Taina Talavou—Fakaakoako ki a Maleko mo Timoteo

1-2. Ne a mea faiga‵ta ne mafai o taofi aka ei a Maleko mo Timoteo ke mo a ma tavini katoatoa atu ki nisi tino?

TAINA talavou, e mata, e ma‵nako koutou o fai a mea e uke atu i te taviniga a Ieova kae ke fesoasoani malosi atu ki tino i te fakapotopotoga? E mautinoa eiloa me e ma‵nako koutou ki ei. E fia‵fia eiloa matou ke lavea atu te tokouke o taina talavou e loto fia‵fia o tavini atu ki nisi tino! (Sala. 110:3) Kae e isi ne mea e mafai o fakalavelave atu ki au taumafaiga ke fai a mea e tai uke atu. E mata, e fakatalave koe o fakalauefa atu tau taviniga ona ko te mataku me e se iloa ne koe te koga ka ave ne Ieova koe ki ei? E mata, kai fakatalave aka eiloa koe o talia se tofiga ona ko te sē lava o te loto talitonu ki a koe eiloa? Kafai e penā loa, e se ko koe fua e maua ne koe a lagonaga konā.

² Ne maua foki ne Maleko mo Timoteo a lagonaga tai ‵pau penā. Kae ne seki talia ne lāua te mataku ki mea e se iloa ne lāua io me ko te sē lava o te lā atamai ke taofi aka ei lāua mai te tavini atu ki nisi tino. I te taimi ne ‵kami ne te apositolo ko Paulo mo Panapa a Maleko ke olo mo lāua i te lā malaga fakamisionale muamua, kae ko Maleko e ‵nofo mo tena mātua i se fale gali. (Galu. 12:​12, 13, 25) Ne tiaki ne Maleko te koga gali tenā ko te mea ke fanatu o fakalauefa atu tena taviniga. Muamua la, ne fanatu a ia ki Anitioka. Oti aka, olo tasi ei mo Paulo mo Panapa ki nisi koga tai ‵mao. (Galu. 13:​1-5) E penā foki a Timoteo, ne ‵nofo mo ana mātua i te taimi ne ‵kami a ia ne Paulo ke olo mo ia i te galuega talai. Ne mafai fua o se talia ne Timoteo a te ‵kamiga tenā ona ko tena foliki mo te sē lava o tena atamai. (Fakatusa ki te 1 Kolinito 16:​10, 11 mo te 1 Timoteo 4:12.) Kae ne talia eiloa ne ia te ‵kamiga a Paulo kae ne maua ne ia a fakamanuiaga e uke mai i ei.—Galu. 16:​3-5.

3. (a) Ne fakaasi atu pefea ne Paulo te tāua o Maleko mo Timoteo ki a ia? (2 Timoteo 4:​6, 9, 11) (Onoono foki ki ata.) (e) Ne a fesili ka sau‵tala tatou ki ei i te mataupu tenei?

³ Ne tauloto a Maleko mo Timoteo ki te auala ke tausi atu ki tiute kese‵kese i te lā fakapotopotoga a koi talavou lāua. Ne tāua eiloa ki a Paulo a taina talavou konei, kae fakamuli ifo ne manako a ia ke ‵nofo atu lāua i ana tafa i te taimi ko iloa ne ia me ko pili a ia o mate. (Faitau te 2 Timoteo 4:​6, 9, 11.) Ne a uiga o Maleko mo Timoteo ne ‵gali ki a Paulo? E mafai pefea ne taina talavou o fakaakoako ki a lāua? Kae e mafai pefea o aoga ki taina talavou a pati fakatonutonu a Paulo e pelā me se tamana?

FAKAAKOAKO KI A MALEKO—KE LOTO FIAFIA O TAVINI ATU

4-5. Ne fakaasi atu pefea ne Maleko tena loto fiafia o tavini ki nisi tino?

⁴ E ‵tusa mo se fakamatalaga e tasi, a te tavini atu ki nisi tino e fakauiga ki te fesoasoani atu ki a latou “i te loto finafinau mo te kufaki.” Ne tuku mai ne Maleko se fakaakoakoga ‵lei i te feitu tenei. I te taimi ne seki talia ne Paulo ke puke tou tagata ke olo tasi latou i te lua o malaga fakamisionale, kāti ne logo‵mae kae fanoanoa a Maleko. (Galu. 15:​37, 38) Kae ne seki faka‵tuka ne te mea tenā a Maleko mai te tavini atu ki ana taina mo tuagane.

