Ke se Fakatalave Tou Talai Atu
1. Se a te mea e manakogina i ei a te loto malosi, kae kaia?
1 Kai fakatalave aka eiloa koe i te talai atu i te akoga ona ko tou mataku i a koe ma fakatauemugina? E manakogina eiloa a te loto malosi ke faipati atu, maise eiloa māfai koe se tino mata mā. Ne a mea ka fesoasoani atu ki a koe?
2. E aofia pefea a faka‵tauga ‵lei i te taimi e talai atu ei i te akoga?
2 Ke Fakaaoga a Faka‵tauga ‵Lei: E tiga eiloa e mafai o ‵kilo atu ki akoga i se auala ‵lei e pelā me ko tou koga talai totino, masaua me e se manakogina ke kamata ne koe a sau‵talaga faka-te-agaga mo tino katoa e pelā mo mea e fai ne koe i te taimi e talai atu ei mai fale ki fale. Ke fakaaoga a faka‵tauga ‵lei ke fakaiku aka a te taimi ke faipati atu. (Fai. 3:1, 7) E mafai o maua ne koe se avanoaga ke fakaasi atu ou talitonuga i te taimi e fai ei a te mataupu ko te group discussion [sau‵talaga i potukau] io me se assignment [tusiga o se tala] i te akoga. Io me kāti e fesili atu se tamaliki e a‵koga tasi koulua e uiga ki te pogai e se kau atu ei koe ki nisi polokalame. Ko oti eiloa ne fakailoa atu ne nisi Kelisiano ki olotou faiakoga i te kamataga o te tausaga me i a latou ne Molimau a Ieova kae e tuku atu foki ki faiakoga a tusi kolā e fakamatala atu ei ‵tou talitonuga. Ko oti ne tuku atu ne nisi tamaliki a tusi i luga i olotou taipola ko te mea ke fakamalosi atu ki tamaliki a‵koga ke fesili atu.
3. Ne a fakatokaga e mafai o fai ke toka ei koe o talai atu i te akoga?
3 Ke Toka Koe: Kafai e fakatoka faka‵lei koe, ka momea aka tou loto talitonu. (1 Pe. 3:15) Tela la, taumafai ke fakatoka ki fesili kolā e mafai o ‵sae aka, kae mafaufau ki te auala e mafai o tali atu ei koe. (Faata. 15:28) Kafai e ‵lei, ke tuku atu i te akoga sau Tusi Tapu mo nai tusi, e pelā mo te Reasoning, Young People Ask, mo nisi tusi e uiga ki te faitega-o-mea, ko te mea ke mafai o fakaaoga ne koe i taimi e manakogina i ei. Fesili atu ki ou mātua ke mafai o aofia i te otou Tapuakiga a Kāiga i te Afiafi a te faiga o fakaakoakoga ko te mea ke toka ‵lei ei koe.
4. Kaia e ‵tau ei o tumau koe i te talai atu i te akoga?
4 Ke Maua se Kilokiloga Aoga: Ke mo a ma mafaufau me ka fakatauemu faeloa koe ne ou taugasoa i te akoga māfai ko taku atu ne koe te munatonu. Kāti ka fia‵fia a nisi tamaliki ki tou loto malosi kae e mafai foki o fia fakalogo‵logo latou. Kae ke mo a ma loto vāivāi koe māfai e seai se tino e saga atu. Ka fiafia faeloa a Ieova me ne taumafai eiloa koe. (Epe. 13:15, 16) Ke tumau i te akai atu ki a ia ko te mea ke fesoasoani atu i te faiga ke ‘faipati atu ne koe tena muna mo te loto toa.’ (Galu. 4:29; 2 Timo. 1:7, 8) Mafaufau la ki te fiafia ka maua ne koe māfai ko fakalogologo mai se tino. E mafai foki eiloa o fai a te tino tenā mo fai se tavini e tokotasi a Ieova!