Kaia e se Tali ei ne te Atua a ‵Talo Katoa?

A te ‵tou Tamana faka-te-lagi, ko Ieova te Atua, e toka kae fiafia o fakalogologo ki ‵talo a tino kolā e fai atu mo te loto fakamaoni. Kae e isi ne mea kolā e mafai o taofi ei a ia mai te tali mai ki ‵tou ‵talo. Ne a la mea konā, kae se a te mea e ‵tau o masaua ne tatou māfai e ‵talo atu? Konei la nisi pati fakatonutonu mai te Tusi Tapu.

Se potukau i te lotu, e faitau ne latou se ‵talo mai se tusi ‵talo.

“Kafai koe e ‵talo, sa fakafoki‵foki au pati.”—Mataio 6:7.

A Ieova e se manako ke fakafoki‵foki ne tatou a ‵talo tauloto io me faitau ne tatou mai se tusi ‵talo. Kae e manako a ia ke fai‵pati atu tatou mai ‵tou loto. Mafaufau la ki te fakakaitaua māfai e fakafokifoki mai faeloa ne sou taugasoa se tala ki a koe. A taugasoa ‵lei e fakaasi atu ne latou a mea i olotou loto mo te fakamaoni. Kafai e ‵talo atu tatou i ‵tou pati eiloa, ko fakaasi atu ne tatou a mea i ‵tou loto ki te ‵tou Tamana faka-te-lagi.

Se tagata e kilo atu ki luga i te taimi e soi ei ne ia se tiketi i te lotto.

“Kafai e fakamolemole atu koutou, e se maua ne koutou me e fakamolemole atu koutou mō se pogai sē tonu.”—Iakopo 4:3.

E mautinoa eiloa me ka se fakamoe‵moe tatou me ka tali mai ne te Atua ‵tou ‵talo, māfai ne fakamolemole atu tatou ki mea kolā e iloa ne tatou me e se manako a ia ke fai ne tatou io me ke maua ne tatou. E pelā me se fakaakoakoga, e mata, ka tuku atu ne Ieova te manuia ki se tino kemupolo māfai ko oti ne fakailoa mai ne ia ke ‵kalo kea‵tea tatou mai te kaimanako mo talitonuga fakataulaitu e uiga ki te manuia? (Isaia 65:11; Luka 12:15) E mautinoa eiloa me e se fakamoe‵moe tatou ke tali mai ne Ieova a vaegā ‵talo penā! Ko te mea ke tali mai ne te Atua a ‵tou ‵talo kolā e fai atu ki a ia, e ‵tau o fakamautinoa aka ne tatou ke ‵talo atu tatou e ‵tusa mo mea kolā e fakatonu mai ne ia i te Tusi Tapu ke fai ne tatou.

Se faifeau e ‵talo atu mō se potukau o sotia.

“A te tino telā e ita ma fakalogo ki te tulafono—a tena ‵talo se mea fakatakalialia.”—Faataoto 28:9.

I taimi o te Tusi Tapu, ne seki tali ne te Atua a ‵talo a tino kolā ne ‵teke atu ki ana tulafono amio‵tonu. (Isaia 1:15, 16) Ne seki ‵fuli eiloa ana lagonaga. (Malaki 3:6) Kafai e ma‵nako tatou ke tali mai ne te Atua a ‵tou ‵talo, e ‵tau o fai ne tatou te ‵toe mea e mafai ke ola e ‵tusa mo ana tulafono. Kae e a māfai ne fai ne tatou a mea ‵se i aso mua? E mata, e fakauiga i ei me ka se fakalogologo mai eiloa a Ieova ki a tatou? Ikai! Kafai e sala‵mo tatou ki ‵tou mea ‵se ne fai i aso mua kae fai te ‵toe mea e mafai ke fakafiafia a ia, ka alofa eiloa a ia o fakamagalo tatou.—Galuega 3:19.

“Me ko so se tino e fanatu ki te Atua e ‵tau mo ia o talitonu me e ola a ia kae e tuku atu ne ia te taui ki a latou kolā e ‵sala malosi ki a ia.”—Epelu 11:6.

E se ‵talo atu fua tatou māfai ko loto mafatia io me manava‵se tatou. A te ‵talo se fakaasiga o te ‵tou fakatuanaki kae se vaega foki o te ‵tou tapuakiga ki te Atua. Kafai e se “fakamolemole atu faeloa a ia i te fakatuanaki,” ne fai mai te soko ko Iakopo, ko tena uiga, ko “se ‵tau mo te tagata tenā o fakamoemoe ke maua se mea mai i a Ieova.” (Iakopo 1:6, 7) Ke ati aka te fakatuanaki ki te Atua, e ‵tau o uke ‵tou taimi mo taumafaiga e fai ke iloa ‵lei ne tatou a ia mai te suke‵suke ki te Tusi Tapu. Ka fesoasoani mai ke iloa ne tatou tena loto kae ke ‵talo atu mo te loto tali‵tonu ki a ia.