Fakatasiga mō te Galuega Talai Kolā e Fakataunu ei Olotou Fakamoemoega

1. Se a te pogai e fai ei a fakatasiga mō te galuega talai?

¹ I se fakatasiga e tasi, ne maopoopo a Iesu mo se toko 70 o ana soko kae koi tuai o olo atu latou o talai. (Luka 10: 1- 11) Ne fakamalosi atu a ia ki a latou mai te fakamasaua atu me ka se tiaki lele a latou, kae takitaki latou ne te “Matai o te galuega,” ko Ieova. Ne tuku atu foki ne ia a fakatonuga ke akoako ei latou ko te mea ke mafai o fai te galuega, kae ne fakatoka ne ia latou ke olo “taki tokolua.” I aso nei, e tenā foki loa te pogai e fai ei a fakatasiga kolā e fai mai mua a koi tuai o olo atu i te galuega talai ko te mea ke fakamalosi, ke akoako, kae ke fakatoka ei tatou.

2. E ‵tau o pefea te leva o te fakatasiga mō te galuega talai?

² I aso nei, a fakatasiga mō te galuega talai e 10 ki te 15 minute te leva, e aofia ei te tofitofiga o te potukau, koga e talai ei, mo te faiga o te ‵talo. Kae nei la ko oti ne fakamafuli. Kamata mai i a Apelila, a fakatasiga mō te galuega talai ko lima ki te fitu minute te leva. Kae kafai e fai te fakatasiga mō te galuega talai mai tua o se fakatasiga a te fakapotopotoga, e ‵tau o tai fakatoetoe ifo, ona ko te mea a tino kolā e ‵kau atu ki ei fatoā oti foki loa ne fai ne latou ne sau‵talaga ‵gali faka-te-Tusi Tapu. A te faiga o se fakatasiga toetoe e fai ei ko tino katoa kolā ne ‵kau atu ki ei ke fakauke olotou taimi e fakamāumāu i te galuega talai. E se gata i ei, a paenia io me ko tino talai kolā ne kamata te lotou galuega mai mua o te fakatasiga mō te galuega talai, ka mafai fua o toetoe te taimi e fakalavelave atu ki te lotou galuega talai.

3. E fakatoka pefea a fakatasiga mō te galuega talai ko te mea ke mafai o fakafaigofie atu ki tino talai?

³ A te fakatasiga mō te galuega talai e ‵tau o fakatoka faka‵lei ko te mea ke mafai o aoga ki tino talai. I te lasiga o fakapotopotoga, e faigofie atu ke maopopo i potukau i lō te maopopo ki se koga e tasi. I te faiga tenei, ka fakafaigofie ei ki tino talai ke olo atu ki te fakatasiga mō te galuega talai penā foki loa mo koga talai. Ka mafai foki ei o fakatoka fakavave a tino talai, kae ka faigofie foki ki ovasia o potukau ke ‵saga tonu atu ki a latou kolā mai lalo i te olotou tausiga. E mafai ne toeaina o mafau‵fau ki fakanofonofoga o tino kae ke filifili aka me se a te ‵toe mea ‵lei ke fai. Kae koi tuai o fakaoti te fakatasiga ki se ‵talo toetoe, a tino katoa ko ‵tau o iloa ne latou te koga e ga‵lue i ei penā foki loa mo tino kolā ka ga‵lue mo latou.

4. Kaia e se ‵tau o ‵kilo atu tatou ki fakatasiga mō te galuega talai e pelā me sē tāua malosi māfai e faka‵pau ki nisi fakatasiga?

⁴ E ‵Pau Loa te Tāua mo Nisi Fakatasiga a te Fakapotopotoga: Ona ko fakatasiga mō te galuega talai ne fakatoka ke aoga mō tino talai, tela la ka se mafai o ‵kau atu ki ei a te fakapotopotoga katōa. Kae e se ko tena uiga me sē lasi tena tāua pelā mo nisi fakatasiga a te fakapotopotoga. E pelā loa mo nisi fakatasiga, a fakatasiga mō te galuega talai ne fakatokaga mai i a Ieova kolā e fesoasoani mai ke mafai ne tatou o fakamalosi atu ke fakatau a‵lofa kae fai a mea ‵lei. (Epe. 10: 24, 25) Tela la, e ‵tau mo te tino telā e takitaki ne ia te fakatasiga o fakatoka faka‵lei ko te mea ke fai te fakatasiga tenā e pelā me se mea e faka‵malu atu ki a Ieova kae ke mafai foki o aoga ki tino katoa kolā ne ‵kau atu ki ei. Tela la, e ‵tau mo tino talai o taumafai malosi ke ‵kau atu ki te galuega talai māfai e mafai o fai penā.

