“A Lāua Kolā ko Oti ne Fakatasi ne te Atua . . .”

I te tulafono a Mose e manakogina a pepa fakamaoni mai te Malo ke fakatoka māfai se tagata e manako ke ‵tala tena avaga. Ne fakatoka te tulafono tenā ko te mea ke sē mafai o ‵tala fakavave a avaga. Kae, i aso o Iesu, a takitaki lotu ne fakafaigofie o tuku atu a taliaga ki tāgata kola e ma‵nako ke ‵tala olotou avaga. A a‵vaga tāgata e mafai o ‵tala olotou avaga fa‵fine i so se pogai. (manatu mō sukesukega i te nwtsty i te Mko 10:4, 11) Ne fakamafa mai ne Iesu a te fakaipoipoga ne māfua kae ne fakatoka ne Ieova. (Mko 10:2-12) A te tagata avaga mo te fafine avaga se “foitino e tasi” kae ka fakatasi lāua ki te se-gata-mai. Kae ko te pogai fua e tasi i te Tusi Tapu e mafai o ‵tala te avaga telā e ‵pau mo te tala i te Mataio, ko “amioga fakatauavaga sē ‵tau.”—Mat 19:9.

I ‵tou aso nei, e tokouke e ‵pau olotou kilokiloga mo te kau Falesaio e uiga ki te avaga kae e se ‵pau mo te kilokiloga a Iesu. Kafai e ‵tupu a fakalavelave, a tino i te lalolagi e ma‵nako fakavave ke ‵tala te avaga. Kae i te suā feitu, a tauavaga Kelisiano e fakatāua ne latou olotou tautoga ne fai i te avaga kae taumafai ke faka‵lei a fakalavelave mai te fakagalue aka a fakatakitakiga mai te Tusi Tapu. Mai tua o te onoono atu ki te vitio Alofa mo te Āva e Fai ei ke Fealofani a Kāiga, ko tali aka ei a fesili konei:

• 

  E fakagalue aka pefea ne koe te Faataoto 15:1 i tau fakaipoipoga, kae kaia e tāua i ei?

• E mafai pefea o kalo kea‵tea koe mai i fakalavelave māfai e fakagalue ne koe a te Faataoto 19:11?

• Kafai tau fakaipoipoga ko tū atu i se tulaga masei ‵ki, i lō te mafaufau penei, ‘E mata, e ‵tau o ‵tala taku avaga?’ ne a fesili e ‵tau o mafaufau koe ki ei?

• E mafai pefea o fai koe mo fai se tagata avaga io me se fafine avaga ‵lei mai te fakagalue aka ne koe a te Mataio 7:12?