TALI KI FESILI MAI TE TUSI TAPU

Kaia e ‵tau ei mo tatou o ‵talo?

E manako a Ieova te Atua ke fai‵pati atu faeloa tatou ki a ia i so se taimi e uiga ki mea e manava‵se tatou ki ei. (Luka 18:1-7) E fakalogologo mai a ia ona ko tena fia saga mai ki a tatou. Ona ko te mea e ‵kami tatou ne te ‵tou Tamana faka-te-lagi ke ‵talo atu, kaia e se talia ei ne tatou tena ‵kamiga?—Faitau te Filipi 4:6.

A te ‵talo e se sē auala fua ke fakamolemole atu mō se fesoasoani. I lō te fai penā, e fai ne te ‵talo ke fakapilipili atu tatou ki te Atua. (Salamo 8:3, 4) Kafai e fakaasi atu faeloa ‵tou lagonaga ki te Atua, e ati aka ei ne tatou se va fakataugasoa pili mo Ia.—Faitau te Iakopo 4:8.

E ‵tau o ‵talo atu pefea tatou?

Kafai e ‵talo atu tatou, e se manako te Atua ke fakaaoga ne tatou a tugapati fakagali‵gali io me ke fakafoki‵foki atu faeloa a ‵talo fakaakoako. E se manakogina foki ke fakaaoga ne tatou se vaegā tulaga fakapito. E ‵kami tatou ne Ieova ke ‵talo atu mai te loto. (Mataio 6:7) E pelā mo taimi i Isalaelu mua, ne ‵talo atu a Hana e uiga ki se fakalavelave fakafanoanoa i te kāiga. Fakamuli ifo, i te taimi ne ‵fuli ei tena kaitaua ki te fiafia, ne fakafetai atu tou fafine ki te Atua i se ‵talo mai te loto.—Faitau te 1 Samuelu 1:10, 12, 13, 26, 27; 2:1.

Ko oko eiloa i te gali o te tulaga taulia ko maua ne tatou! E mafai ne tatou o olo atu ki te Mafuaga mo mea e manava‵se tatou ki ei. E mafai foki o tavae kae fakafetai atu tatou ki a ia mō mea e fai ne ia. E mautinoa eiloa me e se ‵tau o fakata‵mala tatou ki se tauliaga tāua penā.—Faitau te Salamo 145:14-16.