5. (a) Ne a fakatokaga e fai ne te ovasia o te galuega talai mō te galuega talai? (e) E takitaki pefea ne se tuagane a te fakatasiga mō te galuega talai?

⁵ Fakatokaga e Fai ne te Tino Telā e Takitaki ne ia te Fakatasiga: Ko te mea ke fakatoka faka‵lei ne se tino tena tofiga ki se fakatasiga, e ‵tau o maua ne ia tena tofiga mai mua. Kae tenā foki loa te mea e ‵tau o fai i te galuega talai. Kafai e fai a fakatasiga mō te galuega talai i potukau, e ‵tau mo ovasia o potukau io me ko tino kolā e fesoasoani atu ki a latou o takitaki a te fakatasiga. Kae kafai ko fai fakatasi te fakatasiga mō te galuega talai, ka ‵tofi ne te ovasia o te galuega talai se tino ke takitaki ne ia. Nisi ovasia e fakatoka ne latou se fakasologa mo tino katoa kolā e mafai o takitaki ne latou te fakatasiga kae faka‵pa atu se ‵kopi ki luga i te laupapa telā e faka‵piki ei a faka‵pulaga. E ‵tau mo te ovasia o te galuega talai o fai se faka‵tauga ‵lei māfai ko filifili ne ia a tino kolā ka takitaki ne latou te fakatasiga, kae masaua me i te maua o mea aoga mai i fakatasiga penā, e faka‵na loa ki te auala e akoako kae fakatoka faka‵lei ei a latou kolā e takitaki ne latou. Kafai e seai se toeaina, se tavini fesoasoani, io me se taina papatiso e avanoa, e mafai ne te ovasia o te galuega talai o ‵tofi se tuagane telā e fetaui ‵lei ke takitaki ne ia.—Ke onoono ki te mataupu “Māfai e Fai ne se Tuagane se Fakatasiga mō te Galuega Talai.”

6.Kaia e tāua ei ki te tino telā e takitaki ne ia ke fakatoka faka‵lei?

⁶  E fakatāua kae fakatoka faka‵lei tatou māfai ko maua ne tatou a ‵tou tofiga ki te Akoga mō Tino Talai io me ko Te Fakatasiga mō te Galuega Talai. A nisi tino e masani o faka‵tali ki te taimi telā ko olo atu ei ki te fakatasiga kae ko kamata o mafau‵fau ki olotou pati kolā ka fai atu. A ko te tofiga ke fai a fakatasiga mō te galuega talai e ‵tau o fai pelā mo te faiga o tofiga i te fakatasiga i te akoga mō tino talai. Nei la, ka ‵kati ifo ki lalo a te taimi mō te fakatasiga mō te galuega talai, e tāua ‵ki te fakatoka faka‵lei ko te mea ke mafai o aoga te fakatasiga kae ke oti foki loa i te taimi tonu telā e manakogina. E aofia foki i te fakatoka faka‵lei a te iloa o koga e talai i ei mai mua o olo atu o talai.

7. Ne a nisi mea kolā e mafai o faipati ki ei te tino telā e takitaki ne ia te fakatasiga mō te galuega talai?

⁷ Mea ke Sau‵tala ki ei: E se tuku mai ne te ‘tavini poto kae fakamaoni’ a fakatoetoega o manatu kolā e fai i te fakatasiga mō te galuega talai, ona ko te mea e kese‵kese a fakanofonofoga i koga talai. E isi ne nāi manatu e mafai o fakaaoga kolā e maua mai i te pokisi “I se Fakatasiga mō te Galuega Talai, e Mafai o Fakaaoga ne Koe.” E masani sale o fai te fakatasiga e pelā me se sau‵talaga. E mafai foki o fai se fakaasiga toetoe telā ne fakatoka faka‵lei io me fakaasi atu se vitio mai i te jw.org. Kafai ko fakatoka ki te fakatasiga mō te galuega talai, e ‵tau mo te tino telā e takitaki ne ia o mafaufau faka‵lei ki mea kolā ka mafai o fesoasoani kae fakamalosi atu ki a latou kolā e olo atu i te galuega talai.

