MATAUPU MŌ SUKESUKEGA 13
Ke Fakatau A‵lofa Malosi Koutou
“Ke fakatau a‵lofa malosi la koutou i a koutou eiloa i otou loto.”—1 PE. 1:22.
PESE 109 Ke A‵lofa Malosi Mai Otou Loto
FAKATOE‵TOEGA O MANATU TĀUAa
I tena toe po mo ana apositolo, ne faka‵mafa atu ne Iesu te alofa (Onoono ki te palakalafa 1-2)
1. Se a te fakatonuga manino ne fai atu ne Iesu ki ana soko? (Onoono ki te ata i te ‵kava.)
I TE po mai mua o mate, ne fai atu ne Iesu ki ana soko se fakatonuga manino. Ana muna ki a latou: “E pelā eiloa mo au ne alofa ki a koutou, ke fakatau a‵lofa foki koutou.” Oti toe fai atu ei a ia: “Ona ko te mea tenei ka iloa ei ne tino katoa i a koutou ko oku soko, māfai e fakatau a‵lofa koutou.”—Ioa. 13:34, 35.
2. Kaia e tāua ei ke fakatau fakaasi atu te alofa?
2 Ne fai mai a Iesu me ka laveagofie fua ana soko ‵tonu māfai e fakaasi ne latou te alofa ne fakaasi foki ne ia. Tenā loa te mea ne tupu i te senitenali muamua, kae ko tupu foki i aso nei. Tenā te pogai e tāua ‵ki ei ke fakatau fakaasi atu te alofa faitalia me faigata ke fai penā!
3. Ne a mea ka sau‵tala tatou ki ei i te mataupu tenei?
3 A te tulaga sē ‵lei katoatoa o tino e fai ei ke faigata ke fakatau fakaasi atu ne tatou a te alofa. Kae ui ei, e ‵tau o taumafai tatou o fakaakoako ki a Keliso. I te mataupu tenei, ka sau‵tala tatou ki te auala ka aoga ei te alofa ke fai tatou pelā me ne tino tausi te filemu, ke se fakailoga tino, kae ke uiga talimalo. I te taimi e sukesuke ei koe ki te mataupu, ke fesili ifo ki a koe eiloa: ‘Ne a aku mea e mafai o tauloto mai taina mo tuagane kolā ne tumau i te fakatau fakaasi atu ne latou te alofa faitalia a tulaga faiga‵ta?’
FAI PELĀ ME SE TINO TAUSI TE FILEMU
4. E ‵tusa mo te Mataio 5:23, 24, kaia e ‵tau ei mo tatou o fai ke maua se va filemu mo se taina telā e ita mai ki a tatou?
4 Ne akoako ne Iesu tatou ki te tāua ke fai ke maua se va filemu mo se taina telā e ita mai ki a tatou. (Faitau te Mataio 5:23, 24.) Ne faka‵mafa mai ne ia te tāua ke fakatumau a va fealofani mo nisi tino māfai e ma‵nako tatou o fakafiafia te Atua. E fiafia a Ieova māfai e fai ne tatou te ‵toe mea e mafai ke maua se va filemu mo ‵tou taina. Ka se talia ne ia ‵tou tapuakiga māfai e tumau tatou i te ita fakamoemoe ki se tino kae ita ma taumafai ke maua se va filemu.—1 Ioa. 4:20.
5. Se a te mea ne fakafaigata ei ki se taina ke fai ke maua se va filemu?
5 Kāti ka faigata ki a tatou ke fai ke maua se va filemu. Kaia? Mafaufau ki te mea ne tupu ki a Mark.b Ne logo‵mae a ia i pati fakamasei kae sē ‵lei ne fai ne se taina e uiga ki a ia, ki nisi tino i te fakapotopotoga. Ne saga atu pefea a Mark ki ei? Ne fai mai a ia “Ne seki mafai ne au o fa‵ki kae ne kaitaua malosi au ki a ia.” Fakamuli ifo, ne salamō a Mark i ana mea ne fai kae taumafai o fakatoese ki te taina kae ke toe maua ne lāua se va filemu. Kae ne seki talia ne te taina a taumafaiga a Mark. Muamua la, ne mafaufau ifo a Mark, ‘Se a te aoga e taumafai ei au o faka‵lei aka te mā va māfai e se manako a ia ke maua se va filemu?’ Kae ne fakamalosi atu te ovasia o te seketi ki a ia ke mo a ma ‵fiu vave. Se a te mea ne fai ne Mark?
