Ne Ofo Atu a Latou Eiloa mo te Loto Fia‵fia i Turkey

NE FAI ne Kelisiano i te senitenali muamua a taumafaiga e uke ke mafai o oko atu a te “tala ‵lei o te Malo” ki tino e tokouke. (Mata. 24:14) Ne faima‵laga atu a nisi tino ki nisi fenua ‵mao. E pelā me se fakaakoakoga, ne fanatu eiloa a Paulo ki kogā koga telā ko Turkey i aso nei, kae talai atu ki koga kese‵kese i te taimi o ana malaga fakamisionale.a I se 2,000 tausaga fakamuli ifo, i te 2014, ne fai a Turkey e pelā me ko te fenua telā ne fai ei se galuega fakapito. Kaia ne fakatoka faka‵lei i ei a te galuega fakapito tenei? Ko oi ne ‵kau atu ki ei?

“SE A TE MEA E TUPU?”

Toeitiiti kae kātoa te 2,800 tino talai i Turkey, kae e silia atu mo te 79 miliona te aofaki o tino i ei. Ko tena uiga a te aofaki o tino talai māfai e fakatusa ki te aofaki o tino i Turkey e pilipili ki te toko 1 ki te toko 28,000. Tela la, ne mafai fua ne tino talai o fesokotaki atu ki se aofaki foliki fua o tino i te fenua. A te pogai o te galuega fakapito ko te fai o te ‵toe mea e mafai o fai ke oko atu ki tino e tokouke i se taimi toetoe. E nofo ki se 550 o taina mo tuagane mai nisi fenua kolā e fai‵pati ki te ‵gana Turkey, ne ma‵laga atu ki Turkey o talai fakatasi mo taina konā i te galuega fakapito. Ne a mea ne iku mai i ei?

Ne salalau te talaiga i konā. Ne tusi mai te fakapotopotoga e tasi mai Istanbul: “Kafai e lavea matou ne tino, e fesili mai latou: ‘E isi se fono fakapito a koutou e fai i konei? So se koga e olo matou ki ei, e lavea faeloa ne matou a Molimau a Ieova!’” Ne tusi mai foki se fakapotopotoga e tasi i te fa‵kai lasi o Izmir penei: “Ne fanatu se tagata e galue i te koga e ‵tu ei a taxi kae fesili atu ki se toeaina i te koga tenā, ‘Se a te mea e tupu? Ko fakalasi te otou galuega?’” Ne lauiloa te galuega fakapito tenā.

Ne fia‵fia malosi a tino kolā ne au‵mai mai nisi fenua ki te galuega talai. A Steffen, se taina mai Tenimaka, ne fai mai penei: “I aso katoa, ne talai atu au ki tino kolā ne seki lagona aka eiloa ne latou a mea e uiga ki a Ieova. Ne maua ne au te lagonaga me ko fakasalalau eiloa ne au te igoa o Ieova.” Ne tusi mai a Jean-David, se taina mai Falani penei: “Ne talai matou i se auala fua e tasi mō se fia itula. Ko oko eiloa i te gali! A te tokoukega o tino e se iloa ne latou a Molimau a Ieova. Toeitiiti i mataloa katoa ne mafai o kamata ne matou se sau‵talaga, fakaasi atu a ‵tou vitio, kae tuku atu a tusi fai‵tau ki te tino i te fale.”

Ne tufa atu ne te toko 550 tino kolā ne ‵kau atu ki te galuega fakapito a tusi e nofo ki se 60,000 i loto fua i se lua vaiaso! Ne iku atu te galuega fakapito tenei ki se molimau lasi ki tino.

Ne gasolo o lasi te loto finafinau ki te talaiga. Ne fakamalosi ne te galuega fakapito tenei a taina i konā ke loto finafinau. E tokouke ko kamata o mafau‵fau ke ga‵lue i te taviniga tumau. E tonu, ne fanaka eiloa ki luga te aofaki o tino talai tumau i Turkey ki te 24 pasene i te 12 masina mai tua o te galuega fakapito.

