“Fakalaugatasi te Auala e Sasale ei Koe” ki Mua
I TE taimi ne tiakina ei ne tino o te Atua a Papelonia i te 537 T.L.M., ne saga tonu atu a Ieova ki te lotou auala ki Ielusalema. Ne fai atu a ia ki a latou: “Fakatoka se auala lasi; ave kea‵tea a fatu mai i ei! Fakaasi aka se fakailoga ko te mea ke iloa ne malo.” (Isa. 62:10) Mafaufau ki te auala ne gasue‵sue ei a nisi tino Iutaia o fai a te mea tenā. Kāti ne faite ne potukau mai mua atu a te auala mai te faka‵fonuga o koga poko‵poko kae fakalaugatasi a koga pona‵pona. I te faiga tenā ne fesoasoani atu ei latou ki olotou taina kolā e o‵mai i olotou tua i te lotou auala o toe ‵foki ki te lotou fenua tonu.
E mafai o fakaaoga ne tatou a te mea tenā e pelā me se tala fakatusa o se auala telā e tau atu ki fakamoemoega faka-te-agaga. E manako a Ieova ki ana tavini katoa ke olo i loto i te auala tenā e aunoa mo te sona fakatalave fua. E fakamalosi mai a tena Muna ki a tatou: “Fakalaugatasi te auala e sasale ei koe, kae ka mautinoa ‵lei ou auala katoa.” (Faata. 4:26, NW) Faitalia me koi foliki koe me ikai, e lavea ne koe a te poto o te fakatakitakiga tenā mai te Atua.
FAKATOKA TE AUALA MAI TE FAIGA O FAKAIKUGA ‵LEI
Kāti ne lagona ne koe a tino e fai aka penei e uiga ki se talavou: ‘Ko oko eiloa i te uke o mea e saga ki ei tou fafine’ io me, ‘E uke a mea ne fai ne tou tagata ke iku manuia ei a ia.’ E masani o maua ne talavou se foitino malosi, e ‵vave olotou mafaufauga, mo se manakoga malosi ke iku manuia. E fai faka‵lei mai te Tusi Tapu: “E tavae ne tatou te ma‵losi o talavou.” (Faata. 20:29) E mafai ne te talavou telā e fakaaoga ana taleni mo tena malosi ke tavini atu ki a Ieova o fakataunu a fakamoemoega faka-te-agaga kae maua i ei a te fiafia tonu.
E pelā mo te mea e iloa ne koe, e fakatāua malosi ne te lalolagi a mea kolā e mafai ne ‵tou talavou o fai. Kafai e ‵lei a te tulaga o se talavou Molimau i te akoga, kāti e fakamalosi atu se tino fakatonutonu, se faiakoga, io me se tamaliki akoga ke kausaki atu te Molimau ki akoga kolā e maluga atu e pelā me se lasaga ki mua ke maua te manuia i te olaga tenei. Io me kāti e taumafai a tino kolā e filifili ne latou a tino ta‵fao o fakakolekole se taina io me se tuagane talavou telā e mafai o tafao ke kausaki atu ki se tafaoga. E a, kai oko aka eiloa koe ki se tulaga penā, io me e iloa ne koe se tino ne fepaki mo se fakamalosiga penā? Se a te mea ka fesoasoani atu ki se Kelisiano ke poto i te faiga o se filifiliga?
E mafai o fesoasoani atu a akoakoga mai te Tusi Tapu ke toka se tino o faimalaga atu i te ‵toe auala ‵lei i te olaga. “Ke masaua ne koutou a te Atua telā ne faite ne ia koutou, i aso konei koi ‵tupu ake ei koutou,” ko pati i te Failauga 12:1. E mafai pefea koe io me ko tou taugasoa koi talavou o ‘masaua faka‵lei a te Mafuaga Sili’?
Ke mafaufau ki te mea ne tupu ki a Elikaa i Afelika ki Togālā. A ia e fiafia o tafao i te futipolo. I te taimi ko 15 ei tausaga o Elika, ne filifili tou tagata ke tafao i se tiimu a te fenua. Ko tena uiga, e mafai o fakamoemoe tou tagata me e se leva ko maua ne ia a te ‵toe akoakoga maluga i mea tau tafaoga i Eulopa, kāti e iku atu ki te mauaga o se galuega ‵lei ‵ki. Kae ka fakagalue aka pefea a te fakatakitakiga tenei ke ‘masaua a tou Mafuaga Sili’? Kae se a te akoakoga mai konei e aoga ki a koe io me ko nisi taugasoa?
I tausaga koi akoga ei, ne kamata a Elika o sukesuke ki te Tusi Tapu fakatasi mo Molimau a Ieova. Ne tauloto ne tou tagata i ei me ka faka‵lei katoatoa ne tena Mafuaga a fakalavelave o tino. Ne lavea ne Elika a te tāua ke fakaaoga a tena taimi mo tena malosi o fai te loto o te Atua. I te kilo atu ki te ‵tonu o te mea tenā, ne seki filifili ei a Elika ke kausaki atu ki se galuega i mea tau tafaoga. I lō te fai penā, ne papatiso tou tagata kae fakaaoga a ia eiloa ki mea faka-te-agaga. E seki leva, kae fai a ia mo fai se tavini fesoasoani kae ne ‵kami fakamuli ifo ke kau ki te Akoga mō Taina Taka.