⁵ Ne talia ne Maleko se tofiga ke ga‵lue tasi mo tena fakataina ko Panapa. I se 11 tausaga mai tua ifo, ne aofia a Maleko i a latou kolā ne ‵lago ki a Paulo i te taimi muamua ne ‵pei a ia ki te falepuipui i Loma. (File. 23, 24) E tonu, ne loto fakafetai eiloa a Paulo ki te fesoasoani o tou tagata me ne fakamatala mai ne ia a Maleko e pelā me “se fakamafanafanaga lasi ‵ki ki a au.”—Ko. 4:​10, 11.

6. Ne aoga pefea ki a Maleko a tena fai taugasoa ki Kelisiano ma‵tua ‵lei? (Onoono ki te fakamatalaga mai lalo.)

⁶ Ne maua ne Maleko a mea aoga mai te fai taugasoa mo Kelisiano ma‵tua. Mai tua o se taimi ne ‵nofo fakatasi a ia mo Paulo i Loma, ne fanatu a Maleko ki Papelonia ke ga‵lue tasi mo te apositolo ko Petelu. Ne ati aka ne lāua se fesokotakiga ‵pili telā ne taku ei ne Petelu a ia ki a “Maleko, taku tama.” (1 Pe. 5:13) I te taimi ne ga‵lue fakatasi ei lāua, kāti ne fai atu ne Petelu ki tena taugasoa talavou tenā, a fakamatalaga ‵gali e uke e uiga ki te olaga mo te galuega talai a Iesu, telā ne fakamau fakamuli ne Maleko i tena tusi Evagelia.a

7. Ne fakaakoako pefea a te taina talavou ko Seung-Woo ki a Maleko? (Onoono foki ki te ata.)

⁷ Ne fakalavelave faeloa a Maleko i te tavini atu ki a Ieova kae ‵kau fakatasi mo taina ma‵tua ‵lei. E mafai pefea o fakaakoako koe ki a Maleko? Kafai e seki maua eiloa ne koe se tauliaga i te taviniga, ke kufaki kae tumau i te ‵sala atu ki nisi auala ke tavini ki a Ieova mo te fakapotopotoga. Mafaufau ki te fakaakoakoga a Seung-Woo, telā ko tavini nei e pelā me se toeaina. I te taimi koi talavou a ia, ne fakatusatusa ne ia a ia eiloa ki nisi taina talavou. Nisi taina ne mua o maua olotou tauliaga i a ia. Ne logo‵mae kae fanoanoa a Seung-Woo, kae fakamuli loa ne fakaasi atu ne ia ana lagonaga ki taina ma‵tua. Ne fai atu se toeaina ke fai fua te mea e mafai ne ia o fai ke tavini atu ki nisi tino faitalia foki loa me e se lavea ne nisi tino a mea ‵lei e fai ne ia. Ne fakamalosi aka ne te manatu fesoasoani tenā a Seung-Woo ke kamata o fesoasoani atu ki tino ma‵tua mo latou kolā e ma‵nako ki ne mea fakatele‵tele ke ave latou ki fakatasiga. Mai te mafaufau ki te taimi tenā, ne fai mai a ia: “Ne kamata au o malamalama i te uiga o te tavini katoatoa atu ki nisi tino. Ne fatoa lavea ne au te fiafia telā e maua mai te fesoasoani atu ki nisi tino.”

FAKAAKOAKO KI A TIMOTEO—FAKAASI TE ALOFA ATAFAI KI NISI TINO

8. Kaia ne filifili aka ne Paulo a Timoteo ke olo tasi mo ia? (Filipi 2:​19-22)

⁸ Ne manako a Paulo ki ne taina loto ma‵losi ke faima‵laga fakatasi mo ia i te taimi ne foki a ia ki fakai kolā ne fakasauagina ei a ia. Muamua la, ne filifili ne ia te Kelisiano apo ko Sila ke olo mo ia. (Galu. 15:​22, 40) Fakamuli ifo, ne fili foki ne ia a Timoteo ke olo fakatasi mo ia. Kaia ne manako ei a ia ki a Timoteo? Ona ko te ‵lei o te ata o Timoteo i te kautaina. (Galu. 16:​1, 2) Ne atafai tonu foki a ia ki tino.—Faitau te Filipi 2:​19-22.