Ne fakaasi mai ne tino kolā ne olo atu mai nisi fenua, me ne aoga malosi te galuega fakapito tenei ki te lotou galuega talai i te taimi ne ‵foki atu ei latou ki olotou fenua ‵tonu. A Şirin, se tuagane mai Siamani, ne tusi mai penei: “Ne faigofie ki taina i Turkey a te talai atu i taimi kolā e seki fakamoemoegina. Au e mā māfai e talai atu i taimi penā. Kae fakafetai au ki te galuega fakapito tenei, fakaakoakoga a taina i konā, fakatasi mo ‵talo e uke, me ko mafai ne au o fai te mea telā ne seki mafai o fai muamua ne au. Ne talai foki au i auala o tuleini kolā e ‵tele i lalo i te laukele! Nei la, au ko se mā e pelā mo taimi mua.”

“Ne tauloto ne au a mea e uke ki taku galuega talai,” ko pati a Johannes se taina mai Siamani. “Ne ma‵nako a taina i Turkey ke fakaoko atu te munatonu ki tino e tokouke kolā e mafai o maua. Ne talai atu latou i so se avanoaga e maua ne latou. Ne fakaiku aka foki ne au ke fai penā māfai ko foki atu au ki Siamani. Kae nei la, ko tokouke atu a tino e talai au ki ei i lō aso mua.”

“Ne aoga malosi a te galuega fakapito tenei ki taku galuega talai. Ne fesoasoani mai ke gasolo ki luga toku loto malosi mo toku talitonu ki a Ieova,” ko pati a Zeynep, se tuagane mai Falani.

Ne gasolo o ‵pili te fesokotakiga i vā o taina. Ne fai ne te a‵lofa mo te ‵kaufakatasi o taina mai atufenua kese‵kese ke maua se fakaakoakoga tumau. “Ne lavea ne matou te talimālō ‵lei o taina i konā,” ko pati a Jean-David, telā ne fakaasi atu muamua. Ne toe fakaopoopo mai a ia: “Ne fai matou e pelā me ne taugasoa mo kāiga o latou. Ne fia‵fia ke ‵nofo matou i olotou fale. Ne iloa ne au i a tatou se kautaina i te lalolagi kātoa; E uke foki a taimi ne faitau ne au te mea tenā i ‵tou tusi. Kae tenei eiloa te taimi muamua ke fakatalitonu ne au. Ne fakamatamata au ke fai pelā me se tino o Ieova, kae ne fakafetai au ki a Ia mō te tauliaga gali tenei.”

“Faitalia me ne au‵mai i Tenimaka, Falani, Siamani, io me ko Turkey, a tatou se kāiga eiloa e tasi. E pelā eiloa me ne ‵solo ne Ieova a tuakoi o fenua ki se ‵solo lasi ‵ki,” ko pati a Claire, se tuagane mai Falani.

Ne fai mai foki a Stéphanie, se tuagane mai Falani: “Ne akoako mai i te galuega fakapito tenei, me i te mea telā e fusi fakatasi ei tatou e se ko tuu io me ko ‵gana, kae ko te ‵tou a‵lofa ki a Ieova.”

NE MAUA MAI EI A MEA AOGA TUMAU

E tokouke a tino kolā ne ‵kau atu ki te galuega fakapito ko mafau‵fau ke olo atu ki Turkey o fesoasoani ki te galuega lasi telā koi manakogina ke fai i konā. E isi ne nāi tino ko oti ne olo atu ki ei. Ko oko eiloa i te ‵tou loto fakafetai ki taina konei.

E pelā me se fakaakoakoga, mafaufau la ki se potukau foliki o tino talai e toko 25 i se koga e tasi telā e mavae. I se fia o tausaga, e tokotasi ‵pau eiloa te toeaina i ei. Mafaufau ki te fia‵fia o tino talai i konā i te 2015, i te taimi ne olo atu ei a tino talai e toko ono mai Siamani mo Netherlands ke fesoasoani atu ki a latou!