Moi fai ne kausaki atu a Elika ki se galuega i mea tau tafaoga, ne mafai loa o maumea kae takutakua tou tagata. Kae ne matea ne tou tagata a te ‵tonu o te fakatakitakiga fakavae mai te Tusi Tapu: “A tino mau‵mea e mafaufau pelā i a latou e puipui ne olotou koloa, e pelā me se ‵pui maluga kae malosi telā e puipui ne ia te fa‵kai.” (Faata. 18:11) Ao, a te puipuiga telā e mafaufau se tino me e maua mai i koloa e fai fua pelā me se moemiti. E se gata i ei, a latou kolā e kausaki ke maua a koloa e masani o ‘fati‵fati olotou loto i puapuaga e uke.’—1 Timo. 6:9, 10.
Se mea fakafiafia, me ne maua ne talavou e tokouke a te fiafia mo te puipuiga tumau mai te ‵kau atu ki te taviniga tumau. Muna a Elika: “Ko oti au ne kau ki se ‘tīmu’ lasi o tavini ga‵lue tumau a Ieova. Tenā eiloa te ‵toe tīmu sili e mafai au o kau ki ei, kae fakafetai au ki a Ieova mō te fakaasimaiga ki au a te auala fua e tasi e maua ei te fiafia mo te manuia tonu i te olaga.”
A ko koe? Kaia e se faka‵mautakitaki ei “ou auala” i mua o Ieova mai te kau katoatoa atu ki te galuega fakapaenia i lō te kausaki atu ki fakamoemoega faka-te-lalolagi?—Ke onoono ki te pokisi “Te Mauaga o Mea Aoga Kolā e se Mafai o Maua i te Iunivesiti.”
TE TAPALEGA O FAKALAVELAVE MAI TOU AUALA
I te taimi ne āsi atu ei ki te ofisa lagolago i te Iunaite Sitete, ne matea ne se tauavaga a te fia‵fia o tino kolā e tavini atu ki a Ieova i te Peteli. Ne tusi fakamuli mai te tuagane: “Ko oko eiloa i te tokagamalie o māua i te mā fakasologa.” Ne fakaiku aka ne te tauavaga ke fakaavanoa lā taimi mo malosi mō tauliaga o te taviniga kolā e ‵lasi atu.
I te taimi e tasi, e foliga mai me ne tai faigata ki te tauavaga tenei ke fakafesagai atu ki ‵fuliga kolā ne ma‵nako lāua ki ei. Kae i te aso e tasi, ne mafau‵fau lāua ki te tusi siki mō te aso. A te tusi siki ko te Ioane 8:31, telā e faitau i ei ne tatou a pati a Iesu: “Kafai e tumau koutou i aku muna, ko oku soko ‵tonu koutou.” Mai te masaua o te mea tenā, ne mafau‵fau aka lāua: “So se mea telā e fai ne māua ke fakafaigofie ei te olaga e ‵tau eiloa o fai.” Ne fakatau ne lāua ki tua a te lā fale lasi, fakaseai a nisi amoga ‵mafa, kae olo ki se fakapotopotoga telā e manakogina i ei se fesoasoani. Ko paenia nei lāua, kae fesoasoani foki i te faitega o Kingdom Halls kae ga‵lue fakavolenitia i fono o atufenua. E pefea a lā lagonaga? “Ne ofo māua i te fiafia ne maua ne māua mai te ola i se olaga faigofie, o fai fua a te mea telā e fakamalosi mai te fakapotopotoga saukātoa a Ieova ke fai ne māua.”
TUMAU I TE GASOLO KI MUA I TE FEITU FAKA-TE-AGAGA
Ne tusi mai a Solomona: “Kilo tonu ki mua mo te loto fakamaoni, kae sa punou tou ulu mo te masiasi.” (Faata. 4:25) E pelā me se tino fakatele telā e kilo tonu eiloa ki mua i te auala, e se ‵tau o talia ne tatou a mea kolā e mafai o fakalavelave mai ki te faiga ne tatou a fakamoemoega faka-te-agaga kae fakataunu.
Ne a fakamoemoega faka-te-agaga e mafai ne koe o fai kae fakataunu? A te kau ki te taviniga tumau se fakamoemoega ‵lei. A te suā mea, ko te ga‵lue fakatasi mo se fakapotopotoga e pili mai telā e manako ki tino talai apo ke fesoasoani o talai se koga lasi. Io me kāti e tokouke a tino talai ‵lei, kae sē lava a toeaina mo tavini fesoasoani. E mata, e mafai koe o fesoasoani i se auala e tasi i auala konā? Kaia e se faipati ei koe ki te ovasia o fenua ke onoono aka me mafai koe o fesoasoani? Kafai koe e fiafia o fano o talai i se koga e ‵mao atu, e mafai ne koe o fakamolemole ke maua ne fakamatalaga o fakapotopotoga tai ‵mao kolā e ma‵nako ki se fesoasoani.b
Ke toe ‵foki tatou ki te ata telā ne fakamatala mai i te Isaia 62:10. Kāti ne ga‵lue malosi a nisi tino Iutaia o fakalaugatasi kae faka‵ma te auala o toe ‵foki ki te lotou fenua ko te mea ke oko atu a tino o te Atua ki te lotou fenua. Kafai e fakamalosi ne koe a koe eiloa o fakataunu a fakamoemoega i te taviniga tapu, ke mo a koe e ‵fiu. Kāti e mafai eiloa koe o oko ki fakamoemoega konā fakatasi mo te fesoasoani o te Atua. Tumau i te fakamolemole atu ki a Ieova ke maua te poto a koi taumafai koe o tapale kea‵tea a mea kolā e ‵pono mai i ou mua. E oko mai te taimi, ka lavea ei ne koe te auala e mafai ei o fesoasoani atu a ia ki a koe ke “fakalaugatasi te auala e sasale ei koe.”—Faata. 4:26, NW.