1921 Selau Tausaga Ko ‵Teka

“SE A te galuega tāua e olioli tatou ke fai i te tausaga nei?” Ne sae mai a te fesili tenā i te Watch Tower i a Ianuali 1, 1921, ki Tino A‵koga ki te Tusi Tapu loto finafinau. Ke tali aka te fesili tenā, ne siki mai a pati i te Isaia 61:1, 2, telā e fakamasaua mai i ei a te lotou galuega ke talai atu. “Me i a Ieova ne fakaeke ne ia au ke folafola atu te tala ‵lei ki tino agamalu . . . , ke folafola atu te tausaga o te loto ‵lei o Ieova mo te aso o te taui ma sui o te ‵tou Atua.”

TINO TALAI LOTO MA‵LOSI

Ke fakataunu te lotou galuega, e ‵tau o loto ma‵losi a Tino A‵koga ki te Tusi Tapu. E ‵tau mo latou o folafola atu a te “tala ‵lei” ki tino agamalu kae e penā foki a te “aso o te taui ma sui” ki tino ma‵sei.

A te taina ko J. H. Hoskin, telā ne nofo i Kanata, ne talai atu mo te loto malosi faitalia a ‵tekemaiga. I te 1921, ne fetaui a ia mo se faifeau Metotisi. Ne kamata te sau‵talaga ne te taina ko Hoskin penei: “E ‵tau mo tāua o sau‵tala faka‵lei ki te Tusi Tapu, kae kafai e isi ne mea e se lotoma‵lie tāua ki ei, e mafai loa o fakaoti faka‵lei ‵ta sau‵talaga i se auala filemu kae tumau te va fakataugasoa o tāua.” Kae ne seki fai loa penā. Ne fai mai te taina ko Hoskin: “Ne sau‵tala fua māua mo nai minute kae ‵pono ‵tuki mai ne [te faifeau] a te mataloa, telā ne mafaufau au me ne mafai loa o mafā te kilasi i tena mataloa.”

Ne pakalaga atu te faifeau: “Kaia e se fano ei koe o faipati ki tino sē Kelisiano?” Ne seki faipati atu a te taina ko Hoskin, kae i tena fanoga, ne fai ifo a ia, ‘Ne leake au me ne faipati au ki se tino penā!’

I te aso mai tua, i te faiga ne te faifeau tena lāuga, ne fakamasei ‵ki ne ia te taina ko Hoskin. “Ne fai atu a ia ki tena kau lotu ke fakaeteete i a au, kae fai atu me i a au ko te ‵toe tino loi eiloa ne tō atu ki te lotou fa‵kai kae e ‵tau au o tamate,” ko pati a te taina ko Hoskin. Ne seki faka‵tuka atu a te mea tenei ki a ia, ne tumau eiloa tena talaiga kae maua ne ia a ikuga ‵gali. Ana muna: “Ko se faka‵tau eiloa i te gali o taku galuega talai i konā. Ke oko ki nisi tino, ne fai mai, ‘E iloa ne au me i a koe se tagata o te Atua!’ kae fai mai me kafai e manako au ki se mea, e mafai o fesoasoani mai latou.”

SUKESUKEGA TOTINO MO SUKESUKEGA A TE KĀIGA

Ke fesoasoani ki tino fia‵fia ke ga‵solo ki mua, ne ‵lomi ne Tino A‵koga ki te Tusi Tapu a polokalame mo fai a sukesukega i The Golden Age.a A te vaega ko te Juvenile Bible Study e aofia i ei a fesili mō mātua ke sau‵tala fakatasi mo olotou tama‵liki. Ne ‵tau mo mātua o “‵sili atu a fesili konei ki olotou tama‵liki kae fesoasoani atu ki a latou ke ‵sala te tali i loto i te Tusi Tapu.” A nisi fesili pelā mo te “E fia a tusi i te Tusi Tapu?,” e akoako mai i ei a nisi manatu ‵tonu faigofie. A nisi fesili pelā mo te “E mata, e ‵tau mo Kelisiano ‵tonu katoa o fakamoe‵moe ke fakasaua latou?,” e fakatoka ei a tama‵liki ke fai mo tino talai loto ma‵losi.

A te vaega ko te Advanced Studies in the Divine Plan of the Ages e maua ei ne Tino A‵koga ki te Tusi Tapu ma‵tua, a fesili ke mafaufau ‵loto ki ei kolā e maua i te tusi muamua ko te Studies in the Scriptures. E lau i afe a tino fai‵tau ne maua ne latou a mea aoga mai i vaega konei, kae ne faka‵pula mai i The Golden Age i a Tesema 21, 1921, me ka taofi aka a fakatokaga konei. Kaia ne fai fakavave se ‵fuliga penei?

