Ko mafai nei o fakatokatoka koe ki te lalolagi fou telā ko pili mai
Ko Pili Mai te Lalolagi Palataiso!
Ne faite ne te Atua a te lalolagi ko te mea ke ola i ei a tino amio‵tonu ki te se-gata-mai. (Salamo 37:29) Ne faka‵nofo ne ia te tauavaga muamua, ko Atamu mo Eva, i te fatoaga gali o Etena, kae tuku atu ki a lāua mo lā tama‵liki a te tiute ke fakagalue te laukele kae tausi atu ki ei.—Kenese 1:28; 2:15.
Ko ‵kese ‵ki te lalolagi i aso nei mo te Palataiso ne manako ki ei te Atua. Kae ne seki ‵fuli eiloa te mafaufau o te Atua. Ka fakataunu pefea ne ia a tena fuafuaga muamua? E pelā mo mea ne fakaasi mai i mataupu mai mua, ka se fakaseai ne te Atua a te paneta. I lō te fai penā, ka talia ne ia a tino fakamaoni ke ‵nofo i ei. Kafai ko fakataunu ne te Atua tena folafolaga, ka pefea te olaga i te lalolagi?
Se pulega i te lalolagi kātoa
Kafai ko fakaoko mai a te pulega fou a te Atua mai te lagi ki lalo i tino katoa i te lalolagi, i se taimi pili mai mua nei, ka fai a te lalolagi e pelā me se koga fiafia telā e mafai o ola fealofani i ei a tino kae fai mea ‵lei mo galuega fakamalie loto. Ko oti ne ‵tofi ne te Atua a Iesu Keliso ke pule ki te lalolagi. E ‵kese mo tino pule e tokouke i aso nei, ka saga tonu a Iesu ki mea e ‵lei ei ana tino. Ka fakavae tena pulega ki te alofa, kae ka fai a ia mo fai se Tupu atafai, alofa fakamagalo, kae ‵lei.—Isaia 11:4.
Te ‵kau fakatasi mo te fealofani i te lalolagi kātoa
A tino kolā ka ola i te lalolagi fou ka se mavae‵vae ona ko fenua io me ko matakāiga. Ka ‵kau fakatasi a tino katoa. (Fakaasiga 7:9, 10) A tino katoa kolā e ‵nofo i te lalolagi ka a‵lofa ki te Atua mo olotou tuakoi, kae ka ga‵lue fakatasi latou mo te filemu ke fakataunu te fuafuaga muamua a te Atua, ke tausi atu ki te lotou koga ‵nofo, ko te lalolagi.—Salamo 115:16.
Ka fakapaleni aka a mea katoa i te enivalomene
Kafai ko pule mai te Malo o te Atua ki te lalolagi, ka pule katoatoa atu a te Mafuaga ki vaega katoa o tau-o-aso, kae fakapaleni faka‵lei aka. (Salamo 24:1, 2) I te nofoga i te lalolagi, ne fakaasi mai ne Iesu se tamā ata fua o te ‵mana o te Atua i te taimi ne faka‵lei fakavave ne ia se matagi fakamataku. (Maleko 4:39, 41) Mai lalo i te pulega a Keliso, ka seai se tino e mataku ki fakalavelave o te natula. Ka fai ne te Malo o te Atua ke fealofani a tino mo manu kae se toe fakamasei ne tino a te enivalomene.—Hosea 2:18.
Malosi ‵lei katoatoa mo meakai e uke ‵ki
Ka malosi ‵lei katoatoa a tino katoa. Ka seai se tino e masaki, gasolo aka o matua, io me mate. (Isaia 35:5, 6) Ka ‵nofo a tino i fakanofonofoga ‵gali kae ‵ma e pelā mo te koga ne ‵nofo i ei te tauavaga muamua i te fatoaga o Etena. I te lalolagi fou, ka ‵fua mai ne te laukele a mea‵kai e uke e pelā loa mo Etena, kae ka lava eiloa mō tino katoa i te lalolagi. (Kenese 2:9) E pelā mo te fenua mua o te Atua ko Isalaelu, a tino katoa i te Palataiso ‘ka ‵kai latou ke ma‵kona i olotou meakai.’—Levitiko 26:4, 5.
