Se Fesili Ke Mafaufau Ki Ei

◼ A koi tuai o talia se tino talai seki papatiso mō te papatisoga, e pefea te leva e ‵tau ei o kau atu a ia ki fakatasiga a te fakapotopotoga mo te galuega talai?

A te papatisoga ko te ‵toe fakaikuga tāua eiloa ka fai ne se tino. Tela la, a koi tuai o talia se tino mō te papatisoga, e ‵tau o malamalama ‵lei a ia i mea kolā e manako te Atua ke fai ne ia. E se gata i ei, ko oti foki ne ‵tau o fakaasi atu ne ia tena fakaikuga ke ola e ‵tusa mo mea e manako ki ei te Atua.

E fakatonu atu ki Kelisiano ke mo a ma ‵galo sāle i fakatasiga, tela la, ko oti eiloa ne ‵tau o fakaasi ne te tino talai kae seki papatiso a te loto fiafia ke kau atu ki fakatasiga a te fakapotopotoga. (Epe. 10:​24, 25) E fai foki eiloa ana tali. Kāti ko oti foki ne kau atu a ia ki te Akoga mō Tino Talai, faitalia me e se aofia a te mea tenei i mea kolā e ‵tau o fai muamua.

E se gata i ei, ona ko te mea ko oti ne tuku atu ki Kelisiano a te galuega ke talai atu te tala ‵lei kae fai a soko, e ‵tau eiloa o kau atu faeloa a te tino talai kae seki papatiso ki te galuega talai a koi tuai o papatiso a ia. (Mata. 24:14; 28:​19, 20) E fia masina e ‵tau ei o kau atu a ia ki te galuega talai a koi tuai o papatiso? A te ‵tonuga loa, e ‵tau o lava a te taimi ke fakaasi atu ei ne ia tena ‵mautakitaki ke kau atu faeloa mo te loto finafinau ki te galuega talai i te fia o masina. (Sala. 78:37) Kae e se ‵tau eiloa o leva ‵ki mai te taimi ne kamata ei o talai ke oko atu ki te taimi ko fetaui ‵lei ei a ia mō te papatisoga, kāti i ne nai masina fua. E pefea te uke o itula e ‵tau o lipoti mai ne ia mō te galuega talai? E seai eiloa ne tulafono mautinoa e uiga ki te mea tenei. E ‵tau o onoono a toeaina ki tulaga kese‵kese o tino talai takitasi kae mafaufau faka‵lei kae ke paleni ‵lei foki.​— Luka 21:​1-4.

E ‵tau o masaua ne toeaina (io me ko tavini fesoasoani i fakapotopotoga kolā e se tokouke a toeaina i ei) kolā e fai ne latou a fesili a te kau ka papatiso me e kese‵kese a tino katoa, kae e ‵tau o fakaaoga ne latou a faka‵tauga ‵lei me ko fetaui ‵lei io me ikai a ia mō te papatisoga. E fakamoe‵moe eiloa latou ke maua ne ia a te manakoga tonu ke fai mo fai se Molimau a Ieova kae ke fakaasi atu foki tena loto fakafetai ki te tauliaga ke kau atu ki te fakapotopotoga a Ieova mo te galuega talai. E malamalama a toeaina me e seki gasolo atu a ia ki te matua ‵lei i te feitu faka-te-agaga io me e seki maua ne ia a te atamai o tino talai papatiso. Kafai e mafau‵fau a toeaina me e se fetaui ‵lei se tino mō te papatisoga, e ‵tau o fakailoa atu ne latou mo te alofa ki a ia a pogai faka-te-Tusi Tapu mō te lotou fakaikuga kae fesoasoani atu ki a ia i te feitu faka-te-agaga.