Te Auala e Tau‵tali te Fakapotopotoga ki te Kilokiloga a Ieova ki Tino Fai Agasala

1. Ne a mea e manako a Ieova ke maua ne tino katoa?

NE FAITE ne Ieova a tino mo te saolotoga ke fai olotou filifiliga. E fakaaoga ne koe te meaalofa tenā māfai ko fai au fakaikuga. A te ‵toe fakaikuga tāua e mafai o fai ne se tino ko te fakaikuga ke tuku atu tena ola ki a Ieova kae ke aofia i Tena kāiga o tino tapuaki. E manako a Ieova ke fai penā a tino katoa. Kaia? Me e alofa a ia ki tino kae manako ke maua ne latou a toe mea ‵lei. E manako a ia ke maua ne latou se va fakataugasoa ‵lei mo ia kae ke ola ki te se-gata-mai.—Teu. 30:​19, 20; Kala. 6:​7, 8.

2. E pefea a lagonaga o Ieova ki tino fai agasala kolā e se sala‵mo? (1 Ioane 2:1)

² Kae e se faimālō ne Ieova a tino ke tavini atu ki a ia. E tuku ne ia te avanoaga ki tino taki tokotasi ke fai olotou fakaikuga ki te mea e ma‵nako latou ki ei. Kae pefea la māfai ko ofa ne se Kelisiano papatiso se tulafono a te Atua, kae fai ne ia se agasala matagā? Kafai e se salamō a ia, e ‵tau o tapale kea‵tea a ia mai te fakapotopotoga. (1 Koli. 5:13) Kae ui ei, e manako malosi a Ieova ke toe foki mai te tino agasala tenā ki a Ia. Tenā te pogai tonu ne fakatoka ei ne ia a te togiola—ke mafai o fakamagalo ne ia a tino kolā e sala‵mo tonu. (Faitau te 1 Ioane 2:1.) E fakamolemole mai te ‵tou Atua alofa ki tino fai mea ‵se, ke sala‵mo.—Saka. 1:3; Loma 2:4; Iako. 4:8.

3. Ne a mea ka sau‵tala tatou ki ei i te mataupu tenei?

³ E manako a Ieova ke maua ne tatou tena kilokiloga e uiga ki amioga ma‵sei mo tino e fai ne latou amioga konā. Ka fakamatala mai i te mataupu tenei a te auala ke fai penā. I te taimi e faitau koe ki te mataupu tenei, onoono ki (1) mea ne ‵tau o fai ne te fakapotopotoga i Kolinito i te senitenali muamua māfai ko fai ne se taina se agasala matagā, (2) fakatonuga ne tuku atu ne Paulo māfai ko salamō se tino fai agasala, mo te (3) mea e akoako mai i te tala tenei i te Tusi Tapu e uiga ki te kilokiloga a Ieova ki Kelisiano kolā e fai ne latou se agasala matagā.

MĀFAI KO FAI NE SE TAINA SE AGASALA MATAGĀ

4. Se a te fakalavelave ne sae aka i te fakapotopotoga i Kolinito i te senitenali muamua? (1 Kolinito 5:​1, 2)

⁴ Faitau te 1 Kolinito 5:​1, 2. I tena malaga fakamisionale i te tolu, ne logo a Paulo i se tala sē ‵lei mai te fakapotopotoga fou telā ne fatoa fakatu aka i Kolinito. Ne aofia se taina i te fakapotopotoga i faifaiga fakatauavaga sē ‵tau mo te avaga a tena tamana. Ne fakatakalialia a vaegā amioga penā kae “e se fai i fenua fakaa‵tea”! E se gata fua i te talia ne te fakapotopotoga a te faifaiga tenā, kae ne fakamata‵mata foki latou i ei. Kāti ne mafau‵fau a nisi tino me i te talia ne latou a faifaiga penā, e fakaasi atu i ei te lotou a‵lofa fakamagalo mo te loto malamalama e pelā mo te Atua. Kae e se talia eiloa ne Ieova ke fai ne ana tino a faifaiga ma‵sei penā. Mai te faiga o amioga mata‵fatu penā, e fakamasei i ei ne te tino a te ata ‵lei o te fakapotopotoga. E mafai foki o fakamalosi ne ia a nisi Kelisiano kolā e ‵kau fakatasi mo ia ke fai foki penā. Tela la, se a te mea ne fakatonu atu ne Paulo ke fai ne te fakapotopotoga?

