Ke Fai a Pelofeta Pelā me se Fakaakoakoga—Nauma
1. Ne a mea e tauloto ne tatou mai te tusi ko Nauma?
1 A te fakamaofaga o Nineva i aso mua e fakamaoni mai i ei me e ‵tusa mo te valoaga a Nauma, e taua atu eiloa a Ieova ki Ana fili kae se mafai ne ana toe fili sauā o taua atu ki a Ia. (Nau. 1:2, 6) E tuku mai i te valoaga a Nauma se akoakoga tāua i te ‵tou galuega talai.
2. E mafai pefea o fakatalitonu atu ne tatou me e tonu eiloa te fekau?
2 Ke Tuku Atu se Fakamafanafanaga mo se Fakamoemoega: I te taimi muamua ne faitau ei ki te tusi o Nauma, ne foliga mai me ne aofia fua i ei se faka‵pulaga e uiga ki te fakamaofaga o Nineva, te laumua o Asulia. (Nau. 1:1; 3:7) Kae mō tino o Ieova, a te faka‵pulaga tenei se tala fakafiafia. A Nauma, telā e fakauiga ki te “Tino fakamafanafana,” ne fakatalitonu atu ki te kau Iutaia me ko pili o fakaseai atu olotou fili katoa! Ne toe fakamautinoa atu ne Nauma me i a Ieova “e puipui ne ia ona tino i taimi o puapuaga.” (Nau. 1:7) I te taimi e talai tatou, e fakasalalau atu ne tatou te tala ‵lei kae fakamalosi a nisi tino ke ‵lafi atu ki a Ieova.—Nau. 1:15.
3. E mafai pefea o fakaakoako tatou ki a Nauma i te fakaaogaga o fakaakoakoga io me ko tala fakatusa?
3 Fakaaoga Fakaakoakoga mo Tala Fakatusa: Ne fakaosofia ne Ieova a Nauma ke fakatusa ne ia a te gataga o Nineva ki te fa‵kai e tasi o Aikupito ko Tepesi (Noaman), telā ne fakatakavale ne Asulia. (Nau. 3:8-10) I te taimi e fai‵pati ei tatou ki tino e uiga ki te gataga o te olaga matagā tenei, e mafai o taku atu ne tatou a valoaga i te Tusi Tapu ke fakamaoni atu me e fakataunu ne Ieova ana pati e fai. E pelā me se fakaakoakoga, i te taimi ne fakasagatau atu ei a te kau Papelonia mo mo te kau Metai ki te fa‵kai o Nineva i te 632 T.L.M., ne fai ne vaiua ‵to ‵lotu ke lofia valevale te vaitafe ko Taikelise, kae maofa i ei a ‵pui malosi o te fa‵kai. Telā ne vave ei te fakatakavalega o Nineva, e pelā mo te mea ne ‵valo mai ne Ieova.—Nau. 1:8; 2:6.
4. E mafai pefea o talai atu tatou i se auala manino kae malamalama?
4 Ke Manino kae Malamalama: A tusitusiga a Nauma e malamalama kae fakamalosi loto. E manino ‵lei eiloa ana manatu. (Nau. 1:14; 3:1) I se auala tai ‵pau, e ma‵nako tatou o fakaaoga a te ‵gana faigofie. (1 Koli. 14:9) I te āsiga muamua, ke fakamatala faka‵lei atu te pogai o tau āsiga. I te taimi e sukesuke ei koe mo tino ki te Tusi Tapu, fesoasoani atu ke ati aka ne latou te fakatuanaki ki a Ieova mo tena Muna kae ke fiafia ki te auala e fakagalue ne latou a te manatu.—Loma 10:14.
5. Se a te fakatalitonuga e maua ne tatou i te valoaga a Nauma?
5 A te loto talitonu o Nauma ki fakataunuga ‵tonu o pati a Ieova e fakaata faka‵lei mai i te tusi i te Tusi Tapu telā e fakaigoa ki tena igoa. Ona ko te pili mai o te olaga mataga a Satani, e maua eiloa ne tatou se fakamafanafanaga mai te Atua: “E se mafai ne se tino o ‵teke fakalua ki a ia.”—Nau. 1:9.