‵Tou Mekesini—Ne Fakatoka ke Fia‵fia ki ei a Tino Kese‵kese e Tokouke
1. E fakaakoako atu pefea a te tavini fakamaoni kae poto ki te apositolo ko Paulo?
1 E pelā eiloa mo te fakafetaui aka ne te apositolo ko Paulo a te auala ne fakamatala atu ei ne ia a te tala ‵lei ko te mea ke maua ne ia a ‘tino kese‵kese e tokouke,’ e fakaaoga foki ne te tavini fakamaoni kae poto a ‵tou mekesini ke fakaoko atu ei te tala ‵lei ki tino kolā e kese‵kese olotou telega mo talitonuga. (1 Koli. 9:22, 23) Ko te mea ke fakaaoga faka‵lei ne tatou a Te Faleleoleo Maluga mo te Awake! e ‵tau o masaua ne tatou a tino kolā e aoga ki ei a mekesini konei.
2. Ko oi a vaegā tino ne fakatoka ki ei a te Awake! ko te mea ke fia‵fia malosi latou ki ei?
2 Awake!: E fakatoka eiloa a te mekesini tenei ke oko atu ki vaegā tino kese‵kese kolā ne faipati ki ei a te apositolo ko Paulo i te taimi ne fai atu ei a ia penei, “tino Atenai.” (Galu. 17:22) A tagata konā e seki ‵tupu aka e pelā me ne Kelisiano, kae ne mu‵tana fua olotou mea e iloa i te Tusi Tapu. E penā foki loa, a tino kolā ne fakatoka ki ei a te Awake! e mu‵tana fua io me e seai eiloa se lotou malamalama i te Tusi Tapu. Kāti e seai se lotou mea e iloa e uiga ki akoakoga faka-Kelisiano, kāti e seai se lotou loto tali‵tonu ki lotu, io me kāti e se iloa ne latou me e isi ne mea aoga i te Tusi Tapu. A te fakamoemoega tāua o te Awake! ko te fakatalitonu atu ki ana tino fai‵tau me e ola eiloa a te Atua tonu. A te fakamoemoega foki o te mekesini tenei ko te ati aka o te fakatuanaki ki te Tusi Tapu mo te fesoasoani ki te tino faitau ke malamalama me e ‵kese eiloa a Molimau a Ieova mai i nisi potukau fakalotu.
3. Ko oi ne fakatoka fakapito ki ei a lomiga takitasi o Te Faleleoleo Maluga?
3 Te Faleleoleo Maluga: A tino kolā ne fakatoka ki ei a te mekesini tenei e isi eiloa se lotou tamā āva ki te Atua mo te Tusi Tapu. E isi se lotou iloa i te Tusi Tapu kae e se malamalama tonu latou i ana akoakoga. E tai ‵pau latou mo te kau fakalogo‵logo kolā ne fakasino atu ki ei a Paulo e pelā me ne “tino kolā e ma‵taku ki te Atua.” (Galu. 13:14-16) Ne fakatoka eiloa a mataupu mō sukesukega i Te Faleleoleo Maluga maise eiloa mō Molimau a Ieova. Ne iloa ne Paulo me i tino kolā e fai‵tau ki ana tusi ne masani ‵lei mo te Tusi Tapu kae ne malamalama tonu foki latou i te munatonu. (1 Koli. 1:1, 2) E penā foki mo mataupu kolā e suke‵suke ki ei, ne fakatoka mō latou kolā ko ‵kau mai ki ‵tou fakatasiga kae e masani ‵lei mo tugapati mo mafaufauga faka-Molimau.
4. Kaia e ‵tau ei o masani ‵lei tatou ki lomiga takitasi o mekesini kolā e fakaaoga ne tatou i te galuega talai?
4 E tiga eiloa e masani o ofo fakatasi atu ne tatou a mekesini konā, e fakamatala sāle atu fua ne tatou se mekesini e tasi i ‵tou pati fakatomua. Tela la, ke na taumafai koe o fakamasani faka‵lei atu ki lomiga takitasi konā. Ko mafai ei ne koe o fakaaoga so se mataupu telā ka fia‵fia ki ei a tino kolā e fetaui mo koe.