5. Se a te mea ne fai atu ne Paulo ke fai ne te fakapotopotoga, kae se a te mea ne fakauiga a ia ki ei? (1 Kolinito 5:13) (Onoono foki ki te ata.)

⁵ Faitau te 1 Kolinito 5:13. Mai lalo i te takitakiga a te Atua, ne tusi atu a Paulo o fakatonu atu ke tapale kea‵tea te tino agasala sē salamō mai te fakapotopotoga. Ne ‵tau o pefea a faifaiga a Kelisiano fakamaoni ki a ia? Ne fai atu a Paulo ki a latou “ke fakagata te . . . ‵kau fakatasi” mo ia. Se a te mea e fakauiga a ia ki ei? Ne fai atu a Paulo me e aofia i te fakatonuga tenei a te manatu “ke mo a eiloa ma ‵kai fakatasi mo se vaegā tino penā.” (1 Koli. 5:11) A te saga‵saga o ‵kai fakatasi mo se tino, ka fai ei ke uke ou taimi e sau‵tala mo ia. Tela la, e manino ‵lei me ne fakauiga a Paulo me e se ‵tau eiloa o ‵kau fakatasi a tino o te fakapotopotoga mo te tagata tenā. Ka puipui ne te mea tenei a te fakapotopotoga mai i ana faifaiga ma‵sei. (1 Koli. 5:​5-7) E se gata i ei, a te sē ‵kau fakatasi mo te tagata tenā ka mafai o fai ei ke lavea ne ia tena ‵mao mai auala o Ieova, ko mā ei kae fakamalosi atu ei ke salamō a ia.

6. Ne aoga pefea te tusi a Paulo ki te fakapotopotoga mo te tino fai agasala?

⁶ I te otiga ne avatu tena tusi ki Kelisiano i Kolinito, ne fia iloa ne Paulo me ka ‵saga atu pefea te fakapotopotoga ki ei. Fakamuli loa, ne oko atu a Tito mo se tala fakafiafia. Ne talia ne te fakapotopotoga a te tusi a Paulo. (2 Koli. 7:​6, 7) Ne tau‵tali latou ki ana fakatonuga. E se gata i ei, i se fia masina mai tua ifo o te tusi a Paulo, ne salamō te tino fai agasala ki tena agasala ne fai! Ko oti ne ‵fuli ana amioga mo faifaiga kae ko kamata o ola e ‵tusa mo tulaga amio‵tonu o Ieova. (2 Koli. 7:​8-11) Se a te suā fakatonuga ka toe fai atu ne Paulo ki te fakapotopotoga i te taimi nei?

FAIFAIGA A TE FAKAPOTOPOTOGA KI TE TINO AGASALA SALAMŌ

7. Ne a mea aoga ne maua mai i te tapalega kea‵tea o te tino fai agasala mai te fakapotopotoga? (2 Kolinito 2:​5-8)

⁷ Faitau te 2 Kolinito 2:​5-8. Ne fai atu a Paulo me i “te polopolokiga ‵mafa tenei ne tuku atu ne te tokoukega o koutou [ne] lava eiloa mō se vaegā tagata penā.” I nisi tugapati, ko aoga a pati polopoloki kolā ne fai atu ki a ia. Se a tena aoga? Ne takitaki atu i ei a ia ke salamō.—Epe. 12:11.

8. Se a te suā mea ne fai atu ne Paulo ki te fakapotopotoga ke fai ne latou?

⁸ Tela la, ne fakatonu atu a Paulo ki te fakapotopotoga: “Fakamagalo kae fakamafanafana ne koutou” te taina ne agasala, kae “ke fakamautinoa atu a te otou a‵lofa ki a ia.” Ne seki manako fua a Paulo ke talia ne te fakapotopotoga te tagata tenā ke toe ‵kau fakatasi mo tino o Ieova. Ne manako a Paulo ke fakamautinoa atu ne latou ki te tagata salamō tenā e auala i olotou pati, uiga, mo faifaiga, me ko oti eiloa ne fakamagalo ne latou a ia kae a‵lofa foki ki a ia. Mai te fai penā, ko fakamaoni atu ei ne latou me ko talia ne latou a ia ke toe foki mai ki te fakapotopotoga.

