E a, e Fakaoti Eiloa Ou Mafi ke Tauloto Mai i a Ieova?

1. E pefea a lagonaga o Ieova e uiga ki akoakoga?

¹ A Ieova, ‘te Tino telā e akoako ne ia tatou,’ e manako ke a‵koga faka‵lei tatou. (Isa. 30:20) Ne kamata eiloa a Ia o akoako atu i te otiga ne faite ne ia tena Tama toekimua. (Ioa. 8:28) Mai tua o te ‵tekeatuga o Atamu, ne seki fakagata ne Ieova tena akoako atu, kae ne tuku mai ne ia mo te alofa a fakatonutonuga ki tino sē ‵lei katoatoa.—Isa. 48:17, 18; 2 Timo. 3:14, 15.

2. Se a te akoakoga fakapito ko fai nei?

² I aso nei, e takitaki eiloa ne Ieova te ‵toe akoakoga maluga i tala fakasolopito katoa. E pelā mo te mea ne ‵valo mai ne Isaia, e lau i miliona o tino i te lalolagi kātoa e ua‵lolo atu ki te “mauga [fakatusa] o te Aliki,” ko Ieova. (Isa. 2:2) Kaia e ‵tau ei o ua‵lolo atu ki konā? Ke akoako latou ki auala o te Atua, e tonu, ke akoako latou ne Ieova! (Isa. 2:3) I te tausaga faka-te-taviniga ko te 2010, ne fakamāumāu ne Molimau a Ieova a itula e silia atu i te 1.6 piliona i te talaiatuga mo te akoakoatuga ki nisi tino a muna‵tonu i te Tusi Tapu. E se gata i ei, e tuku atu eiloa i vaiaso takitasi a fakatonutonuga faka-te-agaga i fakapotopotoga e silia atu i te 105,000 i te lalolagi kātoa, kae e ‵lomi aka ne te tavini fakamaoni kae poto a tusi faka-Kelisiano i ‵gana e silia atu i te 500 mō fai a akoakoga.

3. Ne aoga pefea ki a koe a akoakoga kolā e tuku mai ne Ieova?

³ Ke Maua Katoatoa a Mea Aoga Mai i ei: Ko oti eiloa ne maua ne tatou a mea aoga i akoakoga mai i te Atua! Ko oti ne tauloto ne tatou me e isi se igoa o te Atua kae e atafai mai a ia ki a tatou. (Sala. 83:18; 1 Pe. 5:6, 7) Ko oti foki ne tauloto ne tatou a tali ki nisi o toe fesili tāua i te olaga: Kaia e logo‵mae kae ‵mate ei a tino? E mafai pefea o maua ne au a te fiafia tonu? Se a te aoga o te olaga? Ko oti foki ne tuku mai ne Ieova a fakatakitakiga i mea tau amioga kolā e fai ei ke ‘manuia tatou.’—Iosu. 1:8.

4. Ne a nisi akoakoga kolā e mafai o aoga ki tavini a te Atua, kae kaia e ‵tau ei o taumafai tatou o tauloto a mea katoa mai i a Ieova?

⁴ E se gata i ei, e fakatoka foki ne Ieova a akoakoga fakapito ke fesoasoani atu ki nisi o ana tavini ke uke atu olotou galuega e fai mō ia. E tuku mai i te itulau e 4-6 a te fakasologa o akoakoga kolā e avanoa ki nisi tino. Kafai e se mafai o ‵kau atu tatou ki akoakoga kolā e fakasolo mai i ei ona ko ‵tou fakanofonofoga, e mata, e fakaaoga katoatoa ne tatou a akoakoga mai i te Atua kolā e mafai o ‵kau ki ei? E mata, e fesoasoani atu tatou ki talavou, kolā e fakamalosi aka ne faiakoga mo nisi tino ke kausaki atu ki akoakoga ma‵luga a te lalolagi, ko te mea ke fai ne olotou fakamoemoega faka-te-agaga ke kausaki atu ki ei, ke maua ei ne latou a te ‵toe akoakoga maluga—ko te akoakoga mai i te Atua? A te tauloto malosi ki akoakoga mai i a Ieova ka fesoasoani mai ke maua ne tatou se olaga fiafia i aso nei mo te ola se-gata-mai i aso mai mua.—Sala. 119:105; Ioa. 17:3.

Nisi Akoakoga Kolā e Fakatoka ne te Fakapotopotoga a Ieova

Te Akoga ke Iloa o Faitau Kae Tusitusi

• Te Aoga: Ke akoako a tino ke iloa o fai‵tau kae tusitusi ko te mea ke mafai o fai olotou a‵koga faka-te-Tusi Tapu kae ke akoako atu foki ne latou a te munatonu ki nisi tino.

