Ati Aka te Atafai ki “Vaegā Tino Katoa”

I TE taimi ne akoako ei ne Iesu ana soko ke iloa o talai atu te tala ‵lei, ne iloa ‵lei ne ia me e se talia faeloa ne tino a te fekau o te Malo. (Luka 10:3, 5, 6) I te ‵tou galuega talai, e mafai o fakafesagai atu tatou ki nisi tino kolā e tali kaitāua mai ki a tatou io me pati ma‵sei mai. Se mea tonu me e mafai ne vaegā tali penā o fai ke faigata o fakatumau a te fakaasi atu ne tatou te uiga atafai ki tino kolā e talai tatou ki ei.

A te tino atafai e lavea ne ia a manakoga mo fakalavelave o nisi tino, e alofa ki a latou, kae manako o fesoasoani atu. Kae kafai ko kamata o seai se atafai o tatou ki tino kolā e fetaui mo tatou i te galuega talai, ka se magoi io me galo atu te ‵tou loto finafinau ki te galuega talai. I te suā feitu, kafai e ati aka ne tatou a te atafai, e fai eiloa e pelā me fakaopoopo atu ne tatou te ea ko te okiseni ki se afi—e fakatumau ne tatou a te ‵tou loto finafinau ki te galuega talai ke tumau i te ‵ka kae maina atu pelā me se afi!—1 Tesa. 5:19.

E mafai pefea o ati aka ne tatou a te uiga atafai e tiga eiloa e faigata ke fai penā? Ke onoono nei tatou ki fakaakoakoga tāua e tolu kolā e ‵tau o fakaakoako tatou ki ei—te fakaakoakoga o Ieova, Iesu mo te apositolo ko Paulo.

FAKAAKOAKO KI TE ATAFAI O IEOVA

I se fia afe o tausaga, ne kufaki eiloa a Ieova i fakamaseiga telā ne fai ki tena igoa. Kae e tumau eiloa a ia i te “atafai ki tino sē loto fakafetai mo tino ma‵sei.” (Luka 6:35) E lavea atu a tena atafai mai tena kufaki. E manako a Ieova ke faka‵sao a “vaegā tino katoa.” (1 Timo. 2:3, 4) E tiga eiloa e takalialia te Atua ki tino amio ma‵sei, kae e kilo atu a ia ki tino e pelā me tāua kae e se manako a ia ke galo atu se ola o so se tino.—2 Pe. 3:9.

E malamalama a Ieova i te magoi o taumafaiga a Satani ke fakapouli ne ia a mata o tino sē tali‵tonu. (2 Koli. 4:3, 4) E tokouke a tino ne akoako atu ki talitonuga mo kilokiloga ‵se talu mai te lotou fo‵likiga, ko ala ei o faigata ki a latou o talia te munatonu. E manako malosi a Ieova o fesoasoani atu ki vaegā tino penā. E fakamaoni pefea ne tatou a te mea tenā?

Mafaufau la ki te kilokiloga a Ieova e uiga ki tino Nineva. E tiga eiloa olotou amioga fakasaua, kae ne fai atu a Ieova ki a Iona, penei: “E mata, e se ‵tau foki mo au o alofa ki Nineva te fakai lasi, telā e sili atu mo te toko 120,000 tāgata i ei kolā e se iloa ne latou te mea tonu mai te mea ‵se?” (Iona 4:11) Ne kilo atu a Ieova ki tino Nineva e pelā me e ma‵tiva faka-te-agaga, kae ona ko tena alofa fakamagalo, ne fakatonu atu ei ne ia a Iona ke fakailoa atu ki a latou ke sala‵mo.

E pelā mo Ieova, e ‵kilo atu tatou ki tino e pelā me tāua ‵ki. E mafai o fakaakoako atu tatou ki a Ieova mai te loto finafinau o taumafai ke fesoasoani atu ki so se tino telā mafai o fakalogologo mai, faitalia loa me e foliga sē fia‵fia mai.

