E Mata, e ‵Lei ki a Koe ke Maua Sou Koga Talai Totino?

1. Se a te koga talai totino?

¹ Se a te koga talai totino? E maua eiloa ne fakapotopotoga a koga talai e uke, kae ko te mea tenei se koga talai mō koe eiloa, kāti se koga telā e pili atu ki te koga e nofo koe i ei. A te tusi ko te Fakatoka, Itulau e 102-108, te itu. 3, e fai mai penei: “A te pili mai o tou koga talai e fai ei ke magoi tau galuega i loto i te taimi telā e mafai o fakamāumāu ki te galuega talai. E mafai foki o ‵kami ne koe se isi tino talai ke ga‵lue fakatasi koulua i tou koga talai.”

2. E mafai pefea o fakaaoga se koga talai totino i tafa o te potukau talai?

² Se Fakatokaga i Tafa o te Potukau Talai: Kafai e maua ne koe se koga talai totino telā e pili atu ki tou koga galue, e mafai o kau atu koe ki te galuega talai i taimi malō‵lo i tutonu io me koi tuai o foki atu koe ki te fale, kāti mo te suā tino talai telā e galue pili atu ki a koe. Kafai e maua ne koe se koga talai telā e pili atu ki tou fale, e mafai eiloa o talai koe mo tou kāiga i te koga tenā i fakaafiafi. E tonu, kafai e se kau atu koe ki se fakatasiga mō te galuega talai, se mea ‵lei ke ‵talo atu mō te takitakiga a Ieova a koi tuai o fanatu koe o talai. (Fili. 4:6) E se gata i ei, e ‵tau o fakapaleni faka‵lei ne koe a te taimi e galue ei koe i tou koga talai totino mo te taimi e ‵lago atu ei koe ki fakatokaga o potukau talai a te fakapotopotoga. Maise eiloa i fakaotiga o vaiaso, i te taimi e maopoopo ei a tino e tokouke mō te galuega talai, e sili atu i te ‵lei ke ‵lago atu ki te potukau.

3. Ne a mea aoga e iku mai i te mauaga o se koga talai totino?

³ Mea Aoga: Kafai e isi sou koga talai totino, e mafai eiloa o talai atu koe i ei i so se taimi e saosao ei koe. E mafai o uke atu a taimi e fakamāumāu ki te galuega talai ona ko te mea e se ‵tau o faimalaga atu koe ki te fakatasiga mō te galuega talai. A te faiga tenei o fakamafulifuliga e fesoasoani atu ki nisi tino ke paenia lagolago io me paenia tumau. Ona ko te mea ko maua ne koe a tino fia‵fia i kogā kolā e ‵pili atu ki a koe, e faigofie ke toe foki atu o fakamalosi aka te fiafia kae fai foki a akoga faka-te-Tusi Tapu. E iloa ne tino e tokouke kolā e isi ne olotou koga talai totino me e fesoasoani atu ki a latou ke fakamasani mo tino i fale kae fakamalosi aka foki te lotou loto tali‵tonu, maise eiloa māfai ne galue koe i ei i taimi e uke a koi tuai o fakafoki atu te mape ko te mea ke fakaaoga ne nisi tino. E mata, e fesoasoani atu ki a koe mo tou kāiga a te ga‵lue i se koga talai totino ke fakataunu katoatoa ei tau galuega?​—2 Timo. 4:5.