Mea e Mafai o Fai ke Tumau te Fai Au Sukesukega i Aso Katoa
E MATA, e faigata ki a koe ke fakatumau au sukesukega totino ki te Tusi Tapu i aso katoa kae ke fai pela me se mea fakafiafia? Kāti konā loa ‵tou lagonaga i nisi taimi. Kae mafaufau la ki nisi mea e fai ne tatou i aso katoa, e pelā mo te kou‵kou. E manakogina a taimi mo taumafaiga ke kou‵kou faka‵lei, kae kafai ko oti aka, ko fia‵fia ei tatou! E penā foki a sukesukega ki te Tusi Tapu, e fai eiloa e pelā me “faka‵ma” ei tatou “ki te vai e auala i te muna.” (Efe. 5:26) Mafau‵fau ki nisi manatu kolā e mafai o fesoasoani mai:
Fakatoka sau polokalame. A sukesukega totino ki te Tusi Tapu e aofia i “mea kolā e sili atu i te tāua” kolā e se ‵tau o manatu māmā ki ei se Kelisiano. (Fili. 1:10) Ke fesoasoani atu ke tautali koe i tau polokalame, kaia e se faka‵piki ei ne koe i se laupapa io me i te mataloa o te aisa ke laveagofie ne koe? Io me seti ke tagi tau telefoni mai mua malie o te taimi e fai ei.
Fai a fakama‵fuliga ke fetaui mo ou manakoga. E mata, e faigofie ke saga tonu koe o fai au sukesukega mō se taimi leva io me mō se taimi toetoe? E iloa ‵lei ne koe ou fakanofonofoga. Fakama‵fuli ou taimi sukesuke e ‵tusa mo ou manakoga. Kafai e se manako koe o fai au sukesukega i te taimi ne fakatoka ne koe, kaia e se ‵tofo aka o fai au sukesukega mō se sefulu minute fua? Mai te faiga o sukesukega i te taimi toetoe tenā, ka uke ‵ki eiloa a mea e tauloto ne koe i lō te sē sukesuke eiloa. Kae kafai ko oti ne kamata o ‵tofo koe ki ei, ka fakamalosi atu eiloa ki a koe ke tumau i te fai penā.—Fili. 2:13.
Filifili a mataupu mai mua o fai au sukesukega. Kafai e faka‵tali loa koe ki te taimi e fai ei au sukesukega, ko filifili ei se mataupu ke sukesuke ki ei, kāti ka se ‘fakaaoga eiloa ou taimi ki toe mea aoga.’ (Efe. 5:16) Kaia e se fakatoka ei se fakasologa o mataupu e manako koe o sukesuke ki ei? Kafai ko sae aka se fesili i te mafaufau, tusi ki lalo. I fakaotiga o sukesukega takitasi konā, kāti ka fakaopoopo ne koe a nisi manatu ki te fakasologa o mea kolā e fia sukesuke koe ki ei.
Ke fai a ‵fuliga māfai e manakogina. Taumafai ke fai a ‵fuliga ki tau polokalame māfai e manakogina, pelā mo te aofaki o taimi e fakamāumāu ne koe ke fai au sukesukega io me ko mataupu kolā e filifili ne koe. A te ‵toe mea tāua—e se ko te taimi, te leva, io me ko mea ke sukesuke ki ei—kae ke fai faeloa au sukesukega.
Kafai e fai faeloa ‵tou sukesukega i vaiaso katoa, ka ‵tupu eiloa a mea ‵gali. Ka fakapili‵pili malosi atu tatou ki a Ieova, tauloto ke iloa o fai a fakaikuga ‵poto, kae ka maua ne tatou se malosi fou.—Iosua 1:8.