E Mafai Pefea O Maua Ne Koe Se Olaga Tai ‵Lei Atu I Te Olaga Tenei?

A TE auala e ola i ei a tino i aso nei e ‵kese mo te mea ne manako ki ei te Atua. Ne ‵tau o ‵fonu te lalolagi i tino kolā e āva ki te pulega sili a te Atua, maua mea aoga mai tena takitakiga, kae fakaasi mai ne latou a tena uiga ko te alofa. Ne manako te Atua ke fia‵fia latou i te taimi e ‵kau fakatasi ei latou o puti aka olotou kāiga, tauloto ki mea ‵fou, kae fai te lalolagi kātoa mo fai se palataiso.

E TAUTO MAI TE ATUA ME KA ‵FULI TE OLAGA I TE LALOLAGI PELĀ EILOA MO TE AUALA NE MANAKO A IA KI EI

• “E aumai ne ia te gataga ki taua i te lalolagi kātoa.”—Salamo 46:9.

• “Ne oko mai te taimi tonu . . . ke fakamasei a latou kolā e fakamasei ne latou te lalolagi.” —Fakaasiga 11:18.

• “Ka seai se tino e fai aka: ‘Au ko masaki.’”—Isaia 33:24.

• “Kae ko galuega e fai ne olotou lima ka fia‵fia ki ei oku tino filifilia.” —Isaia 65:22.

Ka fakataunu pefea a valoaga konei? Ne ‵tofi aka ne te Atua a tena Tama, ko Iesu, ke fai mo Tupu i te malo ‵lei katoatoa telā ka pule mai i te lagi ki luga i te lalolagi nei. E taku ne te Tusi Tapu ki te Malo o te Atua. (Tanielu 2:44) E fai mai te Tusi Tapu e uiga ki a Iesu, penei: “Ka tuku atu ne Ieova te Atua ki a ia te nofogaaliki . . . . kae ka pule a ia e pelā me se Tupu.”—Luka 1:32, 33.

I tena nofoga i te lalolagi, ne fai ne Iesu a galuega ‵mana e uke ke fakaasi atu ei me e pelā me se Pule, ka faka‵lei aka ne ia a te olaga o tino ki se tulaga tai ‵lei atu i lō te taimi nei.

NE FAKAASI MAI NE IESU A MEA ‵LEI KA FAI NE IA MŌ TINO FAKA‵LOGO KATOA

• A te faka‵leiga ne ia a vaegā masaki katoa, se fakaasiga me ka fakaseai ne ia a masaki katoa o tino.—Mataio 9:35.

• A te fakamalūga ne ia te tai, e fakaasi mai i ei te auala ka puipui ne ia a tino mai te pule faka‵lei atu ki te ma‵losi o mea o te natula.—Maleko 4:36-39.

• Ne fagai ne ia te fia afe, se fakaasiga me ka tuku atu ne ia ki tino a mea mo tausi latou i te olaga.—Maleko 6:41-44.

• Ne ‵fuli ne ia a vai ki uaina i se avaga, fakamaoni mai ei me ka fesoasoani atu a ia ki tino ke fia‵fia i te olaga. —Ioane 2:7-11.

E mafai pefea o maua ne koe te vaegā olaga telā e fakatoka ne te Atua mō latou kolā e alofa a ia ki ei? E isi se “auala” e ‵tau o sasale koe i ei. E fakamatala mai i te Tusi Tapu a te mea tenā e pelā me ko “te auala telā e tau atu ki te ola, kae e mu‵tana fua a tino e maua ne latou.”—Mataio 7:14.

‵SALA TE AUALA KI SE OLAGA TAI ‵LEI ATU

Se a te auala ki te ola? E fai mai te Atua: “Au, Ieova, ko tou Atua, ko te Atua telā e akoako ne ia koe ke ‵lei koe, ko te Atua telā e takitaki ne ia koe ki te auala e ‵tau o sasale ei koe.” (Isaia 48:17) A te sasale atu i te auala tenei ko te ‵toe auala ‵lei eiloa i te olaga.

Ne fai mai a Iesu: “Au ko te auala mo te munatonu mo te ola.” (Ioane 14:6) Ko te tali‵tonu ki muna‵tonu kolā ne akoako mai ne Iesu mo te tau‵tali i te fakaakoakoga ne tuku mai ne ia, ko mafai ei o fakapili‵pili malosi atu tatou ki te Atua kae maua a mea aoga mai i ei.

E mafai pefea o maua ne koe a te auala ki te ola? E uke a talitonuga, kae ne fakailoa mai a Iesu, penei: “E se ko tino katoa kolā e fai mai ki a au, ‘Te Aliki, te Aliki,’ ka ulu ki loto i te Malo o te lagi, kae ko ia fua telā e fai ne ia te loto o toku Tamana telā i te lagi.” (Mataio 7:21) Ne fai mai foki a ia: “Ka matea ne koutou a latou i olotou fuataga.” (Mataio 7:16) E mafai o fesoasoani atu te Tusi Tapu ke lavea ne koe a te tapuakiga tonu kae ke faka‵kese ne koe mai tapuakiga ‵se.—Ioane 17:17.

E mafai pefea o sasale atu koe i te auala ki te ola? E aofia i te mea tenei a te iloa ‵lei ne koe a te Mafuaga o te ola: Ko oi a ia? Ko oi tena igoa? A ia se vaegā tino pefea? Ne a ana mea e fai? Se a te mea e manako a ia ke fai ne tatou?a

E manako te Atua ke fai ne tino a mea e uke atu i lō fua te ga‵lue, ‵kai, ta‵fao kae puti aka a kāiga. E mafai o iloa ‵lei ne tatou a te ‵tou Mafuaga kae fai pelā me ne taugasoa o ia. E mafai o fakaasi atu ne tatou a te alofa ki a ia mai te faiga o tena loto. Ne fai mai a Iesu: “Tenei te uiga o te ola se-gata-mai, ke iloa tonu ne latou a koe, ko te Atua tonu e tokotasi.”—Ioane 17:3.

KE GA‵SUE MUAMUA TATOU O FAI A ‵FULIGA

Ke tauloto ke fakafiafia atu te Atua tonu e tokotasi, e manakogina ke fai ne tatou a nāi ‵fuliga. E mafai eiloa o tai faigata te mea tenā. Kae ko te ‵tonuga loa, se malaga fakafiafia māfai ko kamata o sa‵sale atu tatou i te auala ki te ola. Ke fesoasoani atu ke maua ne koe a tali ki fesili tāua e uiga ki te Atua, e ofo ne Molimau a Ieova se akoga faka-te-Tusi Tapu sē ‵togi i se taimi mo se koga telā e ‵lei ki a koe. E mafai o fesokotaki mai koe ki a matou mai te fakaaoga te motou fakatuatusi ko te www.pr2711.com.