Ke Fakaaoga “An Introduction to God’s Word”—Ke Kamata ki ei se Sau‵talaga
1. Se a te mea faigaluega fou telā ko oti ne maua ne tatou ke fakaaoga i te galuega talai?
1 E isi se vaega i loto i te lōmiga fou o te New World Translation i te itulau kamata telā e taku ko te “An Introduction to God’s Word.” E mafai pefea o fakaaoga ne tatou a te mea faigaluega fou tenei māfai e fai ‵tou fakatokaga mō te galuega talai? Ona ko te vaega tenei e aofia i ei a tusi siki e uiga ki mataupu i te Tusi Tapu, e pelā eiloa mo te auala e ‵lomi ei te tusi ko te Reasoning, e mafai eiloa o aoga ‵ki a te mea faigaluega tenei ki te kamataga o se sau‵talaga.
2. E mafai pefea o fakaaoga ne tatou a te “An Introduction to God’s Word” i te galuega talai?
2 Kāti e mafai o fakaaoga ne koe a te fesili i te 8 kae fai atu: “E fai eiloa ne matou a āsiga toe‵toe penei ki te otou koga tenei ona me e tokouke a tino e mafau‵fau penei, ‘E mata, e ‵tau o ‵losi atu ki te Atua mō logo‵maega o tino?’ [I nisi koga talai, e mafai eiloa o magoi māfai e fakaasi atu ne koe a te fesili ki te tino i te fale.] Se a tau kilokiloga ki ei? [Faka‵tali ki se tali.] E tuku mai ne te Tusi Tapu se tali fakamalie loto ki te fesili tenā.” Faitau kae fakamatala tonu atu se tusi siki e tasi io me uke atu mai te Tusi Tapu. Kafai e fakaasi mai ne te tino i te fale a te fiafia, e mafai o fakaasi atu ne koe ki a ia a fesili e 20 kolā e fakasolo mai i te fakatomuaga tenā kae fai atu ke filifili aka se fesili ke sau‵tala ki ei i te suā āsiga. Io me e mafai o ofo atu ne koe se tusi telā e suke‵suke tatou ki ei kae uke foki a fakamatalaga e uiga ki te mataupu telā ne fatoā sau‵tala koulua ki ei.
3. E mafai pefea o fakaaoga ne tatou a te mea faigaluega tenei ko te “An Introduction to God’s Word” ke kamata ki ei a sau‵talaga i koga talai kolā a tino i ei e se lotu Kelisiano?
3 E fesoasoani atu eiloa a te fesili 4, te 13 ki te 17 māfai e talai atu i koga talai kolā e ‵nofo i ei a tino sē lotu Kelisiano. E pelā me se fakaakoakoga, e mafai o fakaaoga ne koe a fakamatalaga mai te fesili e 17 kae fai atu: “E fai eiloa ne matou a āsiga penei ke fesoasoani atu ki tino i kāiga. E mata, e ‵lago koe ki te manatu me e fakafesagai atu loa a kāiga ki fakalavelave e uke i aso nei? [Faka‵tali ki se tali.] Ne lavea ne taki tauavaga e tokouke a te aoga o pati fesoasoani konei: “E ‵tau mo te fafine avaga o fakaasi atu te āva ki tena avaga.” [E se manakogina ke fakaasi atu i pati konā e maua i te Efeso 5:33. Kafai e faipati atu koe ki se fafine, e mafai o siki atu ne koe a pati i te Efeso 5:28.] E mata, e talitonu koe me ka aoga eiloa ki te tauavaga māfai e fakagalue aka ne lāua a te fakatakitakiga tenei i te lā fakaipoipoga?”
4. Ne a mea e mafai o fai atu ne koe i te fakaotiga o te lua sau‵talaga mo se tino telā e se lotu Kelisiano?
4 I te fakaotiga o te lua sau‵talaga, ke fai a fakatokaga ke faka‵soko te sau‵talaga i te suā taimi. Kāti e mafai o fakatoka ke faipati koe ki se tusi siki e tasi mai te fesili telā ne fakaaoga ne koe. I se taimi ‵lei, taumafai ke iloa ne te tino i te fale me i pati aoga kolā ne fai atu ne koe e fakavae katoa mai te Tusi Tapu. Mai luga i mea kolā ne sau‵tala muamua koulua ki ei penā foki loa mo te kilokiloga a te tino tenā ki te Tusi Tapu, ke ofo atu se tusi telā e mafaufau koe me ka fiafia a ia ki ei.—Ke onoono ki te mataupu fakaopoopo i te ‵Tou Galuega Talai i a Tesema 2013.