Fakaakoako ki Agelu Fakamaoni

1-2. (a) E ‵kese pefea tatou mai i a agelu? (e) E tai ‵pau pefea tatou mo agelu?

I TE taimi ne ‵taki mai koe ne Ieova ki te munatonu, ne ‵kami ne ia koe ke aofia i se kāiga lasi kae a‵lofa o ana tino tapuaki kolā e aofia i ei a te fia miliona o agelu fakamaoni. (Tani. 7:​9, 10) Kafai e mafau‵fau tatou ki agelu, kāti e fakaataata ne tatou a latou e ‵kese mai i a tatou. E pelā me se fakaakoakoga, ko leva ne ola a agelu i se fia o tausaga a koi tuai o ola mai tatou. (Iopu 38:​4, 7) E ma‵losi fakafia atu a latou i a tatou. A latou e tapu kae amio‵tonu māfai e fakatusa ki a tatou tino sē ‵lei katoatoa.—Luka 9:26.

² Kae faitalia a kese‵kesega konei, e uke a mea e tai ‵pau ei tatou mo agelu. E pelā mo agelu, e mafai ne tatou o fakaakoako ki uiga o Ieova. E maua ne tatou te saolotoga ke fai ‵tou filifiliga e pelā mo agelu. A agelu e isi ne olotou igoa totino, olotou uiga mo tiute kese‵kese i te taviniga a Ieova, kae penā foki tatou. Kae e pelā mo agelu, e isi foki se manakoga i a tatou ke tapuaki ki te ‵tou Mafuaga.—1 Pe. 1:12.

3. Ne a mea e mafai o tauloto ne tatou mai agelu fakamaoni?

³ Ona ko te uke o mea e tai ‵pau ei tatou mo agelu, e mafai ne olotou fakaakoakoga ‵lei o fakamalosi kae akoako tatou ki akoakoga tāua. E tonu, e uke a akoakoga ‵lei e mafai o tauloto ne tatou mai i a latou. I te mataupu tenei, ka sau‵tala tatou ki auala e mafai o fakaakoako tatou ki te loto maulalo o agelu fakamaoni e penā foki mo te lotou a‵lofa ki tino, te lotou kufaki, mo olotou taumafaiga ke tumau te ‵ma o te fakapotopotoga.

A AGELU E LOTO MAULALO

4. (a) E fakaasi mai pefea ne agelu a te loto maulalo? (e) Kaia e loto maulalo i ei a agelu? (Salamo 89:7)

⁴ A agelu fakamaoni e loto maulalo. E tiga eiloa e ata‵mai latou, e ma‵losi kae ‵poto, e faka‵logo eiloa latou ki fakatonuga a Ieova. (Sala. 103:20) Kafai e fai ne latou a mea kolā e fakatonu atu ne Ieova, e se fakamata‵mata latou ki mea e mafai ne latou o fai io me ko te malosi tu ‵kese e maua ne latou. E fia‵fia latou o fai te loto o te Atua, faitalia me e se iloa ne nisi tino a olotou igoa.a (Kene. 32:​24, 29; 2 Tupu 19:35) E se talia ne latou so se tavaega telā e ‵tau o avatu fua ki a Ieova. Kaia e lasi ei te loto maulalo o agelu? Me e a‵lofa latou ki a Ieova kae e āva malosi ki a ia.—Faitau te Salamo 89:7.

5. Ne fakaasi atu pefea ne se agelu e tokotasi te loto maulalo i te taimi ne fakatonutonu aka ne ia te apositolo ko Ioane? (Onoono foki ki te ata.)

⁵ Mafaufau ki se tala telā e fakaasi mai i ei a te loto maulalo o agelu. Kāti i te 96 T.A., ne fakaasi atu ne se agelu telā e se taku mai tena igoa se fakaasiga fakaofoofogia ki te apositolo ko Ioane. (Faka. 1:1) Ne saga atu pefea a Ioane ki te fakaasiga tenā? Ne taumafai a ia o tapuaki atu ki te agelu. Kae ne taofi fakavave a ia ne te agelu tenā, kae fai atu: “Fakaeteete! Sa fai te mea tenā! Au se taina pologa fua o koe mo ou taina . . . Tapuaki ki te Atua!” (Faka. 19:10) Ko oko eiloa i te loto maulalo o te agelu tenā! Ne seki manako a ia ki ne tavaega. Ne saga fakavave atu a ia o fai ki a Ioane ke tapuaki ki a Ieova te Atua. I te taimi foki tenā, ne seki kilo fatauva atu te agelu ki a Ioane. E tiga eiloa ne tavini atu te agelu ki a Ieova mō se fia tausaga kae e malosi fakafia atu a ia ki a Ioane, ne loto maulalo a ia o fakasino atu ki te apositolo me i a ia se taina pologa fua o tou tagata. Kae tiga eiloa ne ‵tau o fakatonutonu aka ne te agelu a Ioane, ne seki kote ne ia a tou tagata io me fai fakamasei ne ia te apositolo matua tenā. I lō te fai penā, ne faipati atu a te agelu ki a ia mo te atafai. Kāti ne malamalama a ia me ne ifo atu fua a Ioane ki a ia ona ko te ofo i mea fakaofoofogia kolā ne lavea ne ia.