Te filemu mo te tokagamalie tonu
Mai lalo i te pulega a te Atua i te lalolagi kātoa, ka maua ne tino katoa a te filemu kae fakatau atafai atu i se auala ‵lei. Ka se toe ai ne taua, te fakaaoga ‵se o te tulaga pule, kae ka se toe fakatau‵fai foki a tino ke maua a mea e tausi ki ei te olaga. E folafola mai te Tusi Tapu: “Ka saga‵saga a latou taki tokotasi mai lalo i olotou vine mo olotou mati, kae ka seai se tino e ma‵taku latou ki ei.”—Mika 4:3, 4.
Ka uke a fale mo galuega fakamalie loto
A kāiga katoa ka isi ne olotou fale mo olotou ‵nofo e aunoa mo te manava‵se i a latou ma afuli kea‵tea, kae ka fakamalie loto foki a galuega katoa e fai ne tatou. E pelā mo pati i te Tusi Tapu, a tino kolā e ola i te lalolagi fou a te Atua “ka se sona galue ‵mafa latou kae seai se mea e maua mai i ei.”—Isaia 65:21-23.
Te ‵toe akoakoga ‵lei
E folafola mai te Tusi Tapu: “Te lalolagi ka ‵fonu eiloa i te iloaga o Ieova.” (Isaia 11:9) A tino kolā ka ola i te lalolagi fou, ka tauloto mai te poto o te lotou Mafuaga, ko Ieova, e pelā foki mo mea ‵gali ne faite ne ia. Ka se fakaaoga ne latou te lotou poto ke faite a meatau io me ke fakalogo‵mae atu ki nisi tino. (Isaia 2:4) I lō te fai penā, ka tauloto latou ke ola filemu fakatasi mo nisi tino kae ke tausi atu foki ki te lalolagi.—Salamo 37:11.
Te ola se-gata-mai
Ne fakatoka faka‵lei eiloa ne te Atua a te lalolagi ko te mea ke mafai o ola fia‵fia tatou i aso takitasi. Ne manako a ia ke ola a tino ki te se-gata-mai i te lalolagi. (Salamo 37:29; Isaia 45:18) Ko te mea ke fakataunu tena fuafuaga muamua, “ka fakaseai ne [te Atua] te mate ki te se-gata-mai.” (Isaia 25:8) E folafola mai te Tusi Tapu me “ka se toe ai se mate, ka se toe ai foki se fanoanoa, se tagi io me se ‵mae.” (Fakaasiga 21:4) Ka tuku atu ne te Atua ki tino katoa—ko latou kolā ne faka‵sao ne ia i te taimi ne fakaseai ne ia te lalolagi masei tenei mo tino ‵mate e tokouke kolā ka faka‵tu aka ne ia i te lalolagi fou—a te avanoaga ke ola ki te se-gata-mai.—Ioane 5:28, 29; Galuega 24:15.
Ke oko mai nei, e lau i miliona a tino i te lalolagi kātoa, ko fakatokatoka ki te olaga fou telā ko pili mai. E tiga eiloa e se ‵lei katoatoa, kae ko oti ne taumafai latou ke fai mo tino e manako te Atua ke ola i tena lalolagi fou. E pefea la? Mai te tauloto e uiga ki a Ieova te Atua mo te tino ne uga mai ne ia, ko Iesu Keliso.—Ioane 17:3.
Fai ke iloa ne koe a mea e ‵tau o fai ke sao atu koe i te gataga o te lalolagi tenei kae ke ola i te lalolagi fou telā ko pili mai. Ke talia se akoakoga faka-te-Tusi Tapu mai se Molimau a Ieova, mai te fakaaogaga o te tusi ko te Ke Ola ki te Se-Gata-Mai!