‵Talo Kae Mafaufau ‵Loto ​—e Aoga mō Tino Talai Loto Finafinau

1. Se a te mea ne fesoasoani atu ki a Iesu ke saga tonu atu ki tena galuega tāua?

¹ Ne fakaaoga ne Iesu a te afiafi ke faka‵lei aka ei a tino ma‵saki kae ‵tuli kea‵tea a temoni. I te taimi ne maua ei a ia ne ana soko i te suā aso, ne fai atu latou: “A tino katoa konei e ‵sala atu ki a koe,” ne fakamalosi atu ke fakatumau a te faiga o ana galuega ‵mana. Kae ne saga atu eiloa a Iesu ki te galuega telā e fakamuamua ne ia ko te talaiatuga o te tala ‵lei. Ne tali atu a ia: “E ‵tau mo tatou o olo atu ki nisi fa‵kai konā e pili mai, me ‵tau mo au o folafola atu te Tala ‵Lei ki a latou, me tenā te mea ne vau ei au.” Se a te mea ne fesoasoani atu ki a Iesu ke tumau i te faiga o tena galuega? Ne alausu a ia ke ‵talo kae ke mafaufau ‵loto. (Male. 1:32-39) E fesoasoani mai pefea a te ‵talo kae mafaufau ‵loto ke fai tatou e pelā me ne tino talai loto finafinau?

2. Ne mea e ‵tau o mafaufau ‵loto faeloa tatou ki ei ko te mea ke fakatumau ne tatou te ‵tou loto finafinau mō te galuega talai?

² Ne a Mea ke Mafaufau ‵Loto ki ei? Ne lavea ne Iesu a tino ko “pelā me ne mamoe kolā e seai se lotou tino tausi.” (Mata. 9:36) I se auala tai ‵pau, e mafai o mafaufau ‵loto tatou ki te ma‵nako malosi o tino ki te tala ‵lei. E ‵tau o mafaufau ‵loto tatou ki te tāua o te taimi koi ‵toe nei. (1  Koli. 7:29) E mafai o mafaufau ‵loto tatou ki galuega a Ieova mo ana uiga, ‵tou tauliaga ke fai pelā me ne Molimau a Ieova, mo koloa tāua faka-te-agaga kolā ne tauloto ne tatou mai te Muna a te Atua kae seki iloa eiloa ne tino i ‵tou koga talai.​—Sala. 77:11-13; Isa. 43:10-12; Mata. 13:52.

3. I te taimi fea e tau ei o mafaufau ‵loto tatou?

³ Ko te Taimi Fea ke Mafaufau ‵Loto ei? E pelā mo te mea ne fai ne Iesu, a nisi tino e alausu i taimi kolā e sē logoa. E ‵gali ki nisi tino ke mafaufau ‵loto i te afiafi a koi tuai o olo o ‵moe. (Kene. 24:63) Faitalia eiloa a te uke o ‵tou mea e fai, e mafai eiloa o maua ne tatou a taimi ke mafaufau ‵loto. A nisi tino e fai penā i te taimi e faima‵laga atu ei latou i mea fakatele‵tele. A ko nisi tino e fakaaoga ne latou a olotou taimi ma‵nava i tutonu ke mafaufau ‵loto. A te tokoukega o tino e mafaufau ‵loto muamua a koi tuai o fai‵pati atu i te galuega talai, ke oko foki loa ki se taimi toetoe, kae fesoasoani atu a te mea tenā ke talai atu mo te lasi o te loto finafinau mo te loto toa.

4. Kaia e tau ei o mafaufau ‵loto tatou?

⁴ A te ‵talo kae mafaufau ‵loto ka fakalasi aka ei a te manakoga ke tavini atu ki a Ieova, e fesoasoani mai ke ‵kilo atu ki te ‵tou tapuakiga e pelā me ko te ‵toe mea tāua i ‵tou olaga, kae fakamalosi aka ei ‵tou fakaikuga ke tumau i te talai atu. Ne maua ne te Faifeau Sili a te Atua, ko Iesu a mea aoga mai te mafaufau ‵loto, kae ka fai foki tatou penā.