6. (a) Ne a taumafaiga a Mark ne fai ke maua se va filemu? (e) Ne fakagalue pefea ne Mark te Kolose 3:13, 14?
6 I te taimi ne iloilo ei ne Mark ana mafaufauga, ne iloa aka ne ia me e se lasi te loto maulalo i a ia kae ne mafaufau a ia me e ‵lei atu a ia i nisi tino. Ne iloa ne ia me e ‵tau mo ia o ‵fuli tena kilokiloga. (Kolose 3:8, 9, 12) Ne toe fanatu a ia ki te taina tenā kae fakatoese atu mo te loto maulalo mō ana mea ne fai. Ne tusi foki ne Mark a tusi ki te taina, kae fakatoese atu ki a ia kae fakamolemole atu me mafai o toe taugasoa lāua. Ne avatu foki ne Mark a tamā meaalofa kolā e mafaufau a ia me ka fiafia ki ei te taina. Se mea fakafanoanoa me ne tumau loa te taina tenā i te sē fiafia ki a ia. Kae ui ei, ne tumau loa a Mark i te fakalogo ki te fakatonuga a Iesu ke alofa ki tena taina kae ke fakamagalo ne ia. (Faitau te Kolose 3:13, 14.) Kafai foki loa e se fia ‵saga mai a nisi tino ki ‵tou taumafaiga ke maua se va filemu, ko te alofa tonu faka-Kelisiano ka fesoasoani mai ke fakamagalo ne tatou a latou kae ke ‵talo ke maua se ikuga ‵lei.—Mata. 18:21, 22; Kala. 6:9.
E uke a auala e mafai o fakaaoga ke tanu ki ei a lagonaga sē ‵lei (Onoono ki te palakalafa e 7-8)c
7. (a) Se a te mea ne fakamalosi mai a Iesu ke fai ne tatou? (e) Se a te tulaga faigata ne fepaki mo se tuagane e tokotasi?
7 Ne fakamalosi mai a Iesu ki a tatou ke fai ki nisi tino a mea kolā e ma‵nako tatou ke fai mai ki a tatou. Ne toe fai mai a ia me e se ‵tau o a‵lofa fua tatou ki tino kolā e mafai o toe taui mai ne latou te ‵tou a‵lofa. (Luka 6:31-33) E tiga e se ti tupu te mea tenei, e a māfai ko se fia faipati atu io me se fia fakatalofa atu se tino i te fakapotopotoga ki a koe? Tenā eiloa te mea ne fepaki mo Lara. Ana muna: “Ne seki fia faipati mai se tuagane ki a au, kae seiloa ne au me kaia. Ne faigata ki a au kae ne seki fiafia au o fano ki fakatasiga.” Muamua la, ne fai aka a Lara: ‘E se ko au e ‵se. E se gata i ei, e mafau‵fau a nisi tino i te fakapotopotoga me e ‵kese a uiga o te tuagane tenei.’
8. Ne a mea ne fai ne Lara ke maua se va filemu, kae ne a mea e tauloto ne tatou mai tena tala?
8 Ne gasuesue a Lara o ‵teu te va o lāua. Ne ‵talo a ia ki a Ieova kae fakaiku aka ke faipati ki te tuagane tenā. Ne fai‵pati lāua e uiga ki te fakalavelave, ‵sai lāua kae ‵teu te lā va. Ne ‵lei a mea katoa. Ne toe fai mai a Lara: “Fakamuli ifo, ne toe fai foki ne te tuagane te mea tenā ki a au. Ne loto vāivāi eiloa au.” Muamua la, ne mafaufau a Lara me mafai fua o fiafia a ia māfai e ‵fuli ne te tuagane tenā ana faifaiga. Ne iloa fakamuli aka ne Lara me i te ‵toe mea ‵lei ke fai ne ia ko te tumau i te fakaasi atu a te alofa ki te tuagane tenā kae ke toka o “fakamagalo” a ia. (Efe. 4:32–5:2) Ne masaua ne Lara me i te alofa faka-Kelisiano tonu “e se ita fakamoemoe. E onosai i mea katoa, e talitonu ki mea katoa, e fakamoemoe ki mea katoa, e kufaki i mea katoa.” (1 Koli. 13:5, 7) Ne maua i ei ne Lara te filemu o te mafaufau. Fakamuli ifo, ne kamata o fiafia mai te tuagane tenā ki a ia. Kafai e taumafai koe o ‵teu te va filemu o koe mo ou taina mo tuagane kae tumau i te fakaasi atu te alofa ki a latou, e mautinoa eiloa me “ka nofo i luga i a koutou a te Atua o te alofa mo te filemu.”—2 Koli. 13:11.
