TALI KI FESILI MAI TE TUSI TAPU
E mata, ne faka‵tu aka eiloa ne Iesu a tino mai te mate?
Ne fakatu aka ne Iesu a Lasalo, telā ko oti ne mate i aso e fa
E fakaasi manino mai i te Tusi Tapu me ne faka‵tu aka ne Iesu a tino ‵mate ki te ola. A tala konā e se ne tala ‵kai; ne ‵tupu eiloa i koga ‵tonu mo taimi mautinoa. E pelā mo te tau ‵vela i te tausaga ko te 31 T.A., ne faima‵laga atu se vaitino tokouke mo Iesu mai Kapanaumi ki Naina. I te lotou okoatuga, ne fetaui latou mo te suā vaitino. E mafai eiloa o talitonu koe ki te mea ne tupu mai tua ifo me ne fakamau eiloa i te Muna a te Atua, ko te Tusi Tapu, kae ne molimau ne tino katoa i konā.—Faitau te Luka 7:11-15.
Ne fakatu aka foki ne Iesu tena taugasoa ko Lasalo, telā ko oti ne mate i aso e fa. E mafai eiloa o talitonu koe ki mea ne fai ne Iesu i te aso tenā me ne molimau foki a tino e tokouke ki ei.—Faitau te Ioane 11:39-45.
Kaia ne faka‵tu aka ei ne Iesu a tino?
Ne faka‵tu aka ne Iesu a tino ona ko tena loto alofa ki a latou. Ne fakaasi atu foki i ei me ne tuku atu ki a ia ne tena Tamana, te Mafuaga o te ola, a te ‵mana ki luga i te mate.—Faitau te Ioane 5:21, 28, 29.
A te faka‵tuga o tino kolā ne fai ne Iesu e tuku mai i ei a te loto talitonu ki ana folafolaga mō aso mai mua. Ka faka‵tu aka ne ia a tino e tokouke atu, e aofia i ei a tino sē amio‵tonu kolā e seai eiloa se lotou mea e iloa e uiga ki te Atua tonu. Ka toe tuku atu ki a latou se avanoaga ke iloa kae ke a‵lofa ki a Ieova te Atua.—Faitau te Galuega 24:15.