8.Ne a mea aoga e mafai o sau‵tala ki ei i taimi o fakatasiga mō te galuega talai i te Aso Ono mo te Aso Sa?

⁸  I Aso Ono, e masani o ofo atu ne tino talai a Te Faleleoleo Maluga mo te Awake! E tokouke kolā e olo sale o talai i te Aso Ono e se mafai o ‵kau atu i nisi aso o te vaiaso, tela la e tai faigata loa ke masaua ne latou a fakaakoakoga kolā ne fai i Tapuakiga o Kāiga. Tela la, e aoga ‵ki ki te tino telā e takitaki ne ia ke toe fakamasaua atu a pati fakatomua kolā e maua i te itulau fakaoti o te ‵Tou Galuega Talai. E aofia i nisi auala a te fakamatala atu te auala ke fakafetaui aka se ‵tala, mea ‵tupu, io me se malōlōga ki ‵tou fakamatalaga kolā e fai atu ki mekesini, io me ke fai se fakavae ke mafai o toe āsi atu māfai ne talia ke puke te mekesini. Kafai e isi ne tino ko oti ne ofo sale atu ne latou te mekesini telā e ofo i te taimi tenā, e mafai o ‵kami atu ke fai mai ne olotou manatu ki ei, io me ke fakamatala atu ne tala ‵gali. E mafai foki o filifili aka ne te tino telā e takitaki ne ia se fakamatalaga tai penā i te Aso Sa. A lōmiga kolā e fai i ei a akoga pelā mo polosiua ko te Tala ‵Lei, te Fakalogo ki te Atua mo te tusi ko te Akoakoga a te Tusi Tapu, e mafai o ofo atu i so se aso, tela la, a te tino e fai ne ia te takitakiga e mafai o fakaasi fakatoetoe atu ne ia te auala e ofo atu ei a tusi konei.

9. Ne a mea e mafai o sau‵tala ki ei māfai ko aofia tatou i se galuega fakapito?

⁹ Kafai e isi se galuega fakapito e fai ne te fakapotopotoga, e mafai ne te tino telā e takitaki ne ia o fakaasi atu te auala e ofo atu ei se mekesini fou fakatasi mo te pepa ‵kami io me se tamā pepa, io me sau‵tala ki mea kolā e ‵tau o fai māfai e fiafia mai te tino. A te suā auala ko te fakamatala atu o tala ‵gali kolā e fakatāua ei te aoga o vaegā galuega fakapito penā.

10, 11.Kaia e tāua ei ki tino talai ke fakatoka faka‵lei ko te mea ke mafai o maua ne ikuga ‵lei mai se fakatasiga mō te galuega talai?

¹⁰ Fakatokaga e Fai ne Tino Talai: E isi foki ne tusaga o tino talai kolā e ‵kau atu ki te fakatasiga mō te galuega talai ko te mea ke mafai o maua ne ikuga ‵lei i te galuega talai. Kafai e fakatoka faka‵lei latou ki te galuega talai, io me i taimi o Tapuakiga a Kāiga, ka mafai eiloa o tuku mai ne olotou manatu ki nisi tino talai. A te fakatoka faka‵lei e aofia foki ei te mauaga o mekesini kae koi tuai o olo atu ki te fakatasiga mō te galuega talai, ko te mea ke mafai foki o olo fakavave atu ki te koga talai.