• Te Leva: E ‵tusa loa mo te manakoga o te tino.

• Te Koga: I te Kingdom Hall.

• Tino e Mafai o ‵Kau ki ei: Ko tino talai katoa mo tino fia‵fia.

• Te Auala ke Kau Atu ki ei: E fakatoka ne toeaina i te fakapotopotoga a vasega mō akoga penei e ‵tusa mo manakoga o te fakapotopotoga, kae e fakamalosi atu ki tino kolā e mafai o aoga ki a latou ke ‵kau atu ki ei.

Te Akoga mō Tino Talai

• Te Aoga: Ke akoako a tino talai ke fai latou mo tino talai mo faiakoga ma‵goi o te tala ‵lei.

• Te Leva: E fai faeloa.

• Te Koga: I te Kingdom Hall.

• Tino e Mafai o ‵Kau ki ei: Ko tino talai katoa. E mafai foki o ‵kau ki ei a nisi tino kolā ko ‵kau malosi mai ki te fakapotopotoga, kolā ko lotoma‵lie ki akoakoga i te Tusi Tapu, kae e fetaui ‵lei foki olotou olaga mo akoakoga fakavae i te Tusi Tapu.

• Te Auala ke Kau Atu ki ei: Ke faipati atu ki te ovasia o te Akoga mō Tino Talai.

Te Akoga mō ‵Gana Fakaatea

• Te Aoga: Ke akoako a tino talai ke mafai o talai atu a te tala ‵lei i te suā ‵gana.

• Te Leva: Fa io me e lima masina. E masani o fai sāle i taeao o Aso Ono i se itula e tasi io me lua.

• Te Koga: E masani o fai sāle i se Kingdom Hall telā e pili mai.

• Tino e Mafai o ‵Kau ki ei: Ko tino talai kolā e ‵lei olotou tulaga i te fakapotopotoga kae e ma‵nako ke talai atu i se ‵gana fakaatea.

• Te Auala ke Kau Atu ki ei: E fakatoka a akoga penā ne te ofisa lagolago e ‵tusa mo te mea e manakogina.

Te Fakatūtūga o Kingdom Hall

• Te Aoga: Ke faite kae faka‵fou a Kingdom Hall. A te mea tenei e sē se akoga, kae ko te fakatokaga tenei e fesoasoani atu ki tino ga‵lue fakavolenitia ke tauloto ki atamai kese‵kese ko te mea ke mafai o fesoasoani latou i galuega fakatū‵tu.

• Te Leva: E ‵tusa mo fakanofonofoga o te tino galue fakavolenitia.

• Te Koga: So se koga telā e tausi ne te Komiti Fakatūtū. E mafai o ‵kami atu a nisi volenitia ke fesoasoani atu i galuega fesoasoani i se koga ‵mao telā ne pokotia i fakalavelave ‵tupu.

• Tino e Mafai o ‵Kau ki ei: E ‵tau ne taina mo tuagane ko oti ne papatiso kae e ‵lei foki olotou tulaga i te fakapotopotoga. E mafai o isi ne olotou atamai io me e seai.

• Te Auala ke Kau Atu ki ei: Ke faka‵fonu a te pepa ko te Kingdom Hall Volunteer Worker Questionnaire (S-82) telā e mafai o maua mai i toeaina o te fakapotopotoga.

Te Akoga mō Paenia

• Te Aoga: Ke fesoasoani atu ki paenia ke ‘fakataunu olotou galuega totino.’—2 Timo. 4:5.

• Te Leva: Lua vaiaso.

• Te Koga: E fakaiku aka ne te ofisa lagolago; e masani o fai i se Kingdom Hall telā e pili mai.

• Tino e Mafai o ‵Kau ki ei: Ko latou kolā ko oti ne paenia tumau mō se tausaga e tasi.

• Te Auala ke Kau Atu ki ei: E ‵kau atu eiloa a paenia kolā ko fetaui ‵lei kae e fakailoa atu ki a latou ne te lotou ovasia o te fenua.

Te Akoga mō Tino ‵Fou ki te Peteli

• Te Aoga: E fakatoka a te akoga tenei ke fesoasoani atu ki tino ‵fou ke mafai o iku manuia te lotou taviniga i te Peteli.

• Te Leva: E tasi te itula i vaiaso takitasi mō vaiaso e sefuluono.

• Te Koga: I te Peteli.