9. Ne fakaasi atu pefea ne Timoteo a tena atafai tonu ki ana taina mo tuagane?

⁹ I te taimi ne kamata o ga‵lue tasi a ia mo Paulo, ne fakaasi mai ne Timoteo me ne atafai malosi atu a ia ki nisi tino i lō ki a ia eiloa. Ona ko te pogai tenā, ne loto talitonu a Paulo ke tuku tou tagata i Pelea ke fakamalosi ne ia a soko ‵fou i konā. (Galu. 17:​13, 14) I te taimi tenā, e mautinoa me ne uke ‵ki a mea aoga ne tauloto ne Timoteo mai i a Sila, telā ne nofo foki i Pelea. Kae fakamuli loa, ne uga atu ne Paulo a Timoteo ke fano tokotasi ki Tesalonia o fakamalosi aka a Kelisiano i konā. (1 Tesa. 3:​2, fml.) I se 15 tausaga fakamuli ifo, ne tauloto a Timoteo ke “‵tagi fakatasi mo latou kolā [ne] ‵tagi,” ke fakaasi atu me maua ne ia a lagonaga logo‵mae e pelā mo latou. (Loma 12:15; 2 Timo. 1:4) E mafai pefea o fakaakoako atu a taina talavou Kelisiano ki a Timoteo?

10. Ne mafai pefea o fakaasi atu ne te taina ko Woo Jae a te atafai tonu ki nisi tino?

¹⁰ Ne tauloto te taina ko Woo Jae ke iloa o fakaasi atu te atafai tonuki nisi tino. A koi foliki a ia, ne faigata ki a Woo Jae ke sau‵tala mo taina mo tuagane ma‵tua. Tela la, e fakatalofa atu fua a ia ki a latou i te Fale Tapuaki, ko sasale ei kea‵tea. Ne fai atu se toeaina ki a Woo Jae ke kamata a vaegā sau‵talaga penā mai te fai atu ki taina mo tuagane a olotou uiga kolā e ‵gali ki a ia. Ne fakamalosi atu foki te toeaina ke mafaufau a ia ki mea kāti e fiafia ki ei te suā tino. Ne fakagalue ne Woo Jae a te manatu fesoasoani tenei māfai ko sau‵tala mo nisi tino. E pelā me se toeaina i aso nei, e fai mai a Woo Jae: “Ko faigofie nei ki a au ke faipati ki tino mai tupulaga kese‵kese. Ko maua ne au se lagonaga ‵lei me ko malamalama au i mea e manava‵se ki ei a nisi tino. Ko oko eiloa i te aoga, me ko mafai o fesoasoani atu au ki oku taina tali‵tonu.”

11. E mafai pefea o tauloto a taina talavou ke iloa o ati aka te atafai tonu ki nisi tino i olotou fakapotopotoga? (Onoono foki ki te ata.)

¹¹ E mafai eiloa ne koutou, taina talavou o tauloto ke fakaasi atu te atafai tonu ki nisi tino. I taimi o fakatasiga, ke faipati atu ki tino taki tokotasi i tupulaga kese‵kese. Fesili atu me e a mai latou, kae fakalogologo faka‵lei. Fakamuli loa, ka mafai o iloa ne koe te auala ke fesoasoani atu ki a latou. Kāti ko iloa aka ne koe me ma‵nako se tauavaga ma‵tua ki se fesoasoani ki te auala ke fakaaoga te JW Library^®. Io me kāti e iloa ne koe me seai ne lā palani ke ga‵lue mo se tino i te galuega talai. E mata, e mafai o fesoasoani atu koe ki vaegā tino penā ke iloa o fakaaoga olotou tivaisi io me fakatoka ke ga‵lue tasi mo latou i te galuega talai? Mai te gasue muamua o fesoasoani atu ki nisi tino, ka fai eiloa koe e pelā me se fakaakoakoga ‵lei ki tino katoa.

MEA AOGA MAI PATI FAKATONUTONU A PAULO PELĀ ME SE TAMANA

12. E mafai pefea ne taina talavou o maua a mea aoga mai pati fakatonutonu a Paulo ki a Timoteo?

¹² Ne tuku atu ne Paulo ki a Timoteo a manatu fesoasoani aoga ke fesoasoani atu ke manuia tena olaga mo tena galuega talai. (1 Timo. 1:18; 2 Timo. 4:5) E mafai foki o maua ne koutou e taina talavou a mea aoga mai pati fakatonutonu a Paulo e pelā me se tamana. Pefea la? Faitau ki tusi e lua a Paulo ki a Timoteo, e pelā eiloa me ne tusi atu ki a koe, kae onoono ki te auala e fakagalue ne koe a pati polopoloki i ei ki tou olaga. Ke mafau‵fau nei ki nai fakaakoakoga.