¹¹ E tāua foki te fakatoka faka‵lei ko te mea ke mafai o oko atu mai mua ki te fakatasiga mō te galuega talai. E tonu, e taumafai ma‵losi tatou ke sē talimuli ki so se fakatasiga a te fakapotopotoga. Kafai e talimuli tatou ki te fakatasiga mō te galuega talai, e mafai eiloa o fakalavelave atu te mea tenā ki nisi tino. E pefea la? E isi ne nisi auala kolā e mafaufau ki ei te tino telā e takitaki ne ia ko te mea ke mafai o fakatoka faka‵lei aka ei te potukau. Kafai e se tokouke a tino talai ne ‵kau atu, e mafai o uga atu ne ia a tino katoa ke fakaoti se koga talai telā seki oti ne galue. Kafai foki e ‵mao te koga talai, e mafai o ‵tofi ne ia ke ga‵lue fakatasi a tino kolā ne sasale atu ki te fakatasiga mo tino kolā e isi ne olotou mea fakatele‵tele. Kafai foki e tai fakamataku te koga e talai ei, e mafai foki o ‵tofi ne ia ne taina ke ga‵lue tasi mo tuagane io me ke ga‵lue ‵pili atu ki tuagane. E mafai foki o ‵tofi ne ia a tino kolā e fakamasaki‵saki ke ga‵lue i fale kolā e ‵pili io me se tō ma‵luga. E mafai o ga‵lue fakatasi a tino talai ‵fou mo tino apo. Kae kafai ko talimuli atu ne tino, ko manakogina foki ke toe fai se suā fakatokaga ko te mea ke mafai o aofia i ei a latou kolā ne talimuli atu. I nisi taimi e mafai tatou o talimuli ona ko pogai ‵tau. Kae kafai ko fai pelā me se mea masani, kāti e ‵lei ke ‵sili ifo ki a tatou eiloa me e mata, e talimuli tatou ona ko te sē amanaia ki fakatasiga mō te galuega talai, io me ko te faka‵tamala o fakatoka ke toka mai mua o te taimi.

12. Ne a mea e ‵tau o mafaufau faka‵lei ki ei māfai e masani koe o fai au fakatokaga ki te tino e ga‵lue mo koe?

¹² E mafai ne tino talai kolā ne ‵kau atu o fai ne fakatokaga i a latou eiloa mai mua o te fakatasiga io me faka‵tali ke ‵tofi atu se tino ke ga‵lue mo ia. Kafai koe e masani sale o fai au fakatokaga i a koe loa, e mata, e mafai ne koe o “‵tala atu” tou loto mai te filifili ke ga‵lue mo tino kese‵kese i lō te ga‵lue faleoa mo se taugasoa pili o koe? (2 Koli. 6: 11- 13) E mata, e mafai o fai ne koe se fakatokaga i nisi taimi ke ga‵lue mo te tino talai fou ke fesoasoani atu ki a ia ke momea aka tena atamai i te akoako atu? (1 Koli. 10:24; 1 Timo. 4: 13, 15) Ke fakalogologo faka‵lei ki fakatonuga kolā e tuku atu, e aofia i ei a fakatakitakiga ki te koga telā e ‵tau o kamata koe i ei. Kafai ko oti te fakatasiga, ke mo a eiloa e fai ne koe ne fakamafuli‵fuliga ki fakatokaga kolā ne fai kae ‵tau fua o olo atu fakavave ki koga talai.

13. Ka aoga pefea a fakatasiga mō te galuega talai ki a tatou kolā e aofia i ei māfai e ‵saga tonu kae fai faka‵lei ‵tou tusaga?

¹³ I te otiga ne talai, “ne ‵foki atu . . . mo te fia‵fia” a te toko 70 soko kolā ne fakatoka ne Iesu ke olo o talai. (Luka 10:17) E seai se fakalotolotolua me i te olotou fakatasiga mo Iesu mai mua o olo atu o talai ne fesoasoani atu ke iku manuia te lotou galuega. I aso nei, e maua foki ne tatou a mea aoga mai i vaegā fakatasiga penā. Kafai a tino katoa kolā e aofia i fakatasiga penā e ‵saga tonu kae fai faka‵lei olotou tusaga, ka fai eiloa a vaegā fakatasiga penā e pelā me ne mea e fakamalosi, e akoako ei, kae fakatoka faka‵lei ke mafai o fakataunu ‵tou galuega ke “molimau ki atufenua katoa.”​—Mata. 24:14.