Tupe Fo‵liki e Lua Kolā e se Taulia Malosi

A te auala tāua e tasi e ‵lago atu ei tatou ki manakoga o te Malo ko te tuku fakameaalofa atu o tupe ki te galuega talai i te lalolagi kātoa. Kae e a māfai e se uke ‵tou tupe?

I te taimi e tasi, ne lavea ne Iesu se fafine mativa ko mate tena avaga, e tuku fakameaalofa atu ne ia a tupe fo‵liki kolā e se taulia malosi ki te faletapu. A te alofa ki a Ieova ne fakaosofia ei tou fafine ke tuku atu “ana mea katoa eiloa e ola ei a ia.” (Male. 12:41-44) Ne lavea ne Iesu me ne tāua ‵ki eiloa tena meaalofa i te kilokiloga a te Atua. E penā foki loa, ne seki ‵kilo atu a Kelisiano i te senitenali muamua ki te tiute ke ‵lago atu ki te galuega talai i mea tau tupe e pelā me ko te tauliaga fua o Kelisiano mau‵mea. Ne taku atu ne te apositolo ko Paulo a te fakaakoakoga a Kelisiano i Maketonia kolā, “faitalia te lotou ma‵tiva malosi . . . ne fakatagi mai faeloa . . . ke maua ne latou se tauliaga ke ofo atu olotou meaalofa.”—2 Koli. 8:1-4.

Tela la, kafai fua e mafai ne tatou o lafo atu a “tupe fo‵liki e lua kolā e se taulia malosi,” e ‵tau o masaua ne tatou me i tamā meaalofa fo‵liki penā e mafai o fakaopoopo atu ki se aofaki lasi. Ka fakafiafia eiloa ki te ‵tou Tamana kaimalie faka-te-lagi māfai e tuku atu ne tatou a meaalofa mai i ‵tou loto, me “i te Atua e alofa ki te tino telā e tuku atu ana mea mo te loto fiafia.”—2 Koli. 9:7.