9. Kaia e mafai ei o se fia‵fia a nisi tino o fakamagalo se tino fai agasala telā ko salamō?

⁹ E mata, e isi ne tino i te fakapotopotoga ne ita ma talia mai te tino fai agasala ke toe foki mai? E se fakaasi mai i te tala a te mea tenā, kae kāti e isi. E se gata i ei, ne uke a fakalavelave ne ‵tupu i te fakapotopotoga kātoa ona ko tena amioga tenā kae kāti ne fakamasiasi atu foki i ei ki nisi tino. Kāti ne mafau‵fau a nisi tino me e sē se mea ‵lei ke talia mai se tino telā ne fai ne ia se agasala matagā ke fai pelā me se taina, me i a latou ko ‵mate eiloa i te taumafaiga ke tumau i te ‵ma i mea tau amioga. (Fakatusa ki te Luka 15:​28-30.) Kaia e tāua ei ke fakaasi atu ne te fakapotopotoga a te alofa tonu ki te lotou taina telā ko toe foki mai?

10-11. Ne a mea e mafai o ‵tupu māfai e se talia ne toeaina i te fakapotopotoga ke fakamagalo se tino agasala telā ko salamō?

¹⁰ Fakaataata i tou mafaufau te mea e mafai o tupu māfai e se talia ne toeaina ke foki mai ki te fakapotopotoga a te tagata telā ko salamō tonu, io me kafai ko foki mai, kae e se a‵lofa te fakapotopotoga ki a ia. E mafai o loto vāivāi a ia “ona ko te lasi o te fanoanoa.” Ka faigofie fua ke maua ne ia lagonaga me e se mafai o toe tavini atu a ia ki a Ieova. Ka mafai foki o fai ei ke se fia saga a ia o faka‵lei tena fesokotakiga mo te Atua.

¹¹ Kafai e se fakamagalo ne taina mo tuagane i te fakapotopotoga a te tino salamō tenā, ka fai i ei ke tu atu a te lotou fesokotakiga mo Ieova i se tulaga fakamataku, telā ko sili atu i te masei. Kaia? Me e se fakaasi mai ne latou te uiga alofa fakamagalo o Ieova, kae ko te uiga masei kae sē alofa o Satani. Tenā ko fai ei latou pelā me ne mea faigaluega kolā e mafai o fakaaoga ne te Tiapolo ke fakamasei i ei te tagata tenā i te feitu faka-te-agaga.—2 Koli. 2:​10, 11; Efe. 4:27.

12. E mafai pefea o fakaakoako te fakapotopotoga ki a Ieova?

¹² E mafai la pefea o fakaakoako atu te fakapotopotoga i Kolinito ki a Ieova, kae e se ki a Satani? Mai te tau‵tali atu ki faifaiga a Ieova ki tino agasala kolā ko sala‵mo. Mafaufau ki pati a nisi tino ne tusi ne latou te Tusi Tapu e uiga ki a Ieova. A ia e “‵lei kae e toka o fakamagalo,” ko pati a Tavita. (Sala. 86:5) Ne tusi mai a Mika: “Ko oi te Atua e ‵pau mo koe, e fakamagalo a mea ‵se kae fakapuli atu a amioga solitulafono?” (Mika 7:18) Kae ne fai mai a Isaia: “Ke na tiaki ne te tagata masei ana auala kae ko te tagata matagā ko ana mafaufauga; fai ke foki a ia ki a Ieova, telā ka fakaasi atu ne ia te alofa fakamagalo ki a ia, ki te ‵tou Atua, me ka fakamagalo ne ia i se auala lasi.”—Isa. 55:7.

13. Kaia e ‵tau ei o toe fakafoki mai te tino agasala telā ko salamō ki te fakapotopotoga? (Onoono ki te pokisi “Anafea ne Toe Fakafoki Mai ei te Tagata i Kolinito ki te Fakapotopotoga?”)

