TALI KI FESILI MAI TE TUSI TAPU

Ko oi e pule tonu ki te lalolagi nei?

E tali‵tonu a tino e tokouke me i te Atua tonu ko te pule o te lalolagi nei. Kae kafai e tonu te mea tenā, e mata, e ‵tau o ‵fonu te lalolagi nei i logo‵maega? (Teutelonome 32:4, 5) E fai mai te Tusi Tapu, me ko nofo a te lalolagi mai lalo i te pule a se tino masei.​—Faitau te 1 Ioane 5:19.

Ne mafai pefea o pule atu se tino masei ki luga i tino? I te kamataga o te olaga o tino, ne ‵teke atu se agelu ki te Atua kae ne fakamalosi atu a ia ki te tauavaga muamua ke ‵teke atu foki. (Kenese 3:1-6) Ne filifili a te tauavaga tenā ke faka‵logo ki te agelu ‵teke, ko Satani, kae fai ei a ia mo fai te lā pule. A te Atua tafasili i te maluga ko te Pule tonu fua e tokotasi, kae e manako a ia ke filifili ne tino a tena pulega ona ko te lotou a‵lofa ki a ia. (Teutelonome 6:6; 30:16, 19) Se mea fakafanoanoa me ko oti ne takitaki ‵se a te tokoukega o tino ke fai foki ne latou te filifiliga sē ‵lei e pelā mo te mea ne fai ne te tauavaga muamua.​—Faitau te Fakaasiga 12:9.

Ko oi ka faka‵lei ne ia a fakalavelave o tino?v

E mata, ka talia ne te Atua ke tumau te pulega masei a Satani? Ikai! Ka fakaaoga ne te Atua a Iesu ke fakaseai ne ia a mea ma‵sei kolā ne fai ne Satani.​—Faitau te 1 Ioane 3:8.

Mai te taliaga a te Atua, ka fakaseai eiloa ne Iesu a Satani. (Loma 16:20) Ko pule atu ei a te Atua ki luga i tino, kae toe fakafoki mai ne ia a tino ki te olaga fiafia kae filemū telā ne fakamoemoe muamua a ia ki ei.​—Faitau te Fakaasiga 21:3-5.