KE MO A MA FAKAILOGA TINO
9. E ‵tusa mo te Galuega 10:34, 35, kaia e se ‵tau ei mo tatou o fakailoga tino?
9 A Ieova e se fakailoga tino. (Faitau te Galuega 10:34, 35.) Kafai e se fakailoga tino tatou, e fakamaoni atu i ei ne tatou me i a tatou ko ana tama‵liki. E faka‵logo tatou ki te fakatonuga ke a‵lofa ki ‵tou tuakoi e pelā mo tatou ki a tatou eiloa, kae fai ei ke fakatumau te filemu i ‵tou kāiga faka-te-agaga.—Loma 12:9, 10; Iako. 2:8, 9.
10-11. Ne manumalo pefea se tuagane i ana lagonaga sē ‵lei?
10 Kāti e faigata ki nisi tino ke se fakailoga tino latou. Mafaufau ki te mea ne tupu ki te tuagane telā e igoa ki a Ruth. I te taimi koi talavou ei, ne masei ‵ki te mea ne tupu ki a ia mo se tino mai se isi fenua. Ne pokotia pefea tou fafine i ei? Ne fai ‵tonu mai a Ruth: “Ne takalialia au ki mea katoa e uiga ki te fenua tenā. Ne mafaufau au me i tino katoa mai te fenua tenā e ‵pau katoa, ke oko foki loa ki taina mo tuagane.” Ne manumalo pefea a Ruth i ana lagonaga sē ‵lei konā?
11 Ne iloa ne Ruth me ‵tau mo ia o taua atu ki ana mafaufauga sē ‵lei konā. Ne faitau a ia ki tala mo lipoti mai te Yearbook e uiga ki te fenua tenā. Ana muna: “Ne taumafai malosi au o mafaufau ki mea ‵lei e uiga ki tino mai te fenua tenā. Ne kamata o lavea ne au a te lasi o te loto finafinau o taina mo tuagane i konā mō Ieova. Ne malamalama faka‵lei au me i a latou foki se vaega o te ‵tou kautaina i te lalolagi kātoa.” Mai tua ifo, ne iloa ne Ruth me uke a mea e ‵tau o fai ne ia. Ne fai mai a ia: “So se taimi e fetaui ei au mo taina mo tuagane mai te fenua tenā, e taumafai malosi au o fakataugasoa mo latou. E faipati au ki a latou kae fakamasani mo latou.” Ne a mea ne iku mai i ei? Muna a Ruth: “Fakamuli ifo, ne ‵galo atu katoa oku lagonaga sē ‵lei ki a latou.”
Kafai e a‵lofa malosi tatou “ki te kautaina kātoa” ka se fakailoga tino eiloa tatou (Onoono ki te palakalafa e 12-13)d
12. Se a te fakalavelave o te tuagane ko Sarah?
12 Nisi tino kāti e fakailoga tino kae seiloa ne latou. Pelā mo Sarah, ne mafaufau a ia me i a ia e se fakailoga tino me e se faka‵kese ne ia a tino ona ko olotou fenua, tulaga i mea tau tupe, io me ko olotou tiute i loto i te fakapotopotoga. Kae ne fai ‵tonu mai a ia: “Ne kamata o iloa ne au me i a au e fakailoga tino ‵ki.” I te auala fea? Ne tupu aka a Sarah i se kāiga kolā ne a‵koga faka‵lei kae ne manako fua a ia o fai taugasoa mo vaegā tino penā. I se taimi e tasi, ne fai atu a ia ki sena taugasoa: “Au e fai taugasoa fua mo taina tali‵tonu kolā ne a‵koga faka‵lei. Kae e se ko latou kolā e seki a‵koga faka‵lei.” E manino ‵lei me ‵tau o ‵fuli te kilokiloga a Sarah. E pefea la?