FAKAAKOAKO KI TE ATAFAI O IESU

E pelā mo tena Tamana, ne alofa malosi a Iesu ki tino kolā ne ma‵tiva faka-te-agaga. “I te laveaga ne ia o te vaitino, ne alofa malosi a ia ki a latou me ko pa‵ka kae tuku tiaki latou e pelā me ne mamoe e seai se lotou tino tausi.” (Mata. 9:36) Ne ‵mao te kilo a Iesu; ne iloa ne ia me i a latou kolā ne au‵mai o fakalogo‵logo ki a ia ne tauloto ki akoakoga ‵se kae ne fai fakamasei ne olotou takitaki lotu. E tiga eiloa ne iloa ne ia me ka talia ne tino e tokouke a fakalavelave kese‵kese ke taofi aka latou mai te ‵saga tonu atu, ne tumau eiloa a Iesu i te “akoako atu ne ia a mea e uke.”—Male. 4:1-9.

Kafai e se fia‵fia mai a tino ki te ‵tou fekau, e ‵tau o fai ke ‵mao ‵tou kilo kae ‵sili ifo ki a tatou eiloa e uiga ki te pogai e fai ei latou penā. E mafai o maua ne nisi se kilokiloga sē ‵lei e uiga ki te Tusi Tapu io me ko Lotu Kelisiano ona ko fakaakoakoga sē ‵lei a tino kolā e fai mai i a latou ne Kelisiano. Kāti ne lagona ne nisi tino a akoakoga ‵loi e uiga ki ‵tou talitonuga. Kae e mafai o fakafesagai atu a nisi tino ki fakatauemuga mai tino io me ko olotou kāiga māfai e talia ne latou a tatou.

A nisi tino kolā e fetaui mo tatou i te galuega talai e mafai o se fia‵fia mai ona ko tulaga fakafanoanoa kolā ne fe‵paki mo latou kae fakamasei i ei latou i mea tau lagonaga. Ne fai mai te misionale e igoa ki a Kim: “I se kogā koga talai e tasi a matou, ne ‵nofo atu i ei a tino kolā ne pokotia i taua kae ‵galo atu olotou kope katoa. E seai ne olotou fakamoemoega ‵tonu mō aso mai mua. Ne loto mafatia kae ko se tali‵tonu ki tino. I te koga talai tenei, ne kufaki faeloa matou i tino kolā ne ‵teke mai ki te motou fekau. I se taimi e tasi, ne ta eiloa au i te taimi ne talai atu ei au.”

Ne fakatumau pefea ne Kim tena uiga atafai e tiga loa a faifaiga sē ‵lei konā? E fai mai a ia: “Kafai ne fai fakamasei au, e taumafai eiloa au ke masaua a pati i te Faataoto 19:11, telā e fai mai: ‘A te ‵loto o te malamalama o se tagata e fakatuai ei tena kaitaua.’ A te masaua ne au o fakanofonofoga o tino i te motou koga talai ne fesoasoani mai eiloa ke ati aka ne au te uiga atafai ki a latou. Kae e se ko tino katoa e fetaui mo matou e uiga kaitāua. I te koga talai tenā, ne māua ne matou a nisi toe asiga ‵gali i ei.”

E mafai o ‵sili ifo tatou penei, ‘I te auala fea e saga atu ei au ki te fekau o te Malo māfai e tu atu au i te tulaga o latou kolā e talai tatou ki ei?’ E pelā me se fakaakoakoga, e a māfai ne lagona ne tatou a akoakoga ‵loi e uiga ki Molimau a Ieova? I vaegā tulaga penā, kāti e mafai o se fia‵fia tatou kae ma‵nako ke fakaasi mai ne tino a te uiga atafai. Kafai e masaua ne tatou a te fakatonuga a Iesu ke fai a mea kolā e ma‵nako tatou ke fai mai ne tino ki a tatou, ko fakamalosigina ei tatou ke ‵saga atu mo te loto a‵lofa faitalia eiloa me e faigata ke fai penā.—Mata. 7:12.

FAKAAKOAKO KI TE ATAFAI O PAULO

Ne fakaasi atu ne te apositolo ko Paulo a te atafai ki tino e penā foki ki tino ‵teke fakasaua. Kaia? Ne seki puli i a ia tena olaga mua. Ne fai mai a ia: “E tiga eiloa au se tino ne muna masei, ne uiga fakasaua kae fia sili i aso mua. Kae ne fakaasi mai ki a au te alofa fakamagalo me ne fai ne au a mea konā i toku valea mo te seai o se fakatuanaki.” (1 Timo. 1:13) Ne iloa ‵lei ne ia me ne fakaasi atu ne Ieova mo Iesu a te lasi o te alofa fakamagalo. Tela la, ne mafai o lavea ne ia tena olaga mua i nisi tino kolā ne talai a ia ki ei.

