MATAUPU I TE ‵KAVA | A SATANI SE TINO TONU?
E Mata, a Satani se Tino Tonu?
Se fatagata ne faite i Madrid i Sepania telā e fakaata mai ei a Satani e pelā me se agelu masei telā ko to ifo
“Ne tupu aka au i El Salvador. I taimi kolā e se fakalogo au, e fai sāle mai toku matua penei, ‘Ka vau te Tiapolo o ta koe!’ Kae ne tali atu sāle au penei, ‘Fai ki ei ke vau!’ Au e talitonu ki te Atua kae e se ki a Satani.”—ROGELIO.
E mata, e lotomalie koe ki pati a Rogelio? Tefea te manatu mai lalo nei e foliga tonu atu ki a koe?
A Satani e sē se tino tonu, kae se fakailoga fua o te masei.
A Satani se tino tonu kae e se fia saga mai a ia ki tino.
A Satani se agaga malosi telā e lasi tena fakamalosiga ki tino.
Kāti e nofo loa ki se miliona o tino e ‵lago atu ki manatu takitasi konā. Kae e mata, e tāua ke iloa aka me tefea te manatu e tonu? Ia, kafai la a Satani e sē se tino tonu, ko tenā uiga ko fakaloiloigina a tino kolā ne tali‵tonu ki te manatu tenā. Kafai a Satani se tino tonu kae e se fia saga mai ki tino, ko tena uiga ko ma‵taku fua a tino e tokouke e aunoa mo se pogai ‵tau. Kae kafai a Satani se tino poto i te fai togafiti, ko tena uiga ko sili atu tena fakamataku i lō so se mea telā e mafau‵fau ki ei a tino.
Ke onoono nei tatou ki te auala e tali aka ei ne te Tusi Tapu a fesili konei: Se a kae ko oi foki a Satani—se fakailoga o te mea masei io me se tino faka-te-agaga? Kafai a Satani se tino, e mata e fakamataku a ia ki a koe? Kafai e penā loa, e mafai pefea o puipui koe mai i a ia?