13. Ne a ‵tou mea ne tauloto mai te auala ne ‵fuli ei ne Sarah tena kilokiloga?
13 Ne fesoasoani atu se ovasia o te seketi ki a Sarah ke toe iloilo aka tena kilokiloga. Ne fai mai tou fafine: “Ne fakamālō mai a ia ki a au mō toku fakamaoni, aku tali ‵gali, mo te lasi o toku iloa i te Tusi Tapu. Oti, fai mai ei a ia me i te taimi e gasolo aka ei o lasi te ‵tou iloa, e ‵tau foki o ati aka ne tatou a uiga faka-Kelisiano pelā mo te loto maulalo, te agamalu, mo te alofa fakamagalo.” Ne fakagalue ne Sarah a pati a te ovasia o te seketi. Muna a tou fafine: “Ne iloa aka ne au me i te ‵toe mea tāua ko te fakaasi atu ne tatou a te atafai mo te alofa.” Tenā ne kamata ei o ‵kese tena kilokiloga ki taina mo tuagane. Ne fai mai a ia: “Ne taumafai au ke malamalama me ne a uiga o latou kolā ne fai ei ke tāua latou ki a Ieova.” Kae pefea tatou? E se ma‵nako eiloa tatou ke fia sili atu tatou i nisi tino ona ko ‵tou akoakoga! Kafai e a‵lofa malosi tatou “ki te kautaina kātoa” ka se fakailoga tino eiloa tatou.—1 Pe. 2:17.
KE UIGA TALIMALO
14. E ‵tusa mo te Epelu 13:16, e pefea a lagonaga o Ieova ki a tatou māfai e uiga talimalo tatou?
14 E fakatāua eiloa ne Ieova te uiga talimalo. (Faitau te Epelu 13:16.) E kilo a ia ki ei e pelā me se vaega o ‵tou tapuakiga, kae maise māfai e fesoasoani atu tatou ki tino fakaa‵lofa. (Iako. 1:27; 2:14-17) Tela la, e fakamalosi mai te Tusi Tapu ki a tatou ke “fakatumau te uiga talimalo.” (Loma 12:13) Kafai e uiga talimalo tatou, ko fakaasi atu ei ne tatou te atafai, te a‵lofa mo te ‵tou ma‵nako o fai taugasoa mo latou. E fiafia eiloa a Ieova māfai e ‵kai kae inu fakatasi tatou mo nisi tino, io me fakamāumāu ‵tou taimi mō latou. (1 Pe. 4:8-10) Kae e uke a mea faiga‵ta kolā e mafai o taofi ei tatou mai te fakaasi atu o te uiga talimalo.
“I aso mua, ne seki fia fakaasi atu ne au te uiga talimalo, kae ne ‵fuli au kae ko sili fakafia atu nei toku fiafia” (Onoono ki te palakalafa e 16)e
15-16. (a) Kaia e fakatalave ei a nisi tino o fakaasi atu te uiga talimalo? (e) Ne manumalo pefea a Edit i tena uiga ko te sē fia fakaasi atu te uiga talimalo?
15 E mafai o se uiga talimalo tatou ona ko ‵tou fakanofonofoga. Mafaufau ki te tala o te fafine ko mate tena avaga ko Edit. Mai mua o fai a ia pelā me se Molimau, e se manako a ia ke fesokotaki ki tino e tokouke. Ne mafaufau a Edit me ko nisi tino fua e mafai o fakaasi atu te uiga talimalo.
16 I te taimi ko fai ei a ia pelā me se Molimau, ne ‵fuli tena kilokiloga. Ne taumafai a ia o fakaasi atu te uiga talimalo. Ne fai mai a ia: “I te taimi ne faite ei te motou Fale Tapuaki fou, ne fai mai se toeaina me isi se tauavaga kolā ka ‵mai o fesoasoani ki te faiga o te galuega, kae fakamolemole mai a ia me talia ne au ke faka‵nofo lāua i toku fale mō se lua vaiaso. Ne masaua ne au te auala ne fakamanuia ei ne Ieova te fafine Salefata ko mate tena avaga.” (1 Tupu 17:12-16) Ne talia ne Edit ke ‵nofo te tauavaga ki a ia. E isi ne fakamanuiaga ne maua ne ia? Ne fai mai tou fafine: “Ne ‵fuli te lua vaiaso ki te lua masina. I te taimi tenā, ne ati aka ne matou se va fakataugasoa pili ‵ki.” Ne ati aka foki ne Edit ne va fakataugasoa pili ‵ki mo tino i te fakapotopotoga, telā se fakamanuiaga eiloa. Ko fai nei a ia pelā me se paenia, kae fiafia faeloa a ia o ‵kami a tino e ga‵lue tasi mo ia i te galuega talai ke olo atu o inu i tena fale. Ana muna: “A te tuku atu o mea e fai ei au ke fiafia! Kae e uke atu foki a fakamanuiaga ne maua ne au.”—Epe. 13:1, 2.
