Ko oi ka Fiafia ki te Mataupu Tenei?
1. Kafai e fai‵tau tatou ki ‵tou ‵kopi totino o Te Faleleoleo Maluga io me ko te Ala Mai!, se a te mea e ‵tau o mafau‵fau tatou ki ei, kae kaia?
1 E fakatoka eiloa a Te Faleleoleo Maluga mo te Ala Mai! mo te mafaufau ki tino i te lalolagi kātoa. Tela la, e aofia eiloa i ei a mataupu kese‵kese e uke. I te taimi e fai‵tau ei tatou ki mataupu takitasi i ‵tou ‵kopi totino, e ‵tau o mafau‵fau tatou ki se tino telā ka fiafia ki ei, kae taumafai ke ofo atu te mekesini tenā ki ei.
2. Ne a mataupu e aofia i ‵tou mekesini kolā e mafai o fia‵fia malosi ki ei a nisi tino?
2 E mata, e isi se mataupu faka-te-Tusi tapu i se Faleleoleo Maluga fou ne fatoa oti ne sau‵tala koulua ki ei mo se tino e ga‵lue tasi koulua? E mata, e isi se mataupu e uiga ki te olaga faka-te-kāiga telā e aoga ki se kāiga? E mata, e isi sou taugasoa e fakatoka o faimalaga atu ki se fenua telā e isi se mataupu e uiga ki ei i te Ala Mai!? E mata, ka gali se mekesini e tasi ki se pisinisi io me se ofisa o te malo i tou koga talai? E pela mo te mekesini telā e fakamatala mai i ei a tulaga faiga‵ta kolā e fe‵paki mo tino ma‵tua, e mafai o fia‵fia ki ei a latou kolā e ‵nofo i fale tausi tino ma‵tua. Ko ofisa fai tulafono e mafai o fia‵fia ki se mekesini telā e maua i ei se mataupu e uiga ki amioga solitulafono.
3. Ke fakamatala mai se tala telā e fakaasi mai i ei a te tāua o te ofoatuga o lōmiga fakapito o mekesini ki tino kolā e mafau‵fau tatou me ka fia‵fia ki mataupu i ei.
3 Ikuga: I te otiga ne maua a te lōmiga o te Ala Mai! i a Oketopa 2011 e uiga ki te “How to Raise Responsible Children,” ne telefoni atu se tauavaga i Afelika ki Saute ki akoga e 25 i te koga talai o te lotou fakapotopotoga. Ne talia ne akoga mo fale tausi tama‵liki e luasefulu a ‵kopi kae ne tufa atu i ei ne latou ki tama‵liki. A te suā tauavaga i te fenua tenā ne mafau‵fau foki penā kae ne tufa atu ne lāua a ‵kopi i akoga i te lotou koga talai. Ne fakaiku aka ne faiakoga i se akoga e tasi ke fakaaoga a te mekesini kae fai‵tau foki ki ei i nisi mataupu a latou i te vaiaso. Ne fakaasi atu ne te tauavaga a te tala a lāua ki te ovasia o te fenua. Ko fakamalosi atu ei a ia ki fakapotopotoga kolā e āsi atu a ia ki ei ke olo atu ki akoga i olotou koga talai. Ne maua ne te ofisa lagolago a fakamolemole e uke mō nisi mekesini telā ne ‵tau ei o ‵lomi a nisi ‵kopi!
4. Kaia e ma‵nako ei tatou ke tufa atu a mekesini ki tino e tokouke e mafai ne tatou o tuku atu ki ei?
4 E fakamatala mai i ‵tou mekesini a te pogai tonu o mea ‵tupu kae e takitaki atu foki ei a tino ki te Tusi Tapu mo te Malo o te Atua. Konei fua a toe mekesini i te lalolagi tenei kolā e ‘folafola atu te tala ‵lei’ o te fakaolataga. (Isa. 52:7) Tela la, e ma‵nako eiloa tatou ke tufa atu ki tino e tokouke e mafai o tufa atu ne tatou ki ei. A te auala ‵lei e tasi e mafai ne tatou o fai penā ko te fesili ifo ki a koe eiloa, ‘Ko oi ka fiafia ki te mataupu tenei?’