6. E mafai pefea o fakaakoako tatou ki te loto maulalo o agelu?

⁶ E mafai pefea o fakaakoako tatou ki te loto maulalo o agelu? E mafai foki o fai ‵tou tiute e aunoa mo te fakamata‵mata io me taumafai ke maua ne tatou a tavaega ona ko ‵tou mea e mafai o fai. (1 Koli. 4:7) E se gata i ei, e se ‵tau o mafau‵fau tatou me ‵lei fakafia atu tatou i lō nisi tino ona ko te leva o te taimi ne tavini tatou ki a Ieova io me maua ne tatou a tauliaga kolā e se maua ne latou. A te ‵tonuga loa, ko te uke o tiute e maua ne tatou, ko te lasi foki o te ‵kilo ifo o tatou ki a tatou eiloa e pelā me e se taulia. (Luka 9:48) E pelā mo agelu, e ma‵nako tatou o tavini atu ki nisi tino, i lō te fakatāua ne tatou a tatou eiloa.

7. E fakaasi atu pefea ne tatou a te loto maulalo māfai ko fakatonutonu io me polopoloki ne tatou se tino?

⁷ E mafai foki o fakaasi atu ne tatou te loto maulalo māfai e fakatonutonu io me polopoloki ne tatou se tino—se taina talitonu io me se tamaliki a tatou. I te taimi e polopoloki ei, kāti e ‵tau o faipati ‵tonu tatou. Kae pelā mo te agelu telā ne fakatonutonu aka ne ia a Ioane mo te atafai, e mafai o faipati ‵tonu tatou e aunoa mo te fakavāivāi atu ki te tino e polopoloki ne tatou. Kafai e mafau‵fau tatou me e ‵lei fakafia atu a nisi tino i a tatou, ka fesoasoani mai ke tuku atu ne tatou a polopolokiga mai te Tusi Tapu i se auala āva kae alofa.—Ko. 4:6.

A AGELU E A‵LOFA KI TINO

8. (a) E ‵tusa mo te Luka 15:​10, e fakaasi mai pefea ne agelu a te lotou a‵lofa ki tino? (e) Se a te tusaga o agelu i te galuega talai? (Onoono foki ki te ata.)

⁸ A agelu e ‵saga tonu mai kae e se ‵vae kea‵tea mai tino. E a‵lofa latou ki tino. E fia‵fia latou māfai se tino agasala ko salamō—māfai ko toe foki mai ki a Ieova se mamoe telā ne galo io me se tino ko ‵fuli ana auala kae talia te munatonu. (Faitau te Luka 15:10.) E aofia foki a agelu i te galuega talai o te Malo. (Faka. 14:6) E tiga eiloa e se talai ‵tonu atu latou ki tino, kae e mafai o ‵taki atu ne latou se tino talai ki se tino telā e fia tauloto e uiga ki a Ieova. E tonu, e se mafai o fai ‵tonu atu tatou me ne takitaki ne agelu tatou ki se tino. E fakaaoga ne Ieova a nisi auala, e pelā mo tena agaga tapu ke fesoasoani ki tino io me takitaki ana tavini. (Galu. 16:​6, 7) Kae koi fakaaoga eiloa ne ia ana agelu ke fesoasoani mai māfai ko talai tatou. Tela la, kafai ko fakasalalau atu ne tatou a te tala ‵lei, e tali‵tonu tatou me ka ‵lago mai eiloa a agelu ki a tatou.—Onoono ki te pokisi “Ne Tali a Olotou ‵Talo.”b

9. E mafai pefea o fakaakoako tatou ki te a‵lofa o agelu ki tino?

⁹ E mafai pefea o fakaakoako tatou ki te a‵lofa o agelu ki tino? Kafai ko lagona ne tatou se faka‵pulaga me ko toe foki mai se tino ki te fakapotopotoga, e fia‵fia tatou e pelā eiloa mo agelu. E mafai o olo atu tatou o fakatalofa ki ei ke fakamaoni atu me koi a‵lofa tatou ki a ia. (Luka 15:​4-7; 2 Koli. 2:​6-8) E mafai foki o fakaakoako tatou ki agelu mai te fai a mea e mafai ne tatou o fai i te galuega talai. (Fai. 11:6) Kae e pelā loa mo te fesoasoani o agelu ki a tatou i te taimi e talai atu ne tatou te tala ‵lei, e mafai o ‵sala atu tatou ki auala ke ‵lago atu ki ‵tou taina mo tuagane i te lotou galuega talai. E pelā me se fakaakoakoga, e mata, e mafai o palani tatou ke ga‵lue fakatasi mo se tino talai telā e se apo malosi? E mata, e ‵lago atu tatou ki taina mo tuagane ma‵tua io me fakamasaki‵saki ko te mea ke mafai o ‵kau atu latou ki te galuega talai?