17. Se a te mea ne fatoa iloa aka ne Luke mo tena avaga?
17 Kāti a tatou ne tino uiga talimalo, kae mata e mafai o momea aka te ‵lei o ‵tou uiga tenā? Pelā mo Luke mo tena avaga, a lāua se tauavaga uiga talimalo. Se mea masani o ‵kami ne lāua ki te lā fale a lā mātua, kāiga, taugasoa ‵pili, mo te ovasia o te seketi mo tena avaga. Kae ne fai mai a Luke, “Ne fatoa iloa aka ne māua me ne ‵kami sāle fua ne māua a tino kolā e ‵pili ki a māua.” Ne a mea ne fai ne Luke mo tena avaga ke momea aka te ‵lei o te lā uiga talimalo?
18. Ne gasolo aka pefea o ‵lei atu te uiga talimalo o Luke mo tena avaga?
18 Ne ‵fuli te kilokiloga a Luke mo tena avaga i te otiga ne mafau‵fau lāua ki pati a Iesu: “Kafai e a‵lofa koutou ki tino kolā e a‵lofa atu ki a koutou, se a la te taui e maua ne koutou?” (Mata. 5:45-47) Ne iloa ne lāua me ‵tau o fakaakoako lāua ki a Ieova, telā e kaimalie ki tino katoa. Tenā ne fakaiku ei ne lāua ke ‵kami mai a taina mo tuagane kolā e seki ‵kami aka loa ne lāua. Muna a Luke: “E fia‵fia eiloa a matou katoa i vaegā taimi penei. E maua ne tino katoa a manatu fakamalosi.”
19. E fakamaoni atu pefea ne tatou me i a tatou ne soko o Iesu, kae se a te mea ka fai ne koe?
19 Ko oti ne iloilo aka ne tatou me i te lasi o te fakatau a‵lofa o tatou e aoga eiloa ki te faiga o tatou e pelā me ne tino tausi te filemu, e se fakailoga tino, kae e uiga talimalo. E ‵tau o tiaki ne tatou so se lagonaga sē ‵lei i a tatou kae ke a‵lofa malosi ki ‵tou taina mo tuagane mai ‵tou loto. Kafai e fai tatou penā, ka fia‵fia tatou kae fakamaoni atu i ei me i a tatou ne soko ‵tonu eiloa o Iesu.—Ioa. 13:17, 35.
PESE 88 Fai ke Iloa ne au ou Auala
a Muna a Iesu me i te alofa ko te fakailoga e iloa ei a Kelisiano ‵tonu. Ko te alofa ki ‵tou taina mo tuagane e fakamalosi ei tatou ke fai pelā me ne tino e tausi te filemu, e se fakailoga tino, kae e uiga talimalo. E mafai o faigata te mea tenei. Ka tauloto ne tatou mai i te mataupu tenei a manatu aoga ki te auala ke fakatumau faeloa te fakatau a‵lofa o tatou mai ‵tou loto.
b Ko oti ne ‵fuli aka a nisi igoa i te mataupu tenei.
c FAKAMATALAGA O ATA: Ko taumafaiga a se tuagane i te taimi muamua ke faka‵lei se fakalavelave kae seki taunu, kae e se ‵fiu eiloa a ia. Ana taumafaiga e uke ne fai ke fakaasi te alofa ne manuia eiloa.
d FAKAMATALAGA O ATA: Se taina matua e maua ne ia lagonaga me i tino i te fakapotopotoga e se fia ‵kau fakatasi mo ia.
e FAKAMATALAGA O ATA: Se tuagane telā ne ita muamua ma fakaasi atu te uiga talimalo ko ‵fuli ana mafaufauga, kae ne fiafia malosi a ia i te faiga o te ‵fuliga tenā.