• Tino e Mafai o ‵Kau ki ei: E ‵tau o fai mo fai ne tino ga‵lue tumau i te kāiga Peteli io me ne volenitia ga‵lue sē tumau mō se taimi leva (e tasi te tausaga io me e leva atu).

• Te Auala ke Kau Atu ki ei: A sui o te kāiga Peteli kolā e fetaui ‵lei e ‵tau eiloa o ‵kau atu ki ei.

Te Akoga mō Toeaina mo Tavini Fesoasoani

• Te Aoga: Ke fakamasani a toeaina mo tavini fesoasoani ki olotou tiute i te tausiga o te fakapotopotoga mo te faiga o fakatokaga. (Galu. 20:28) E fai a te akoga tenei i taki fia tausaga e ‵tusa eiloa mo te leva telā e fakaiku aka ne te Potukau Pule.

• Te Leva: I tausaga fakamuli nei, e masani o fai i se tasi mo te āfa aso mō toeaina kae e tasi te aso mō tavini fesoasoani.

• Te Koga: E masani o fai i se Kingdom Hall io me se Fale Fai Fono pili mai.

• Tino e Mafai o ‵Kau ki ei: E ‵tau fua o ‵kau ki ei a toeaina mo tavini fesoasoani.

• Te Auala ke Kau Atu ki ei: E ‵kami ne te ovasia o te fenua a toeaina mo tavini fesoasoani kolā ko fetaui ‵lei.

Te Akoga mō Toeainaa

• Te Aoga: Ke fesoasoani ki toeaina ke tausi faka‵lei ki olotou tiute i te fakapotopotoga.

• Te Leva: E lima aso.

• Te Koga: E fakaiku aka ne te ofisa lagolago; e masani o fai i se Kingdom Hall io me se Fale Fai Fono pili mai.

• Tino e Mafai o ‵Kau ki ei: Ko toeaina.

• Te Auala ke Kau Atu ki ei: E ‵kami eiloa a toeaina kolā e fetaui ‵lei ne te ofisa lagolago.

Te Akoga mō Ovasia Faima‵laga mo Olotou A‵vagab

• Te Aoga: Ke fesoasoani atu ki ovasia o te fenua mo ovasia o te atufenua ke momea aka te lotou ata‵mai i te tavini atu ki fakapotopotoga kae ke “ga‵lue malosi i te talai atu kae akoako atu” mo te tausiga o latou kolā e fai pelā me ne mamoe.—1 Timo. 5:17; 1 Pe. 5:2, 3.

• Te Leva: Lua masina.

• Te Koga: E fakaiku aka ne te ofisa lagolago.

• Tino e Mafai o ‵Kau ki ei: Ko ovasia o te fenua mo ovasia o te atufenua.

• Te Auala ke Kau Atu ki ei: E ‵kami ne te ofisa lagolago a ovasia faima‵laga kolā e fetaui ‵lei, mo olotou avaga.

Te Akoga Faka-te-Tusi Tapu mō Taina Takac

• Te Aoga: Ke fakatoka a toeaina mo tavini fesoasoani taka mō nisi tiute tai ‵lasi atu. A te ukega o latou kolā ne ‵kau atu ki ei ka ‵tofi aka ke tavini atu i se koga telā e manakogina malosi a te fesoasoani i olotou fenua eiloa. E mafai o ‵tofi aka a nai tino ke tavini atu i se isi fenua māfai e talia ne latou.

• Te Leva: Lua masina.

• Te Koga: E fakaiku aka ne te ofisa lagolago; e masani o fai i se Fale Fai Fono io me se Kingdom Hall.

• Tino e Mafai o ‵Kau ki ei: A taina taka kolā e nofo olotou tausaga i te va o te 23 mo te 62 kae e malosi ‵lei kae e fia tavini atu foki ki taina mo manakoga o te Malo i so se koga. (Male. 10:29, 30) Ko oti ne ‵tau o tavini atu latou e pelā me ne toeaina mo tavini fesoasoani mō se lua tausaga.

• Te Auala ke Kau Atu ki ei: Kafai e fai a te akoga tenei i fenua mai lalo o te otou ofisa lagolago, e fai eiloa se fono mō latou kolā e fia ‵kau ki ei i fono i te fenua. Ka tuku mai i te fono tenā a nisi fakamatalaga tai uke atu.

Te Akoga Faka-te-Tusi Tapu mō Tauavaga Kelisianod

• Te Aoga: Se akoakoga fakapito mō taki tauavaga ko te mea ke mafai o fakaaoga katoatoa latou ne Ieova mo tena fakapotopotoga. Ka ‵tofi aka a te tokoukega o latou ke tavini atu i koga kolā e manakogina malosi se fesoasoani i olotou fenua eiloa. E mafai o ‵tofi aka a nai tino ke tavini atu i se isi fenua māfai e talia ne latou.

