Fakatāua te Tauliaga ko te ‵Talo

1. E ‵tau o pefea te ‵tou kilokiloga ki te avanoaga ke mafai o ‵talo atu ki a Ieova?

KO MAUA eiloa ne tatou se tauliaga fakaofoofogia—ke fakapilipili atu ki te Tino telā ne faite ne ia te lagi mo te lalolagi e auala i ‵talo. Mafaufau la: E mafai o fakaasi atu ne tatou a mea katoa i ‵tou loto ki a Ieova i so se taimi mo so se ‵gana e aunoa mo te fakatokaga o se taimi ke fai penā. E mafai o ‵talo atu tatou ki a ia mai i se moega i te fa‵kaimasaki io me se potu i se falepuipui mo te loto tali‵tonu, me ka fakalogologo mai te ‵tou Tamana alofa ki a tatou. E se ma‵nako tatou ke fai valevale a te tauliaga tenei.

2. Ne fakaasi mai pefea ne te tupu ko Tavita me ne fakatāua ne ia te tauliaga ko te ‵talo?

² Ne fakatāua ne te tupu ko Tavita a te tauliaga ko te ‵talo. Ne usu atu a ia ki a Ieova: “Ke fai taku ‵talo e pelā me se mea manogi gali i mua o koe.” (Sala. 141:1, 2) I aso o Tavita, ne fakatoka eiloa mo te fakaeteete a mea manogi ‵gali kolā ne fakaaoga i te tapuakiga tonu ne faitaulaga. (Eso. 30:34, 35) A te fakasino atu o Tavita ki mea ma‵nogi, e fakaasi mai i ei me ne manako a ia ke mafaufau faka‵lei ki ana pati ka fai atu ki tena Tamana faka-te-lagi. Tenā foki te manakoga o tatou. E ma‵nako tatou ke fakafiafia atu ki a Ieova a ‵tou ‵talo.

3. Se a te kilokiloga e ‵tau o maua ne tatou māfai ko fakapilipili atu ki a Ieova i ‵talo, kae kaia?

³ Kafai e ‵talo tatou ki a Ieova, e ‵tau o ‵kalo keatea tatou mai i te fakafoliga atu me ko tō masani tatou mo ia. I lō te fai penā, e ‵talo atu tatou mo se kilokiloga āva malosi. Mafaufau ki fakaasiga fakaofoofogia kolā ne maua ne Isaia, Esekielu, Tanielu, mo Ioane. E kese‵kese a fakaasiga konā kae e isi se mea e ‵pau katoa i ei. E fakaata katoa mai i ei a Ieova e pelā me se Tupu telā e ‵malu kae fakaofoofogia. “Ne lavea ne [Isaia] a Ieova e sagasaga i se nofoga.” (Isa. 6:1-3) Ne lavea ne Esekielu a Ieova e sagasaga i luga i se kaliota afi kae fakatamilo ne “se mainaga lasi . . . e pelā me se nuanua.” (Eseki. 1:26-28) Ne lavea ne Tanielu a “Ia Telā Mai Aso Mua” e pei ki gatu ‵kena mo se ulaga afi mai i tena nofogaaliki. (Tani. 7:9, 10) Kae ne lavea ne Ioane a Ieova e sagasaga i luga i se nofogaaliki e fakatamilo ne te nuanua gali telā e foliga mai e pelā me se emela ‵lanu launiu. (Faka. 4:2-4) Kafai e mafau‵fau tatou ki te ‵malu sē fakanafagina o Ieova, e fakamasaua mai i ei ki a tatou a te tauliaga tafasili i te gali ke fakapilipili atu ki a ia i ‵talo mo te tāua ke fai penā mo te fakaaloalo lasi. Kae e ‵tau o ‵talo atu pefea tatou?

