Ke Puipui Tou Loto Lagona
1. Se a te matua o te fono fakapito i te tausaga faka-te-taviniga ko te 2013, kae se a te pogai o te polokalame?
1 I aso takitasi, e tuku faka‵sau atu tatou ki tulaga kolā e mafai ei o fakamasei ne tatou ‵tou loto lagona. Tenā eiloa te pogai ne filifili aka ei a te matua o te polokalame mō te fono fakapito i te tausaga faka-te-taviniga ko te 2013, ko te “Ke Puipui Tou Loto Lagona,” telā e kamata mai i a Setema 1, 2012. (1 Timo. 1:19) Ne fakatoka a te polokalame ke fesoasoani mai ki a tatou taki tokotasi ke mafau‵fau ‵mafa ki te auala e fakaaoga ei ne tatou a te meaalofa fakaofoofogia tenei mai i te ‵tou Mafuaga.
2. Ne a fesili tāua ka tali mai i te polokalame?
2 Ke Onoono ki Manatu Konei: Ka tali mai i te polokalame a fesili tāua e fitu e uiga ki te loto lagona:
• Ne a mea fakama‵taku ki te loto lagona?
• E mafai pefea o akoako faka‵lei ‵tou loto lagona?
• E mafai pefea o ‵ma tatou mai i toto o tino katoa?
• Ne a mea e fakaasi mai e uiga ki a tatou e auala i ‵tou mafaufauga mo te auala e fakagalue aka ei ne tatou a akoakoga fakavae i te Tusi Tapu?
• E mafai pefea o ‵kalo keatea tatou mai i te fakamaseiga o loto lagona o nisi tino i mea kolā e tuku loa ki te loto lagona o te tino?
• Talavou, e mafai pefea o fakafesagai atu koutou ki fakamalosiga ke gutugutulua?
• Ne a fakamanuiaga e maua ne latou kolā e tau‵tali atu ki olotou loto lagona kolā e takitaki ne te agaga?
3. E mafai pefea o aoga a te polokalame ki a tatou?
3 Fakatasi mo te fesoasoani o Ieova, e mafai o ‵teke atu tatou ki taumafaiga a Satani ke fakamasei ‵tou loto lagona. E auala i te Muna a te Atua mo te fakapotopotoga, e fai mai te ‵tou Tamana alofa faka-te-lagi, penei: “Tenei te auala. Tautali i ei.” (Isa. 30:21) A te polokalame tenei se auala e tasi e tuku mai ei ne Ieova a fakatakitakiga penā. Tela la, ke fai a fakatokaga ke ‵kau atu ki te polokalame kātoa. Ke ‵saga tonu atu, kae mafaufau ki te auala ke fakagalue aka ei ne tatou taki tokotasi a fakamatalaga konā. Ke sau‵tala ki te polokalame e pelā me se kāiga. A te tau‵tali atu ki fakatonutonuga e maua ne tatou ka fakamalosi aka ei tatou ke “fakatumau se loto lagona ‵lei” kae fesoasoani atu foki ke ‵kalo keatea mai i te fanatu i te suā auala ona ko fakafiafiaga sē tumau i te lalolagi a Satani.—1 Pe. 3:16.