) E pelā me ko te Tupu i te lagi, e pule katoatoa a ia ki mea kolā ka ‵tupu ke oko ki te fakaseaiga o te lalolagi a Satani. Ko te mea ke ‵kau fakatasi faeloa kae saogalemū i loto i te lafu mamoe a te Atua, e ‵tau mo tatou o faka‵logo ki ‘se leo mai ‵tou tua,’ e fakasino mai te auala e ‵tau o olo tatou i ei. E aofia i te “leo” tenei a mea kolā ne fai mai ne te agaga tapu e auala i te Tusi Tapu mo mea kolā ne fai mai ne Ieova mo Iesu e auala i a latou kolā ne ‵tofi aka e pelā me ne tausi mamoe fesoasoani. ​—Faitau te Isaia 30:21; Fakaasiga 3:22.

17, 18. (a) Se a te mea e fakamatakutaku atu ki te lafu mamoe, kae se a te mea e mafai o tali‵tonu tatou ki ei? (e) Se a te mea ka sau‵tala tatou ki ei i te suā mataupu?

¹⁷ E fai mai te Tusi Tapu i a Satani e livaliva sāle “pelā me se leona fekai, o salasala ke folo ne ia se tino.” (1 Pe. 5:8) E pelā me se manu fekai sauā kae fiakai malosi, e tautali eiloa a ia i te lafu mamoe, o fakatalitali ki se avanoaga ke ‵poa aka ne ia a tino kolā ko vāivāi io me ko latou kolā ko takase‵se. Tenā te pogai e ‵tau ei o ‵pili ‵ki tatou ki te lafu mamoe mo “te tausi mamoe mo te ovasia o [‵tou] ola.” (1 Pe. 2:25) E fai mai te Fakaasiga 7:17 e uiga ki a latou kolā ka ‵sao atu i te fakalavelave lasi: “Te Tamā Mamoe [ko Iesu] . . . ka tausi ne ia a latou, kae ka takitaki ne ia a latou ki vaipuna o vai o te ola. Kae ka ‵solo keatea ne te Atua a loimata katoa mai i olotou mata.” E mata, e isi aka se tautoga e mafai o ‵lei atu?

¹⁸ Ona ko te tāua o tiute o toeaina Kelisiano kolā ne sau‵tala tatou ki ei e pelā me ne tausi mamoe fesoasoani i te feitu faka-te-agaga, se mea ‵lei ke fesili ifo tatou penei, E mafai pefea o fakamautinoa aka ne tāgata filifilia konei me e tausi faka‵lei ne latou a mamoe a Iesu? Ka sau‵tala tatou ki te tali i te suā mataupu.

[Ata i te itulau e 21]

[Ata i te itulau e 23]

E pelā mo te tausi mamoe e puipui a tena lafu, e puipui ne toeaina a mamoe kolā ne tuku atu ke tausi ne latou (Onoono ki te palakalafa e 8)

[Ata i te itulau e 25]

E taumafai a toeaina o puipui a kāiga kolā e taki tokotasi a mātua i ei mai taugasoa ma‵sei (Onoono ki palakalafa e 17, 18)