“E ‵TAU MO KOUTOU O ‵TALO ATU PENEI”

4. Se a te mea e tauloto ne tatou mai i pati kamata o te ‵talo fakaakoako i te Mataio 6:9, 10?

⁴ Faitau te Mataio 6:9, 10. I te lāuga i luga i te Mauga, ne akoako ne Iesu ana soko ke ‵talo atu i se auala telā e fakafiafia ki te Atua. Mai tua o ana pati “e ‵tau mo koutou o ‵talo atu penei,” ne taku atu muamua ne Iesu a mataupu tāua kolā e fetaui ‵tonu mo te fuafuaga a Ieova: te faka‵maluga o tena igoa; te oko mai o te Malo telā ka fakaseai atu ne ia a tino ‵teke katoa ki te Atua; mo fakamanuiaga i aso mai mua kolā ko oti ne fakatoka ne ia mō te lalolagi kae penā foki mo tino. Kafai e aofia a vaegā mataupu penā i ‵tou ‵talo, e fakaasi atu i ei me e tāua ki a tatou a te loto o te Atua.

5. E mata, se mea ‵lei ke ‵talo atu mō manakoga totino?

⁵ I te suā vaegā o te ‵talo, ne fakaasi atu ne Iesu me se mea ‵lei ke ‵talo atu e uiga mō manakoga totino. E mafai o fakamolemole atu tatou ki a Ieova ke tuku mai ‵tou mea‵kai mō te aso, ke fakamagalo mai ‵tou agasala, ke puipui tatou mai i fakaosoosoga kae ke faka‵sao tatou mai te tino masei. (Mata. 6:11-13) Kafai ko fakamolemole atu tatou ki a Ieova mō mea konei, e fakaasi atu i ei me e fakalagolago tatou ki a ia kae ma‵nako foki tatou ki tena taliaga.

6. E mata, e ‵tau fua o ‵talo atu tatou ki mea kolā ne taku mai i te ‵talo fakaakoako? Fakamatala mai.

⁶ Ne seki fakamoemoe a Iesu ke tau‵tali atu ana soko ki pati takitasi i te ‵talo fakaakoako tenā. I nisi ‵talo ne fai ne Iesu, ne taku atu ne ia a mataupu tai ‵kese kolā ne manavase a ia ki ei i te taimi tenā. (Mata. 26:39, 42; Ioa. 17:1-26) E penā foki loa, e mafai o ‵talo atu tatou ki so se mea e manava‵se tatou ki ei. Kafai ko ‵tau o fai ne tatou se fakaikuga, e mafai o ‵talo atu tatou mō te poto mo te malamalama. (Sala. 119:33, 34) Kafai ko kamata ne tatou se tōfiga faigata, e mafai o ‵talo atu tatou mō te poto mo te loto malamalama. (Faata. 2:6) E mafai ne mātua o ‵talo mō olotou tama‵liki, kae ko tama‵liki e mafai o ‵talo mō olotou mātua. Kae e ‵tau foki mo tatou katoa o ‵talo atu mō ‵tou tino a‵koga i te Tusi Tapu, mo latou kolā e talai tatou ki ei. E tonu, e ‵tau o uke atu a mea e aofia i ‵tou ‵talo i lō te akai atu fua.

7. Kaia e ‵tau ei mo tatou o tavae atu ki a Ieova i ‵talo?

⁷ E ‵tau o masaua ne tatou ke tavae atu ki a Ieova i ‵tou ‵talo. E seai eiloa se tino e ‵tau o sili atu a tavaega e tuku atu ki ei i lō te ‵tou Atua. A ia “e ‵lei kae e toka o fakamagalo.” A ia foki e “alofa fakamagalo kae alofa atafai, e tuai o ita kae ‵fonu i te alofa fakamaoni mo te fakamaoni.” (Sala. 86:5, 15) E maua eiloa ne tatou a pogai ‵lei ke tavae atu ki a Ieova ona ko ana uiga mo mea e fai ne ia.