13. Ne a mea e aofia i te atiakaga o se fesokotakiga ‵pili mo Ieova?

¹³ “Ke fakamasani koe ki mea e uiga ki te tapuaki fakamaoni ki te Atua.” (1 Timo. 4:7e) Se a te tapuaki fakamaoni ki te Atua? Ko tou fesokotakiga totino mo Ieova fakatasi mo te manakoga ke fai a mea kolā e fakafiafia ki a ia. Ona ko tatou e seki fa‵nau mai mo te uiga tenei, e ‵tau o ati aka ne tatou. Pefea la? A te pati Eleni telā ne ‵fuli ki te “fakamasani koe” ne fakaaoga sāle ke fakamatala mai ei a fakaakoakoga mo fakamalosilosiga e uke kolā e fai ne se tino tele ke toka a ia mō te fakatau‵faiga. E manakogina ne tino ‵tele konei a te loto pulea. E ‵tau foki o loto pulea tatou ko te mea ke ati aka a uiga kolā ka fai ei ke fakapili‵pili malosi tatou ki a Ieova.

14. Se a te ‵tou fakamoemoega māfai e fai‵tau ki te Tusi Tapu? Fakamatala mai.

¹⁴ I te taimi e ati aka ei ne koe te manakoga ke faitau ki te Tusi Tapu, ke masaua tou fakamoemoega ke fakapilipili malosi atu ki a Ieova. E pelā me se fakaakoakoga, ne a mea e mafai o tauloto ne koe mai te fetauiga a Iesu mo se tamataene maumea? (Male. 10:​17-22) Ne talitonu te tamataene tenā me i a Iesu ko te Mesia kae ne seki lava tena fakatuanaki ke tautali atu i a ia. E ui i ei, ne “alofa” a Iesu ki a ia. E mata, e se otia tou loto mai te auala ne faipati atu ei a Iesu ki te tamataene tenei? E manino ‵lei, me ne manako a Iesu ke fai ne tou tagata se fakaikuga poto. Ne fakaasi atu foki ne Iesu te alofa o Ieova mō te tamataene tenā. (Ioa. 14:9) I te taimi e mafaufau ei koe ki te tala tenei mo ou fakanofonofoga, fesili ifo penei, ‘Ne a mea e manakogina ke fai ne au ke fakapilipili malosi au ki a Ieova kae tavini katoatoa atu ki nisi tino?’

15. Kaia e tāua ei ke fai se taina talavou e pelā me se fakaakoakoga ‵lei ki nisi tino? Fakamatala mai. (1 Timoteo 4:​12, 13)

¹⁵ “Ke fai koe mo fakaakoakoga ki tino fakamaoni.” (Faitau te 1 Timoteo 4:​12, 13.) Ne fakamalosi atu a Paulo ki a Timoteo ke se taumafai fua ke atamai a ia i te faitau mo te akoako atu kae ke ati aka foki a uiga pelā mo te alofa, fakatuanaki mo te ‵ma. Kaia? Me e sili atu te tāua o te fakaakoakoga a te tino i lō ana pati. Mafaufau la me ne ‵tofi aka koe ke fai se lāuga ki te auala ke momea aka te ‵tou loto finafinau i te galuega talai. Ka faigofie eiloa ki a koe ke faipati e uiga ki te mataupu tenei māfai e fai ne koe te ‵toe mea e mafai i te galuega talai. Kae ka fakamalosi atu tau fakaakoakoga i te galuega talai ki au tino fakalogo‵logo.—1 Timo. 3:13.

16. (a) Ne a feitu e lima e mafai o fai a talavou Kelisiano e pelā me ne fakaakoakoga ‵lei? (e) E mafai pefea o fai se taina talavou e pelā me se fakaakoakoga ‵lei i te auala e “faipati” ei?