• Te Leva: Lua masina.

• Te Koga: Ko oti ne fai a nai akoga muamua i te Watchtower Educational Center i Patterson, New York, U.S.A. Mai tua ifo i ei, ka fai eiloa a te akoga tenei i koga kolā e fakaiku aka ne te ofisa lagolago, telā e masani sāle ko te Fale Fai Fono io me ko te Kingdom Hall.

• Tino e Mafai o ‵Kau ki ei: Ko tauavaga kolā ko nofo olotou tausaga i te va o te 25 mo te 50 tausaga, e malosi ‵lei, e mafai o tavini atu i so se koga e manakogina kae e maua foki ne latou a te kilokiloga tenei “Ko au! Uga mai au!” (Isa. 6:8) E se gata i ei, ko oti ne avaga lāua mō se lua tausaga kae e aofia foki i te taviniga tumau e aunoa mo te taofi aka o te lā taviniga.

• Te Auala ke Kau Atu ki ei: Kafai ko fai a te akoga tenei i fenua mai i lalo o te otou ofisa lagolago, ka fai eiloa se fono mō tino kolā e fia ‵kau atu ki ei i fono fakapito. Ka tuku mai i te fono tenā a nisi fakamataga tai uke atu.

Te Akoga i Kiliata

• Te Aoga: Ke akoako a paenia mo nisi tavini i te taviniga tumau mō te galuega fakamisionale.

• Te Leva: Lima masina.

• Te Koga: Watchtower Educational Center, Patterson, New York, U.S.A.

• Tino e Mafai o ‵Kau ki ei: Ko tauavaga kolā ko oti ne papatiso mō tausaga e tolu kae ko nofo olotou tausaga i te va o te 21 mo te 38 i te taimi ne lafo atu ei olotou tusi fakamolemole muamua. E ‵tau o iloa ne latou o fai‵pati fakapalagi, kae ko oti foki ne avaga lāua i tausaga e lua kae ko oti foki ne ‵kau atu lāua ki te taviniga tumau mō se lua tausaga e aunoa mo te taofi aka o te lā taviniga. E ‵tau o ma‵losi ‵lei latou. A paenia kolā e tavini atu i se fenua fakaatea (e aofia i ei a misionale); ovasia faima‵laga; sui o te kāiga Peteli; mo latou kolā ko oti ne ‵kau atu ki te Akoga mō Toeaina mo Tavini Fesoasoani, te Akoga Faka-te-Tusi Tapu mō Taina Taka, mo te Akoga Faka-te-Tusi Tapu mō Tauavaga Kelisiano, e mafai foki o tusi fakamolemole atu māfai e fetaui ‵lei latou ki ei.

• Te Auala ke Kau Atu ki ei: I ofisa lagolago kolā e fai i ei a te akoga tenei, e fai eiloa a te fono mō latou kolā e fia ‵kau atu ki ei i fono i te atufenua. Ka maua ne koe i ei a fakamatalaga tai uke atu i te fono tenei. Kafai e seai se fono penā i te fono i te atufenua i tou fenua kae e fia kau atu ki ei, e mafai o tusi atu koe ki te ofisa lagolago mō nisi fakamatalaga.

Te Akoga mō Komiti o te Ofisa Lagolago mo Olotou Avaga

• Te Aoga: Ke fesoasoani atu ki Komiti o te Ofisa Lagolago ke tausi faka‵lei atu ki te galuega ko te tausiga o fale Peteli, ke ‵saga tonu atu ki vaega o te taviniga kolā e pokotia i ei a fakapotopotoga, mo te tausiga o fenua mo atufenua i olotou koga talai, e pelā foki mo galuega ‵fulitusi, te ‵lomiga o tusi, mo te lafoatuga o tusi mo te tausiga o matagaluega kese‵kese.—Luka 12:48e.

• Te Leva: Lua masina.

• Te Koga: Watchtower Educational Center, i Patterson, New York, U.S.A.

• Tino e Mafai o ‵Kau ki ei: Ko sui o te Komiti o te Ofisa Lagolago io me ko te Komiti o te Fenua io me se tino ne fatoā ‵tofi aka ke aofia i ei.

• Te Auala ke Kau Atu ki ei: A taina kolā ko fetaui ‵lei mo olotou avaga e ‵kami ne te Potukau Pule.

[Footnotes]