¹³ Ke fakaakoako ki a Ieova, ne ‵tau o toe talia mai ne te fakapotopotoga i Kolinito a te tagata agasala telā ko salamō kae fakamaoni atu te lotou a‵lofa ki a ia. Mai te faka‵logo ki pati a Paulo ke toe talia mai te tino agasala telā ko salamō, ko fakaasi atu i ei ne te fakapotopotoga a te lotou “faka‵logo . . . i mea katoa.” (2 Koli. 2:9) E tonu, ko fia fua masina ne ‵seke atu talu mai te taimi ne tapale kea‵tea ei, kae ko polopolokiga ‵mafa ne fai ki a ia ne mafai o takitaki atu ei a ia ke salamō. Tela la, e seai se pogai e ‵tau o taofi ei a ia ke mo a ma toe foki mai ki te fakapotopotoga.

FAKAAKOAKO KI TE FAI MEA TONU MO TE ALOFA FAKAMAGALO O IEOVA

14-15. Ne a mea ne tauloto ne tatou mai te auala ne fakatoka ei te fakalavelave i Kolinito i aso mua? (2 Petelu 3:9) (Onoono foki ki te ata.)

¹⁴ A te tala e uiga ki te auala ne fakatoka ei te fakalavelave i Kolinito i aso mua, ne tusi kae fakamau ki lalo ko te mea “ke akoako ei tatou.” (Loma 15:4) Ne tauloto tatou mai te tala tenā, me e se talia ne Ieova a tino kolā e fai ne latou a agasala matagā ke tumau i loto i tena fakapotopotoga. E se talia ne ia te kilokiloga ke talia se tino fai agasala sē salamō ke tumau i te ‵kau fakatasi mo ana tino tapuaki fakamaoni e pelā me se fakaasiga o tena “alofa fakamagalo.” A Ieova e alofa fakamagalo, kae e se talia ne ia so se vaegā amioga; kae e se ‵fuli foki ne ia ana tulaga e uiga ki te mea tonu mo te mea ‵se. (Iuta 4) E tonu, a te fai penā e sē se faifaiga alofa me ka fai fua i ei ke tu te fakapotopotoga i se tulaga fakamataku.—Faata. 13:20; 1 Koli. 15:33.

¹⁵ Ne tauloto foki tatou, me e se manako a Ieova ke fakaseai atu se tino. E manako a ia ke fakasao so se tino. E alofa fakamagalo a ia ki tino kolā e ‵fuli olotou loto kae ma‵nako ke faka‵lei te lotou fesokotakiga mo ia. (Eseki. 33:11; faitau te 2 Petelu 3:9.) Tela la, i te taimi ne salamō te tagata Kolinito kae ‵fuli ana amioga, ne fakaaoga ne Ieova a Paulo ke fakamatala atu ki te fakapotopotoga me e ‵tau o fakamagalo kae toe talia mai ne latou te tagata tenā.

16. E pefea ou lagonaga ki te auala ne fakatoka i ei te fakalavelave i Kolinito?

¹⁶ A te sau‵talaga a tatou ki te auala ne fakatoka ei te fakalavelave i Kolinito, ne fesoasoani mai ke lavea ne tatou te alofa, te amiotonu, mo te fai mea tonu o Ieova. (Sala. 33:5) E a, e se fakamalosi aka ne te mea tenei ke fia tavae malosi atu koe ki te Atua? A tatou katoa ne tino agasala kae manakogina ne tatou tena alofa fakamagalo. E fakafetai faeloa tatou ki a Ieova mō te togiola, ke mafai ei o fakamagalo a ‵tou agasala. Ko oko loa i te fakamafanafana mai ke iloa atu me e alofa tonu a Ieova ki ana tino kae manako ke maua ne latou a toe mea ‵lei!

17. Ne a mea ka sau‵tala tatou ki ei i mataupu ki tua ifo?

¹⁷ Kae e fakatoka pefea a fakalavelave penā i fakapotopotoga i aso nei? E fakaasi atu pefea ne toeaina o fakapotopotoga a te manakoga o Ieova ke takitaki mai se tino fai agasala ke salamō? E ‵saga atu pefea te fakapotopotoga māfai ko fai te fakaikuga a toeaina ke tapale kea‵tea io me toe fakafoki mai se tino? Ka sau‵tala tatou ki fesili konei i mataupu ki tua ifo.