TALI KI FESILI MAI TE TUSI TAPU
E mata, ka toe ola mai a tino ‵mate?
E Mautinoa Eiloa me e Mafai o Toe Faka‵tu Mai a Tino ‵Mate ne te Mafuaga o te Ola
A Ieova te Atua ko te Pogai o te ola. (Salamo 36:9) E mata, e foliga mai me e mafai eiloa ne te Atua o toe fakaola a tino kolā ko oti ne ‵mate? E fakatalitonu mai te Tusi Tapu ki a tatou me ka fai eiloa ne ia te mea tenā i aso mai mua. (Faitau te Galuega 24:15) Kae kaia ka fai ei ne ia te mea tenā?
Ne manako eiloa te ‵tou Mafuaga i te kamataga ke ola a te tagata i te lalolagi nei ki te se-gata-mai. (Kenese 1:31; 2:15-17) Tenā eiloa te mea koi manako a ia ki ei. E fakalogo‵mae ki a ia ke lavea atu a mea kolā e fakafesagai atu nei tatou ki ei—se olaga telā e ‵fonu i fakalavelave kae gata vave atu foki.—Faitau te Iopu 14:1, 14, 15.
Ka ‵nofo i fea a tino kolā ka toe faka‵tu mai?
E mata, ne faite ne te Atua te tagata ke nofo i te lagi? Ikai. Ne faite ne te Atua a agelu ke ‵nofo i te lagi. Ne faite ne ia a tino ke ‵nofo i te lalolagi. (Kenese 1:28; Iopu 38:4, 7) Ona ko te mea tenā, ke mafaufau foki ki tino kolā ne faka‵tu aka ne Iesu mai te mate. Ne toe faka‵tu mai ne ia a tino ki te ola i te lalolagi nei. E penā foki loa, a te tokoukega o tino ka faka‵tu aka i aso mai mua, ka toe ‵foki mai ki te ola i te lalolagi.—Faitau te Ioane 5:28, 29; 11:44.
Kae ne filifili aka eiloa ne te Atua a nai tino ke toe faka‵tu aka ki te ola i te lagi, telā ka maua ei ne latou a foitino faka-te-agaga. (Luka 12:32; 1 Kolinito 15:49, 50) A latou kolā e toe faka‵tu aka ki te lagi, ka pule mai e pelā me ne tupu fakatasi mo Keliso ki luga i te lalolagi.—Faitau te Fakaasiga 5:9, 10.