8. Ne a nisi mea e ‵tau o fakafetai atu tatou ki a Ieova e uiga ki ei? (Salamo 104:12-15, 24)

⁸ I tafa o te tavae atu ki a Ieova i ‵tou ‵talo, e ‵tau foki o fakafetai atu tatou ki a ia mō mea fakaofoofogia e tuku mai ne ia. E pelā mo se mea e tasi, e mafai o fakafetai atu tatou ki a ia mō ‵lanu fakaofoofogia kolā e lavea atu i pulalakau, ko mea‵kai ‵gali kese‵kese e uke, mo fesokotakiga fakamalosi loto mo taugasoa pele. E tuku mai ne te ‵tou Tamana alofa a te mea tenei mo nisi mea e uke atu ko te mea fua ke fia‵fia tatou. (Faitau te Salamo 104:12-15, 24.) Kae e sili atu i te tāua, e fakafetai tatou ki a Ieova mō mea‵kai faka-te-agaga e lava kae ‵toe e tuku mai ne ia mo te fakamoemoega tafasili i te gali mō aso mai mua.

9. Se a te mea ka fesoasoani mai ke masaua ne tatou o fakafetai atu ki a Ieova? (1 Tesalonia 5:17, 18)

⁹ E faigofie ke puli i a tatou o fakafetai atu ki a Ieova mō mea katoa e fai ne ia mō tatou. Ne a mea e mafai o fesoasoani mai ke masaua ne tatou? E mafai o tusi ne koe se fakasologa o au fakamolemole kolā ko oti ne fai atu kae ke onoono faeloa ki ei me e mata, ko oti ne tali mai ne Ieova. Ka oti ko fai atu ei ne koe se ‵talo o fakafetai atu mō tena fesoasoani. (Faitau te 1 Tesalonia 5:17, 18.) Mafaufau ki te mea tenei: E fia‵fia kae fakatāua ne tatou māfai e fakaasi mai ne nisi tino te lotou fia‵fia ki a tatou. E penā foki loa, kafai e masaua ne tatou o fakafetai ki a Ieova mō te tali mai ki ‵tou ‵talo, e fakafiafia ‵ki ki tena loto. (Kol. 3:15) Se a la te suā pogai tāua e ‵tau ei o fakafetai tatou ki te Atua?

FAKAFETAI KI A IEOVA MŌ TENA TAMA PELE

10. E ‵tusa mo te 1 Petelu 2:21, ne a pogai e ‵tau ei o fakafetai atu ki a Ieova mō te ugamaiga o Iesu ki te lalolagi?

¹⁰ Faitau te 1 Petelu 2:21. E ‵tau o fakafetai tatou ki a Ieova mō te ugamaiga o tena Tama pele ke akoako tatou. E tauloto ne tatou a mea e uke e uiga ki a Ieova mo te auala ke fakafiafia atu ki a ia mai i te sukesuke ki te olaga o Iesu. Kafai e fakatuanaki tatou ki te taulaga a Keliso, e mafai o maua ne tatou se fesokotakiga alofa kae ‵pili mo Ieova te Atua mo se va filemu mo Ia.—Loma 5:1.

11. Se a te tusaga o Iesu i ‵tou ‵talo ki a Ieova?

¹¹ E fakafetai tatou ki a Ieova me e mafai o ‵talo atu tatou ki a ia e auala i tena Tama. A Iesu ko te auala telā e fakaaoga ne Ieova ke fakataunu i ei ‵tou fakamolemole. E fakalogo kae tali ne Ieova a ‵talo kolā e fai atu i te igoa o Iesu. Ne fakamatala mai ne Iesu te mea tenā: “So se mea e fakatagi mai ei koutou i toku igoa, ka fai eiloa ne au, ko te mea ke faka‵malugina te Tamana ona ko te Tama.”—Ioa. 14:13, 14.

