Te Auala ke Mafai o Ola Koe i te Lalolagi Fou

E fakaasi mai i mataupu mai mua me ko pili o fakaseai atu ne te Atua a te olaga masei o tino fakatasi mo ana fakalavelave katoa. E mautinoa i a tatou me ka tupu eiloa te mea tenei. Kaia? Me ko oti ne folafola mai a te Muna a te Atua, ko te Tusi Tapu, penei:

“Ka fakaseai atu te lalolagi.”—1 IOANE 2:17.

E mautinoa i a tatou me e isi ne tino ka ‵sao, me e folafola mai foki te fuaiupu tenā mai luga, penei:

“Te tino telā e fai ne ia te loto o te Atua ka tumau eiloa ki te se-gata-mai.”

Tela la, a te ‵toe mea tāua e ‵tau o fai ke ‵sao tatou ko te faiga o te loto o te Atua. Ke iloa ne tatou a te loto o te Atua, e ‵tau o iloa muamua ne tatou a ia.

“KE ILOA TONU” TE ATUA KO TE MEA KE SAO KOE I TE GATAGA

Ne fai mai a Iesu: “Tenei te uiga o te ola se-gata-mai, ke iloa tonu ne latou a koe, ko te Atua tonu e tokotasi.” (Ioane 17:3) Ke sao i te gataga kae ke ola ki te se-gata-mai, e ‵tau o “iloa tonu” ne tatou a te Atua. Ko tena uiga, e uke atu a mea e ‵tau o fai ne tatou i tafa o te iloa atu me e ola te Atua io me ko nai manatu ‵tonu fua e uiga ki a ia. E ‵tau o fai taugasoa tatou mo ia. E pelā mo so se va fakataugasoa telā e ma‵nako tatou o fakamalosi aka, e ‵tau o fakamāumāu ‵tou taimi ki ei. E ‵pau foki eiloa mo te fakatumauga o te ‵tou va fakataugasoa mo te Atua. Mafaufau ki nisi muna‵tonu tāua ko iloa ne tatou mai te Tusi Tapu kolā ne fesoasoani mai ke ati aka kae fakatumau se va fakataugasoa mo te Atua.

FAITAU KI TE MUNA A TE ATUA, KO TE TUSI TAPU, I ASO KATOA

E ‵kai faeloa tatou ki meakai ke tumau i te ola. Kae ne fai mai a Iesu: “E se ko meakai fua e ola ei te tagata, kae ko pati katoa kolā e ‵to mai i te gutu o Ieova.”—Mataio 4:4.

I aso nei, e maua ne tatou a pati a Ieova i loto i te Tusi Tapu. I te taimi e sukesuke koe ki ei, ka iloa ei ne koe a muna‵tonu tāua e uiga ki te fesokotakiga o tino mo te Atua i aso mua, aso nei, mo aso mai mua.

‵TALO KI TE ATUA MŌ SE FESOASOANI

Ne a au mea e mafai o fai māfai e fia tautali atu koe ki te takitakiga a te Atua kae faigata ke fakagata aka ne koe a mea kolā e fai mai a ia me e ma‵sei? Kafai e fai penā, ko mafai ei o fesoasoani atu ki a koe māfai ko iloa tonu ne koe a te Atua.

Mafaufau ki se fafine ka fakaigoa ne tatou ki a Sakura, telā ne ola i se olaga fai valevale. I te taimi ne kamata o sukesuke a ia ki te Tusi Tapu, ne iloa ne ia a te fakatonuga a te Atua ke “‵tele kea‵tea mai i amioga fakatauavaga sē ‵tau.” (1 Kolinito 6:18) Ne ‵talo a Sakura ki te Atua ke maua te malosi kae ne mafai o fakagata ne ia te faifaiga masei tenā. Kae koi ‵tau eiloa o ‵teke atu a ia ki tofotofoga. “Kafai ko ‵sae aka a mafaufauga ma‵sei,” e fai mai tou fafine, “E faipati ‵tonu atu au ki a Ieova i ‵talo, me e se mafai eiloa ne au o ‵teke tokotasi atu ki te mea tenei. A te malosi o ‵talo ne fai ei ke pili atu au ki a Ieova.” E pelā mo Sakura, e lau i miliona o tino ko iloa tonu ne latou te Atua. E tuku atu ne ia ki a latou a te malosi e manakogina ke fai a ‵fuliga i olotou olaga kae ke ola i se olaga telā e fakafiafia atu ki a ia.—Filipi 4:13.

Kafai ko iloa ‵lei ne koe a te Atua, ko te gasolo aka foki o “iloa ne te Atua” a koe e pelā me se taugasoa pele. (Kalatia 4:9; Salamo 25:14) Tenā ko mafai ei o sao atu koe ki loto i te lalolagi fou a te Atua. Kae ka pefea te olaga i te lalolagi fou? Ka fakamatala mai te mea tenā i te suā mataupu.