Te Fakatokaga Gali ‵ki o Tamā Pepa ‵Fou!
1. Ne a mea ‵fou kolā ne fakatoka i se auala gali ‵ki mō te galuega talai?
1 Ne ‵tala mai a tamā pepa e lima i te Fono o te Atufenua mō te 2013 ko “Te Muna a te Atua ko te Munatonu!” E se gata i ei, ko oti eiloa ne fakaopoopo atu ki nisi tamā pepa, a te Tala ‵Lei Napa 38, telā e fakaulutala penei “E Mata, e Mafai Eiloa o Toe Ōla Mai a Tino ‵Mate?” Ne fakatoka eiloa a tamā pepa katoa konei i se auala gali ‵ki. Ne a pogai mō te fakatokaga fou tenei? Kafai ko ofo atu ne tatou mai fale ki fale, e mafai pefea o fakaaoga faka‵lei ne tatou a te fakatokaga gali o tamā pepa konā?
2. Se a te pogai o te fakatokaga fou?
2 Kaia ne Fai ei se Fakatokaga Fou?: E masani o aofia i pati fakatomua ma‵goi mai fale ki fale a mea e fa: (1) Ke ‵sili atu se fesili telā e fakagasuesue aka ei te mafaufau ke kamata ki ei se sau‵talaga. (2) Ke fakaasi atu se manatu mai te Tusi Tapu. (3) Ke ofo atu se tusi ki te tino i te fale mo ana faitau. (4) Ke tuku atu se fesili ke tali aka i te suā taimi, kae fai a fakatokaga ke toe foki atu. E fesoasoani mai a te fakatokaga fou o tamā pepa ke tau‵tali atu ki auala katoa konei e fa.
3. E mafai pefea o ofo atu ne tatou a tamā pepa ‵fou i te galuega talai?
3 Te Auala ke Fakaaoga ei: (1) Kafai ko oti ne fakatalofa atu, fakaasi atu ki te tino i te fale a te fesili mo tali e tolu i te itulau muamua o te tamā pepa, kae fesili atu me se a tena kilokiloga. (2) Ke ‵suke ki te tamā pepa, kae onoono ki te “Fakamatalaga Mai te Tusi Tapu.” Ke faitau ki te tusi siki mai te Tusi Tapu māfai e ‵lei. Kafai e lava te taimi o te tino i te fale, ke sau‵tala ki “Mea Aoga Mai te Fakamatalaga Tenā.” (3) Ke ofo atu te tamā pepa, kae fakamalosi atu ke faitau ki ei i tena taimi avanoa. (4) A koi tuai o fanatu koe, fakaasi atu a te fesili mai tua ko te “Se Fesili ke Mafaufau ki ei” kae fai a fakatokaga ke sau‵tala ki te tali a te Tusi Tapu i te suā taimi.
4. E mafai pefea o fakaaoga ne koe a tamā pepa ‵fou i te faiga o se toe āsiga?
4 Ko faigofie foki i ei te faiga o toe asiga. Ke fakaaoga fua a tusi siki mai tua o te tamā pepa ke tali aka ei te fesili telā ne fakasae aka i te fakaotiga o tau āsiga muamua. A koi tuai o fanatu koe keatea, ke fakasino atu ki te ata i te polosiua ko te Tala ‵Lei, ke fakaasi atu ki te tino i te fale a te polosiua mo te mataupu telā e maua i ei a nisi fakamatalaga e uiga ki ei, ko ofo atu ei te polosiua. Kafai e talia ne ia, fai a fakatokaga ke sau‵tala ki te polosiua i te suā āsiga. Ko oti eiloa ne kamata ne koe se akoga faka-te-Tusi Tapu! I lō te ofo atu o te polosiua, e mafai ne koe o ofo atu a te suā tamā pepa kae fakatoka ke toe foki atu o sau‵tala ki ei mo te tino i te fale.
5. E aoga pefea a tamā pepa ki te ‵tou galuega talai?
5 Ko oti eiloa ne fakaaoga a tamā pepa i te ‵tou galuega talai mō te tausaga e silia atu i te 130. E tiga eiloa e kese‵kese a te ‵lasi mo te fakatokaga o latou, ko oti eiloa ne fai mo fai ne mea faigaluega ma‵goi i te galuega talai. Ke na fakaaoga faka‵lei eiloa ne tatou a te tamā pepa fou tenei ke fakatumau aka ei te fakasalalauatuga o te malamalama i te Tusi Tapu i te lalolagi kātoa.—Faata. 15:7a.