12. Se a te suā pogai e fakafetai atu ei tatou ki a Ieova mō tena Tama?

¹² E fakamagalo ne Ieova ‵tou agasala ona ko te taulaga togiola a Iesu. E fakamatala mai i te Tusi Tapu me i a Iesu ko te ‵tou “faitaulaga sili [e sagasaga] i te feitu fakaatamai o te nofogaaliki o tena ‵Malu Sili i te lagi.” (Epe. 8:1) A Iesu ko te “‵tou tino fesoasoani telā e ‵nofo mo te Tamana.” (1 Ioa. 2:1) Ko oko eiloa i te ‵tou loto fakafetai ki a Ieova mō te tukumaiga ne ia o se Faitaulaga Sili loto alofa kae malamalama i ‵tou vāivāiga “telā e fakamolemole atu . . . mō tatou”! (Loma 8:34; Epe. 4:15) A tatou ne tino e se ‵lei katoatoa, tela la, e aunoa mo te taulaga a Iesu, ka se mafai ne tatou o fakapili‵pili atu ki a Ieova i ‵talo. E mautinoa me e lotomalie koe me e se tāitāi eiloa o lava a te fakaasiatuga o ‵tou loto fakafetai mō te meaalofa tāua telā ne tuku mai ne Ieova ki a tatou—te meaalofa ko tena Tama pele!

‵TALO MŌ OTOU TAINA MO TUAGANE

13. I te po mai mua o tena mate, ne fakaasi atu pefea ne Iesu me e alofa a ia ki ana soko?

¹³ I te po mai mua o tena mate, ne ‵talo a Iesu mō se taimi leva e uiga ki ana soko, kae fakamolemole atu ki tena Tamana “ke tausi ne [ia] latou ona ko te tino masei.” (Ioa. 17:15) Ko tafaga la te loto alofa o Iesu! Ko pili o fakafesagai a ia mō se tofotofoga faigata; kae ne manavase a ia ki te ‵lei o ana apositolo.

14. E fakaasi atu pefea ne tatou me e a‵lofa tatou ki ‵tou taina mo tuagane?

¹⁴ Mai te fakaakoako ki a Iesu, e se ‵saga fua tatou ki ‵tou manakoga totino. I lō te fai penā e ‵talo faeloa tatou mō ‵tou taina mo tuagane. Kafai e fai tatou penā, e faka‵logo tatou ki te fakatonuga a Iesu ke fakatau a‵lofa kae ke fakaasi atu ki a Ieova te lasi o te ‵tou a‵lofa ki ‵tou taina tali‵tonu. (Ioa. 13:34) A te ‵talo atu mō ‵tou taina mo tuagane e sē se mea fakamāumāu taimi. E fai mai te Muna a te Atua me i “te ‵talo a te tino amiotonu e malosi ‵ki kae magoi.”—Iako. 5:16.

15. Kaia e ‵tau o ‵talo tatou mō ‵tou taina tapuaki?

¹⁵ E ‵tau eiloa o ‵talo tatou mō ‵tou taina tapuaki me e fe‵paki latou mo tofotofoga e uke. E mafai o akai tatou ki a Ieova ke fesoasoani atu ki a latou ke kufaki i masaki, fakalavelave ‵tupu o te natula, taua, fakasauaga, io me ko nisi mea faiga‵ta. E mafai foki o ‵talo atu tatou mō ‵tou taina mo tuagane kolā ne loto fia‵fia o fesoasoani atu ki a latou kolā e ma‵nako ki ei. E mafai foki o iloa ne koe a tino kolā e fe‵paki mo vaegā tulaga faiga‵ta penā. Kaia e se taku atu ei ne koe olotou igoa i au ‵talo totino? E fakaasi atu ne tatou a te alofa fakataina tonu mai te akai atu ki a Ieova ke fesoasoani atu ki a latou ke kufaki.

16. Kaia e ‵tau o ‵talo atu tatou mō latou kolā e fai te takitakiga i va o tatou?

¹⁶ E fakatāua malosi foki ne latou kolā e fai ne latou te takitakiga i te fakapotopotoga a ‵talo a nisi tino mo mea aoga mai i ei. Tenā foki te mea ne manako ki ei a te apositolo ko Paulo. Ne tusi mai a ia: “‵Talo foki mō au, ke tuku mai a pati ki a au i te taimi e fakamaga ei toku gutu, ko te mea ke mafai ne au o faipati mo te loto toa o fakailoa atu te mea ‵funa kae tapu e uiga ki te tala ‵lei.” (Efe. 6:19) I aso nei, e isi foki ne taina ga‵lue malosi kolā e fai ne latou te takitakiga i va o tatou. E fakaasi atu ne tatou te ‵tou a‵lofa ki a latou mai te akai atu ki a Ieova ke fakamanuia atu ki olotou galuega.