SE TUSI FOU!

Te tusi ko *The Harp of God*

Se tamā pepa mo itulau o te tusi ke faitau ki ei

Se tamā pepa mo fesili i ei

Ne iloa aka ne latou kolā e fai te takitakiga me e ‵tau mo tino a‵koga ‵fou o sukesuke ki muna‵tonu faigofie i se auala telā e fakatoka faka‵lei. Ona ko te mea tenā, ne ‵tala mai i ei a te tusi ko The Harp of God i a Novema 1921. A tino fia‵fia kolā ne talia ne latou a te tusi, ne fai eiloa ne latou olotou sukesukega ki te Tusi Tapu i The Harp Bible Study Course. A te faiga ne te tino a te sukesukega tenei, ne fesoasoani atu ki tino fai‵tau ke iloa ne latou “a te fuafuaga a te Atua ke fakamanuia ne ia a tino ki te ola se-gata-mai.” Ne fai pefea te sukesukega tenei?

Kafai e talia ne se tino a te ‵kopi o te tusi, e maua foki ne ia se tamā pepa telā e fakaasi mai i ei a itulau o te tusi ke faitau ki ei. I te vaiaso mai tua, e maua ne ia se tamā pepa mo te fakasologa o fesili kolā e fakavae ki ana mea ne faitau. I te fakaotiga o te tamā pepa tenā, e toe tuku mai i ei a nisi itulau ke faitau ki ei mō te vaiaso fou.

E maua ne te tino akoga i te meli i vaiaso takitasi mō se 12 vaiaso se tamā pepa fou mai i te fakapotopotoga. E masani o lafo atu a tamā pepa konei ne tino ma‵tua io me fakamasakisaki i te fakapotopotoga. E pelā mo te mea ne fai mai ne Anna K. Gardner, mai i Millvale, Pennsylvania, U.S.A.: “I te taimi ne ‵tala mai ei The Harp of God, ne maua ei ne Thayle, toku taina fakamasakisaki, a mea e uke atu ke fai ne ia, ko te lafoatuga o tamā pepa o fesili konā i vaiaso takitasi.” Kafai ko oti te akoga, ko asi atu ei se tino mai te fakapotopotoga ke faka‵soko tena akoga faka-te-Tusi Tapu.

Ko Thayle Gardner i tena nofoga fakatekateka

TE GALUEGA I ASO MAI MUA

I te fakaotiga o te tausaga, ne avatu ne te taina ko J. F. Rutherford se tusi ki fakapotopotoga katoa. Ne fai atu a ia me “ko sili atu nei te fakasalalauatuga mo te magoi o te talaiga e uiga ki te Malo i lō tausaga mua o te ‵tauga o fuataga.” Ne toe fai mai a ia e uiga ki aso mai mua: “Koi uke a galuega e ‵tau o fai. Fakamalosi atu ki tino ke ‵kau mai ki te galuega tafasili i te gali tenei.” E mautinoa me ne faka‵logo eiloa a Tino A‵koga ki te Tusi Tapu ki pati fakamalosi konei. I te tausaga 1922, ne fakasalalau atu ne latou mo te loto ma‵losi a te Malo i se auala fakaofoofogia.

Taugasoa Loto Ma‵losi

Ne fakaasi atu ne Tino A‵koga ki te Tusi Tapu a te alofa fakataina mai te fakatau fesoasoani. A latou ne taugasoa loto ma‵losi kolā “ne fanau mai mō taimi o te puapuaga,” e pelā mo te tala tenei.—Faata. 17:17.

I te Aso Lua, Me 31, 1921, a te mea ne taku ki te Tulsa Race Massacre ne tupu i Tulsa, Oklahoma, U.S.A., mai tua o te ‵peiga o se tagata uli ki te falepuipui ona ko ‵losiga ne fai me ne ta ne ia se fafine ‵kena. I te taimi ne olo atu ei se potukau o tāgata ‵kena e 1,000 tupu o taua atu ki se potukau foliki o tāgata uli, ne oko vave atu a te taua a latou ki te fa‵kai o tino uli i Greenwood, telā e sili atu i te 1,400 o fale mo pisinisi ne kaisoa a mea i ei kae ‵sunu. A te aofaki o tino ‵mate ne fakamau ki lalo e toko 36, kae kāti e lau i selau a te aofaki tonu.

