“Ke . . . Maina Atu te Otou Mainaga”

1. Se a te tauliaga e maua ne tatou ke fakaasi atu ki nisi tino?

¹ Mai i te vaveao ke oko ki te ‵tōga o te mata o te la, e tuku atu eiloa ne te gali o te mainaga telā e lavea atu, a tavaega ki a Ieova te Atua. Kae ko te suā vaegā mainaga telā ne ‵kami ne Iesu ana soko ke maua ne latou—ko “te mainaga o te ola.” (Ioane 8:12) A te mauaga o te mainaga faka-te-agaga tenei se tauliaga fakapito telā e aofia i ei a tiute ‵mafa. Ne fakatonu atu a Iesu: “Ke penā o maina atu te otou mainaga ki mua o tino,” ko te mea ke aoga ki nisi tino. (Mata. 5:16) Faitalia a te pouliga lasi i te feitu faka-te-agaga i aso nei, e ‵tau o fakaasi atu a te mainaga, kae ko sili atu eiloa te manakogina o te mea tenā i lō aso mua! E mafai pefea o maina atu ‵tou mainaga e pelā mo Keliso?

2. Ne fakaasi mai pefea ne Iesu a te tāua ke fakaasi atu a te mainaga faka-te-agaga?

² E Auala i te Talaiatuga: Ne fakaaoga ne Iesu ana taimi, malosi, mo kope ke fakamaina atu a te mainaga o te munatonu ki tino i olotou fale, i fa‵kai, i luga i mauga—i so se koga e mafai ei o maua atu latou. Ne iloa ne ia a te tumau o te aoga o te tuku atu o te mainaga tonu faka-te-agaga. (Ioane 12:46) Ko te mea ke oko atu ki tino e tokouke, ne fakatoka ne Iesu ana soko ke fai mo fai “te mainaga o te lalolagi.” (Mata. 5:14) E maina atu te lotou mainaga mai i te faiga o mea ‵lei ki olotou tuakoi mo te fakaasi atu o muna‵tonu faka-te-agaga.

3. E mafai pefea o fakaasi atu ne tatou a te loto fakafetai tonu ki te mainaga o te munatonu?

³ E fakatāua malosi ne tino o te Atua a te tiute ke fai pelā me ne tamaliki kolā e “‵nofo i te . . . mainaga,” kae e talai atu latou i so se koga e mafai ei o maua ne latou a tino. (Efe. 5:8) A te faitau fua ki te Tusi Tapu mo nisi tusi faka-Kelisiano i mua o tino i taimi malō‵lo i se galuega ‵togi io me ko te akoga e mafai foki o ‵tala atu ei a te auala ke sau‵tala ki se mataupu faka-te-Tusi Tapu. I te auala tenei, ne kamata ei ne se tuagane talavou se akoga faka-te-Tusi Tapu kae tufa atu ne ia a tusi ki tamaliki e toko 12 o tena vasega!

4. Kaia e aofia ei a amioga ‵lei i ‘te fakamaina atu o ‵tou mainaga’?

⁴ E Auala i Galuega ‵Lei: A te fakamaina atu o ‵tou mainaga e aofia i ei a ‵tou amioga i aso katoa. (Efe. 5:9) I te galuega ‵togi, i te akoga, mo nisi koga kolā e tokouke a tino i ei, e tu ‵kese eiloa a amioga faka-Kelisiano kae e maua i ei a avanoaga ke fakaasi atu a muna‵tonu i te Tusi Tapu. (1 Pe. 2:12) E pelā mo amioga ‵lei a se tamaliki tagata ko 5 ana tausaga ne fakaosofia ei tena faiakoga ke telefoni atu ki ana mātua. Ana muna, “E seai aka foki eiloa se tamaliki ne lavea ne au e manako malosi o fai te mea tonu!” E tonu, e fai ne te ‵tou galuega talai mo amioga ‵lei ke tosina mai a tino ki “te mainaga o te ola” kae avatu ei a tavaega ki te ‵tou Atua.