TAIMI KOLĀ E SUI NE TATOU A NISI TINO I TE FAIGA O ‵TALO

17-18. Ne a nisi taimi e mafai o fakamolemole mai ke ‵talo tatou mō nisi tino, kae se a te mea e ‵tau o masaua ne tatou?

¹⁷ I nisi taimi, e ‵kami tatou ke fai se ‵talo mō nisi tino. E pelā mo se tuagane telā e fai ne ia se akoga faka-te-Tusi Tapu, e mafai o fakamolemole atu ki se tuagane telā e ga‵lue tasi lāua ke fai ne ia te ‵talo. Kāti e se iloa faka‵lei ne te tuagane fesoasoani a te tino akoga, tela la, kāti e ‵lei atu ki a ia ke fai ne ia te ‵talo fakaoti. I te auala tenā, e mafai o faigofie ke fakafetaui aka tena ‵talo ki manakoga o te tino akoga.

¹⁸ E mafai foki o fakamolemole atu ki se taina ke ‵talo i se fakatasiga mō te galuega talai, io me i se fakatasiga a te fakapotopotoga. A taina kolā e maua ne latou te tauliaga tenā, e ‵tau o masaua ne latou te pogai tonu o te fakatasiga. E se fakaaoga a ‵talo ke polopoloki ki ei te fakapotopotoga io me ke fai atu i ei a faka‵pulaga. Kae e pelā mo te ukega o fakatasiga a te fakapotopotoga, e ‵tusa mo te lima minute e fakaaoga ki te pese mo te ‵talo, tela la, a te taina telā e fai ne ia te ‵talo, e se ‵tau o fakaaoga ne ia a “pati e uke,” kae maise i te kamataga o se fakatasiga.—Mata. 6:7.

KE FAKAMUAMUA TE FAIGA O ‵TALO I TOU OLAGA

19. Se a te mea ka fesoasoani mai ke toka tatou mō te aso o te fakamasinoga a Ieova?

¹⁹ E ‵tau o sili atu nei te fakamuamua ne tatou o ‵talo i ‵tou olaga i te taimi ko pilipili atu ei tatou ki te aso o te fakamasinoga a Ieova. E ‵tusa mo te mataupu tenei, ne fai mai a Iesu: “Ke matapula‵pula faeloa kae ‵talo i taimi katoa ko te mea ke mafai o ‵sao koutou mai i mea katoa kolā e ‵tau o ‵tupu.” (Luka 21:36) Ao, a te ‵talo faeloa e fesoasoani mai ke tumau tatou i te matapula‵pula i te feitu faka-te-agaga ko te mea ke se ‵po tatou ne te aso o te Atua kae e se toka.

20. E mafai pefea o fai ‵tou ‵talo e pelā me ne mea manogi ‵gali?

²⁰ Ne a mea ko oti ne sau‵tala tatou ki ei? E fakatāua malosi ne tatou a te ‵tou tauliaga ko te ‵talo. E ‵tau o fakasino tonu atu ‵tou ‵talo ki mataupu kolā e fetaui ‵lei mo te fuafuaga a Ieova. E mafai foki o fakaasi atu ne tatou a te ‵tou loto fakafetai ki te Tama a te Atua mo tena pulega i te Malo, kae ‵talo foki tatou mō ‵tou taina tapuaki. Kae tonu eiloa, e mafai o ‵talo tatou mō ‵tou manakoga faka-te-foitino mo manakoga faka-te-agaga. Kafai e mafau‵fau faka‵lei tatou ki pati ka fai atu ne tatou i ‵tou ‵talo, e fakaasi atu ei me e fakatāua ne tatou a te tauliaga fakaofoofogia tenei. Ka fai eiloa a ‵tou pati e pelā me ne mea manogi ‵gali ki a Ieova—“se mea fakafiafia ki a Ia.”—Faata. 15:8.