¹⁶ E pelā mo te mea e fakaasi mai i te 1 Timoteo 4:​12, ne fakasae aka ne Paulo a feitu e lima e mafai o fai ei se taina talavou e pelā me se fakaakoakoga ‵lei. Kaia e se mafaufau ‵loto ei koe ki feitu konā i taimi e fai ei au sukesukega totino? E pelā mo te mea tenei, kāti ka manako koe ke fai pelā me se fakaakoakoga ‵lei “i te faipati.” Mafaufau ki auala e mafai o fakamalosi ne koe nisi tino e auala i au pati. Kafai ko ‵nofo tasi koe mo ou mātua, e mata, e mafai o fakafetai atu koe ki a lāua ona ko mea ne fai ne lāua mō koe? Kafai e oti te fakatasiga, e a, e mafai o fai atu ne koe ki se taina io me se tuagane a mea ‵gali ne tauloto ne koe mai tena tofiga? Kāti e mafai foki o taumafai koe ke fai au tali i au pati totino i fakatasiga. Kafai e galue malosi koe ke fai pelā me se fakaakoakoga ‵lei i te auala e faipati ei koe, ka lavea ne nisi tino a tou gasolo ki mua i te feitu faka-te-agaga.—1 Timo. 4:15.

17. Se a te mea ka fesoasoani atu ki se taina talavou ke fakataunu ana fakamoemoega faka-te-agaga? (2 Timoteo 2:22)

¹⁷ “‵Tele kea‵tea mai manakoga masani o talavou, kae kausaki atu ki te amiotonu.” (Faitau te 2 Timoteo 2:22.) Ne fakamalosi atu a Paulo ki a Timoteo ke ‵teke atu ki manakoga kolā e mafai o fakalavelave atu ki ana fakamoemoega faka-te-agaga kae fakamasei ei tena fesokotakiga mo Ieova. Kae kāti ka lavea ne koe me i te fakamāumāu o taimi e uke ki fakafiafiaga, faitalia eiloa me e se ma‵sei a mea konā, e fai ei ke se uke au mea e fai mō Ieova. Mafaufau ki te uke ou taimi e fakamāumāu ki tafaoga, te onoono ki mea i luga i te neti, io me tafao i tafaoga vitio. E mata, e mafai o fakaaoga a taimi konā ki galuega a te fakapotopotoga? Kāti e mafai o fesoasoani atu koe ki te faka‵leiga o se Fale Tapuaki io me talai i kā talai. Kafai e aofia koe i galuega konā, ka mafai eiloa o maua ne koe a taugasoa ‵fou kolā ka fesoasoani atu ke kausaki atu ki ou fakamoemoega faka-te-agaga kae ke fakataunu.

A TE TAVINI KI NISI TINO E MAUA I EI A FAKAMANUIAGA

18. Kaia e fai atu ei tatou me ne maua ne Maleko mo Timoteo se olaga fakamalie loto?

¹⁸ Ne fai ne Maleko mo Timoteo a fakamafuli‵fuliga i lā olaga ke tavini katoatoa atu ki nisi tino, kae ne maua ne lāua se olaga fakamalie loto. (Galu. 20:35) Ke tavini atu ki ana taina tali‵tonu, ne fanatu a Maleko ki koga kese‵kese o te lalolagi. Ne tusi foki ne ia se tala fakafiafia e uiga ki te olaga o Iesu mo tena galuega talai. Ne fesoasoani atu a Timoteo ki a Paulo ke faka‵tu aka a fakapotopotoga kae fakamalosi a taina mo tuagane. E manino ‵lei me ne fiafia a Ieova ki te uiga loto fiafia o Maleko mo Timoteo ke tavini atu ki a ia.

19. Kaia e ‵tau ei o ‵saga tonu atu a taina talavou ki pati fakatonutonu a Paulo ki a Timoteo, kae ne a mea ka iku mai i ei?

¹⁹ Ne lavea faka‵lei atu a te alofa tonu o Paulo ki a Timoteo e auala i tusi ne tusi ne ia ki tena taugasoa talavou. E fakaasi mai foki i tusi fakaosofia konei me e alofa malosi a Ieova ki a koutou taina talavou. E manako a ia ke manuia koutou. Tela la, ke na fakagalue aka a pati fakatonutonu a Paulo e pelā me se tamana kae ke ati aka te otou manakoga ke tavini katoatoa atu ki nisi tino. Kafai e fai koutou penā, ka maua eiloa ne koutou se olaga gali i te taimi nei kae “puke ‵mau . . . ki te ola tonu” telā ko pili o oko mai.—1 Timo. 6:​18, 19.