I nisi taimi, ne fakafesagai atu foki a Paulo ki tino kolā ko leva ne ‵mau olotou aka e uiga ki akoakoga ‵se. Ne saga atu pefea a ia ki ei? E lipoti mai te Galuega 17:16 me koi faka‵tali a Paulo i Atenai, kae “ne ‵mae tena loto i te kilo atu me ko ‵fonu a te fakai i tupua.” Kae e ui i ei, ne fakaaoga ne Paulo a te mataupu telā ne fakamāfua aka ei tena kaitaua ke tuku atu ki a latou se molimau ‵lei. (Galu. 17:22, 23) Ne fakafetaui aka ne ia te auala ne talai ei a ia ki fakanofonofoga o vaegā tino kese‵kese ko te mea ke “mafai o faka‵sao ne [ia] a nisi o latou i so se auala.”—1 Koli. 9:20-23.

E mafai o fakaakoako tatou ki a Paulo mai te iloa ‵lei ne tatou a kilokiloga sē ‵lei mo talitonuga ‵se kolā e fakafesagai mo tatou kae ke apo i te fakamatala atu o te “tala ‵lei o se mea tai ‵lei atu.” (Isa. 52:7) Ne fai mai se tuagane e igoa ki a Dorothy: “I te motou koga talai, e tokouke a tino ne tauloto ne latou me i te Atua e saua kae uiga fapito. Ne fakamālō atu au ki vaegā tino penā mō te tali‵tonu malosi o latou ki te Atua, kae oti aka ko taumafai ei au o fai ke ‵saga tonu latou ki pati a te Tusi Tapu e uiga ki uiga alofa o Ieova mo ana folafolaga mō aso mai mua.”

“KE FAKATAKAVALE FAELOA A TE MASEI KI TE ‵LEI”

Ona ko te pilipili atu o tatou ki “aso fakaoti,” e mafai o fakamoe‵moe tatou me i uiga o nisi tino kolā e talai tatou ki ei “ka gasolo aka mai te masei o na ma‵sei atu.” (2 Timo. 3:1, 13) Kae e se ‵tau o talia ne tatou te tulaga masei tenei ke ave kea‵tea ne ia ‵tou uiga atafai io me fai ne ia ke galo atu ‵tou fia‵fia. E mafai o tuku mai ne Ieova ki a tatou te malosi ke “fakatakavale faeloa a te masei ki te ‵lei.” (Loma 12:21) Ne fai mai se paenia e igoa ki a Jessica, penei: “Ne fakafesagai faeloa atu au ki tino kolā e se lava te loto maulalo kae manatu mā‵ma ki a tatou mo te ‵tou fekau. E mafai o fakakaitaua te mea tenei. Kafai e kamata ne au se sau‵talaga, e ‵talo lēmū atu au ki a Ieova kae akai atu mō tena fesoasoani ke maua ne au tena kilokiloga e uiga ki te tino. E fai ne te mea tenei ke sē saga au ki oku lagonaga totino kae ke mafaufau fua au ki te auala ke fesoasoani atu ki te tino tenā.”

E ‵tau foki o mafau‵fau tatou ki te auala ke fakamalosi aka ‵tou taina kolā e ga‵lue tasi tatou. E fai mai a Jessica: “Kafai e isi se tala sē ‵lei a se tokotasi o matou, e taumafai au ke sē faipati e uiga ki ei. I lō te fai penā, e ‵fuli ne au te sau‵talaga ki mataupu aoga, e pelā mo ikuga ‵gali kolā e maua mai te ‵tou galuega talai faitalia a te sē fia‵fia o nisi tino ki ei.”

E iloa ‵lei ne Ieova a mea faiga‵ta e fakafesagai mo tatou i te galuega talai. Se mea fakafiafia ki a ia māfai e fakaakoako atu tatou ki tena alofa fakamagalo! (Luka 6:36) E tonu, ka sē tumau i te fakaasi atu ne Ieova a tena uiga atafai. E loto tali‵tonu tatou me e iloa ne ia te taimi tonu ke fakaseai atu ei a te olaga masei tenei. Ke oko atu ki te taimi tenā, e ‵tau o fai fakavave a te ‵tou galuega talai. (2 Timo. 4:2) Ke na tumau eiloa tatou i te faiga o te ‵tou galuega mo te loto finafinau mo te alofa atafai ki “vaegā tino katoa.”