Fakaaoga Faka‵lei Ou Taimi i te Galuega Talai
Ne fakamāumāu ne Molimau a Ieova a itula e 1,945,487,604 i te galuega talai i te tausaga faka-te-taviniga ko te 2014—se fakamaoniga manino me ne fakaiku aka ne tatou ke tumau i te fakalavelave i te taviniga a Ieova! (Sala. 110:3; 1 Koli. 15:58) Ona ko te “toetoe te taimi koi ‵toe,” e mata, e mafai o fakaaoga ‵tou taimi tāua i te galuega ke fesokotaki atu ki tino e tokouke atu?—1 Koli. 7:29.
A te fakaaogaga faka‵lei o ‵tou taimi i te galuega talai e manakogina i ei a te toka o fai a fakamafuli‵fuliga. E pelā mo te fakamāumāu ne koe se itula e tasi io me uke atu i se vaega e tasi o te galuega e aunoa mo te faipati atu ki se tino, e mata, e mafai ne koe o fai ne ‵fuliga ko te mea ke maua kae faipati atu ki tino e tai tokouke atu? E kese‵kese a fakanofonofoga i koga talai katoa. Kae kāti e fesoasoani atu a manatu fesoasoani konei ke fakaaoga faka‵lei ne koe ou taimi ki toe mea aoga ko te mea ke ‵kalo keatea koe mai te ‘fusu atu fua ki te matagi.’—1 Koli. 9:26.
Te Galuega Talai Mai Fale ki Fale: I te fia sefulu o tausaga, ne masani eiloa o kamata i te taeao ne tino talai a te galuega talai mai fale ki fale. Kae ona ko te mea e ga‵lue a tino e tokouke i te taeao, kaia e se taumafai ei o talai atu mai fale ki fale i te fakatutonu io me ko te fakaafiafi, ko te taimi telā ko ‵nofo atu a tino e tokouke i olotou fale kae ma‵nava malie aka? I te ao, e mafai o ‵gali atu a mea e iku mai i te talai atu i auala io me ko koga ga‵lue.
Te Talai Atu i Koga e Tokouke i ei a Tino: E ‵tau o faka‵tu a taipola mo fakailoga fakateka‵teka i koga e uke a tino e oloolo atu i ei i te koga talai eiloa a te fakapotopotoga. (Ke onoono ki Te ‵Tou Galuega Talai i a Iulai 2013, itu. 4.) Kafai ko se tokouke a tino e oloolo atu i te koga ne ‵tofi aka mō te talai atu i koga e tokouke i ei a tino, e mafai o fakaiku aka ne te Komiti a te Fakapotopotoga mō te Galuega Talai ke avatu a ka fakateka‵teka io me ko taipola ki se isi koga telā e tokouke a tino e oloolo atu i ei.
Toe Asiga mo Akoga Faka-te-Tusi Tapu: E mata, e mafai o fai se fakasologa o au toe asiga mo akoga faka-te-Tusi Tapu ke fai i taimi kolā e se ‵lei ei ke fai a nisi vaega o te galuega talai? E pelā mo taeao o Aso Ono, ko toe taimi ‵lei ke fai ei te galuega talai mai fale ki fale, e mata, e mafai o fai tau akoga faka-te-Tusi Tapu i te fakatutonu io me ko te fakaafiafi? Kafai e fai a toe asiga, e mata, e mafai o ‵vae aka a tino talai ki potukau fo‵liki ko te mea ke uke atu a mea e mafai o fai i te galuega talai?
E tiga eiloa e mafai o lau ‵tou taimi i so se taimi e ‵kau atu ei tatou ki te galuega talai, e momea aka ‵tou fiafia māfai e uke ‵tou mea e fai. Kafai e mafaufau koe me e se ‵lei ke fai se vaega o te galuega talai i se taimi, ke tofotofo ki te suā vaega. ‵Talo ki a Ieova, “te Matai o te galuega,” mō tena takitakiga ko te mea ke mafai o fakaaoga faka‵lei ‵tou taimi i te galuega talai!—Mata. 9:38.