TAVINI ATU I SE KOGA TELĀ E LASI TE MANAKOGA I EI

Ne a pati a taina kolā ne olo atu ki Turkey e uiga ki te olotou olaga i konā? I nisi taimi e faigata, kae e maua eiloa a ikuga fakafia‵fia mai te olo atu o ga‵lue i koga kolā e lasi te manakoga i ei. Mafaufau ki pati a nisi tino:

“A te sē uke o kope faka-te-foitino e fai ei ke uke oku taimi avanoa, kae ke tuku tonu foki toku mafaufau ki toe mea tāua,” ko pati a Federico, se taina avaga mai Sepania telā ko 40 tupu ana tausaga kae ne fanatu ki konā. E mata, ka fakamalosi aka ne ia te vaegā taviniga tenā? “E mautinoa eiloa!” ko ana pati. “Kafai e fano koe ki se suā fenua mo te fakamoemoega ke fesoasoani atu ki nisi tino ke iloa a Ieova, ko tuku ‵tonu atu ne koe a koe eiloa ki ana lima. Ko lagona tonu ei ne koe te atafai o Ieova ki a koe.”

“A te tavini atu i te koga telā e manakogina i ei a tino talai e tuku mai ei te lotomalie katoatoa, kae ke fakailoa atu te munatonu ki tino e tokouke kolā e seki lagona aka eiloa ne latou muamua,” ko pati a Rudy, se taina avaga telā ko 50 tupu ana tausaga mai Netherlands. “A te kilo atu ki te fia‵fia o tino māfai ko talia ne latou te munatonu e maua mai ei te fiafia lasi.”

Ne fai mai a Sascha, se taina avaga telā ko 40 tupu ana tausaga kae ne fanatu mai Siamani ki konā: “I so se taimi e fano au i te galuega talai, e fetaui au mo tino kolā fatoa lagona ne latou te munatonu mō te taimi muamua eiloa. A te tuku atu o te avanoaga ki vaegā tino penā ke iloa ne latou a Ieova e maua mai i ei te lotomalie lasi ‵ki.”

Ne fai mai a Atsuko, se tuagane telā ko 30 tupu ana tausaga mai Tiapani penei: “I aso mua, ne manako sale au ke na oko fakavave mai Amaketo. Kae mai tua o te fanatuga ki Turkey, e fakafetai au ki a Ieova me koi tumau eiloa tena kufaki. Kafai e kilo au ki fakatokaga a Ieova, e fai ei ke na gasolo aka eiloa toku fia fakapilipili atu ki a ia.”

Ne fai mai a Alisa, se tuagane mai Lusia telā ko 30 tupu ana tausaga: “A te kau atu ki te vaegā taviniga tenei ki a Ieova, ne fesoasoani mai ke mafai ne au o ‵tofo ki te ‵lei o Ieova. (Sala. 34:8) Ne seki fai fua a Ieova mo fai toku Tamana kae ne fai foki mo fai toku taugasoa pili, telā ko iloa ‵lei ne au i so se fakanofonofoga kese‵kese. Ne ‵fonu toku olaga i taimi ‵gali, tala fakafiafia, mo fakamanuiaga ‵gali!”

“ONOONO ATU KI FATOAGA”

E auala i te galuega fakapito i Turkey, ne oko atu ei te tala ‵lei ki tino e tokouke. Kae koi uke eiloa a koga talai e seki oko ki ei. I aso takitasi, e fetaui faeloa a tino ga‵lue kolā ne olo ki Turkey mo tino kolā e seki lagona aka eiloa ne latou se mea e uiga ki a Ieova. E mata, e fia tavini atu koe i vaegā koga penā? Kafai e penā koe, e fakamalosi atu eiloa matou: “Kilo aka ki luga kae onoono atu ki fatoaga, me ko ‵kena aka eiloa i fuataga e ‵tau o tau.” (Ioa. 4:35) E mata, e mafai o fesoasoani atu koe i feitu o te lalolagi kolā ko “‵kena aka eiloa i fuataga e ‵tau o tau”? Kafai e mafai, ke na kamata koe o gasue ke fakataunu tou fakamoemoega tenā. E tasi te mea mautinoa: Kafai e fakalasi ne koe tau galuega ke fakasalalau atu te tala ‵lei “ki toe koga ‵mao i te lalolagi,” ka maua eiloa ne koe a fakamanuiaga e uke kolā e se mafai o fakatusa ki se mea!—Galu. 1:8.