Ne fakamatala mai ne te taina ko Richard J. Hill, se tagata uli o Tino A‵koga ki te Tusi Tapu kae ne nofo foki i Greenwood, a te mea ne tupu: “I te po ne fai ei te taua, ne fai te motou akoga ki te Tusi Tapu e pelā loa mo te masani. I te otiga o te akoga, ne lagona atu ne matou a fanafanaga i te fa‵kai. Ne olo matou o ‵moe kae koi fana‵fana eiloa.” I te tafataeao o te Aso Tolu, Iuni 1, ne gasolo aka o masei te tulaga tenā. “Ne o‵mai a nisi tino me kafai e ma‵nako matou ki se puipuiga, e ‵tau o olo matou ki te Fale Fai Fono.” Tenā ne olo fakavave atu ei a te taina ko Hill, tena avaga mo lā tama‵liki e toko lima ki te Fale Fai Fono o Tulsa. Ne ‵nofo atu i konā se toko 3,000 o tāgata mo fāfine uli kolā ne tausi ne sotia mai te Kautau, me ne uga mai latou ke faka‵lei te fakalavelave.

I te taimi foki loa tenā, ne fai ne te taina ko Arthur Claus, telā se tagata ‵kena, se fakaikuga mo te loto malosi. “I taku logoga me i tino faitaua ko ‵tele valevale fua i loto i te fa‵kai o Greenwood o kaisoa kae ‵sunu a fale o tino, ne fakaiku aka ne au ke asi atu ki toku taugasoa pele, ko te taina ko Hill.”

Ne akoako ne Arthur Claus se potukau o tama‵liki e toko 14 mai te fakaaogaga o The Harp of God

I tena okoatuga ki te fale, ne fakafetaui atu ki a ia a te tuakoi ‵kena o te taina ko Hill mo se fana. Ne mafaufau te tuakoi, telā se taugasoa foki o te taina ko Hill, me i a Arthur se tokotasi o te kau faka‵tupu taua. Ne pakalaga mai a ia: “Ne a au mea e fai i konei?”

“Moi fai ne seki lotomalie a ia ki taku tali, penei ko oti ne fana ne ia au,” ko pati a Arthur. “Ne fakamautinoa atu ne au ki a ia me i a au se taugasoa o te taina ko Hill kae ko oti ne vau sāle au ki tena fale.” Ne puipui faka‵lei eiloa ne te tuakoi mo Arthur a te fale mai tino kai‵soa.

Fakamuli ifo, ne iloa ne Arthur me i te taina ko Hill mo tena kāiga e ‵nofo i te Fale Fai Fono. Ne fakailoa atu ki a Arthur me e se mafai o tiaki ne se tino uli a te koga tenā e aunoa mo te sainaga a te Takitaki Kautau ko Barrett. Ne fai mai a Arthur: “Se mea faigata ke fanatu ki te takitaki kautau. I te taimi ne fai atu ne au ki a ia aku palani, ne fesili mai tou tagata: ‘E mafai o puipui kae tausi ne koe a manakoga o te kāiga tenei?’ Ne tali atu au mo te fiafia me e mafai ne au.”

Ne tele fakavave atu a Arthur ki te Fale Fai Fono mo te taliaga. Ne tuku atu ne ia ki te ofisa i konā telā ne fai mai: “A te mea tenei ne saina ne te takitaki kautau! E iloa ne koe me i a koe ko te tino muamua eiloa ke ave ne koe se tino mai konei i te aso nei?” E seki leva, kae ne maua atu a te taina ko Hill mo tena kāiga. Ne fakaofiofi a latou katoa ki loto i te motoka a Arthur kae olo atu ki tena fale.

Ne fakamautinoa aka ne te taina ko Claus ke puipui faka‵lei a te taina ko Hill mo tena kāiga. A tena loto malosi mo tena alofa fakataina ne fai mo fai se fakaakoakoga ‵lei ki nisi tino. Ne fai mai a Arthur: “A te tuakoi telā ne puipui ne ia te fale o Hill ne gasolo o fiafia ki te munatonu. Kae ne fia‵fia a nisi tino ki te fekau o te Malo me ne lavea ne latou a te seai o se fakakese‵kesega i lanu o tino kae e ‵pau katoa a tino tukugina atu o te Atua.”

a Ne ‵fuli te igoa o The Golden Age ki te Consolation i te 1937 kae toe ‵fuli ki te Ala Mai! i te 1946.