Te Mea Tonu mo te Mea ‵Se: Se Fesili e Mafau‵fau Tatou Katoa ki ei

Kafai e manako koe o faimalaga atu ki se koga telā seki fano muamua ki ei, ne a au mea ka fai?

1. 1. Fano i te auala telā e mafaufau koe me e ‵tau mo koe o fano i ei.

2. 2. Tautali i nisi tino, mo te fakamoemoega me iloa ne latou te auala.

3. 3. ‵Sala atu ki se takitakiga fakatuagagina, pelā mo te GPS, se mape, io me se taugasoa fakatalitonugina telā e iloa ne ia te auala.

Kafai e filifili ne tatou te tasi io me ko te lua, ka oko eiloa tatou ki se koga kae e se ko te koga e ma‵nako tatou o olo ki ei. Kae kafai e filifili ne tatou te tolu, e tali‵tonu tatou me ka oko eiloa tatou ki te koga e ma‵nako tatou o olo ki ei.

A ‵tou olaga e fai pelā me se malaga—telā e fakamoe‵moe tatou ke iku atu ki se olaga fakafiafia i aso mai mua. A te oko mo te sē oko o tatou ki te koga tenā e faka‵na malosi loa ki te koga e maua i ei ne tatou a te takitakiga i te taimi e fai ei ‵tou fakaikuga.

E tiga eiloa a te ukega o ‵tou fakaikuga fai e aoga ki ‵tou olaga mō se taimi leva, kae ko nisi fakaikuga e sili atu i te tāua. E fakaata atu i ei a mea kolā e fakatāua ne tatou—ko ‵tou kilokiloga ki te mea tonu mo te mea ‵se. A vaegā fakaikuga penā ka aoga ki a tatou mo latou kolā e a‵lofa tatou ki ei mō se taimi leva, i taimi ‵lei mo taimi sē ‵lei. A fakaikuga konei e aofia i ei a mataupu e pelā mo:

• Faifaiga fakatauavaga mo te fakaipoipoga

• Fakamaoni, galuega, mo tupe

• Te auala ke puti aka a tama‵liki

• ‵Tou faifaiga ki nisi tino

E mafai pefea o mautinoa i a koe me i au filifiliga i feitu konei ka iku atu ki se olaga fiafia o koe mo tou kāiga i aso mai mua?

Tenei te fesili e mafau‵fau tatou taki tokotasi ki ei: Se a te mea ka fesoasoani mai ke fai ne au a fakaikuga ‵tonu e uiga ki te mea tonu mo te mea ‵se?

Ka fakamatala mai i te mekesini tenei a te pogai e ‵tau o talitonu koe ki pati i te Tusi Tapu e uiga ki te mea tonu mo te mea ‵se mo te auala e mafai o fesoasoani atu ki a koe.