10. Ne a mea e tauloto ne tatou mai te tala o Sara?

¹⁰ Kae e a māfai ko mu‵tana ‵tou mea e mafai o fai ona ko ‵tou fakanofonofoga? Koi mafai loa o ‵sala tatou ki auala ke ga‵lue fakatasi mo agelu i te galuega talai. Mafaufau ki te tala o Sara,c se tuagane i Initia. Mai tua o se 20 tausaga ne paenia ei, ne masaki a Sara kae ne moe fua a ia i te moega. Ne loto mafatia malosi tou fafine. Kae fakamuli loa, ne maua ne ia se kilokiloga ‵lei, mai te faitau i aso katoa ki te Tusi Tapu, fakatasi mo te fesoasoani alofa mai tena kāiga faka-te-agaga. E tonu, ne ‵tau o fakamafuli te faiga o tena galuega talai ki tena fakanofonofoga fou. Ona ko te mea e se mafai ne ia o sagasaga faka‵lei ke tusi ana tusi, ne talai fua a ia i te telefoni. Tela la, ne telefoni atu tou fafine ki ana toe asiga, kae ne fakasino atu foki ne latou ki a ia a nisi tino kolā e fia‵fia. Se a te ikuga? I loto i nāi masina, ne maua ne Sara a akoga faka-te-Tusi Tapu e 70—ko silia atu i te mea e mafai ne ia o fai! Tenā ne tuku atu ne ia a nisi akoga ki tino i te fakapotopotoga. Te tokoukega o ana tino a‵koga ko ‵kau mai ki ‵tou fakatasiga. Ko oko eiloa te fia‵fia o agelu ke ga‵lue fakatasi mo taina mo tuagane, e pelā mo Sara, kolā e fai ne latou te ‵toe mea e mafai o fai i te galuega talai!

E FAKAASI MAI NE AGELU A TE KUFAKI

11. Ne fakaasi atu pefea ne agelu fakamaoni a te kufaki tu ‵kese?

¹¹ E tu ‵kese eiloa a te fakaakoakoga ‵lei o te kufaki o agelu fakamaoni. Ne kufaki latou i faifaiga sē fakamaoni mo amioga ma‵sei mō se fia afe tausaga. Ne lavea ne latou a Satani mo nisi tino faka-te-agaga, kolā ne tavini fakatasi muamua mo latou, ko ‵teke atu ki a Ieova. (Kene. 3:1; 6:​1, 2; Iuta 6) E fakaasi mai i te Tusi Tapu se tokotasi o agelu fakamaoni telā ne fakafesagai atu ki ‵tekemaiga mai se temoni malosi. (Tani. 10:13) E se gata i ei, i tala fakasolopito o tino, e lavea ne agelu se aofaki foliki fua o tino kolā e ‵sala atu ki te tapuakiga tonu. Faitalia a mea katoa konā, e tumau eiloa a agelu fakamaoni konei i te tavini atu ki a Ieova mo te fia‵fia mo te loto finafinau. E iloa ne latou me i te taimi tonu, ka tapale kea‵tea ne te Atua a faifaiga sē fakamaoni katoa.

12. Ka fesoasoani mai pefea a Ieova ke kufaki tatou?

¹² E mafai pefea o fakaakoako tatou ki te kufaki o agelu? E pela mo agelu, kāti e molimau ne tatou a faifaiga sē fakamaoni mo ‵tekemaiga. Kae e pelā mo latou, e tali‵tonu foki tatou me ka fakaseai ne te Atua a amioga ma‵sei katoa i tena taimi tonu. Tela la, e pelā mo agelu fakamaoni, ke se “‵fiu vave tatou o fai a mea ‵lei.” (Kala. 6:9) Kae tauto mai te Atua me ka fesoasoani mai a ia ke kufaki tatou. (1 Koli. 10:13) E mafai o ‵talo tatou ki a Ieova mō tena agaga tapu, telā e maua mai i ei a te kufaki mo te fiafia. (Kala. 5:22; Ko. 1:11) Kae e a māfai e fepaki koe mo ‵tekemaiga? Talitonu katoatoa ki a Ieova, kae sa manavase. Ka ‵lago mai faeloa a Ieova kae fakamalosi ne ia koe.—Epe. 13:6.

E FESOASOANI A AGELU O FAKATUMAU TE ‵MA O TE FAKAPOTOPOTOGA

13. Se a te galuega fakapito e fai ne agelu i aso fakaoti konei? (Mataio 13:​47-49)

¹³ I aso fakaoti konei, ne tuku atu ne Ieova ki agelu se galuega fakapito. (Faitau te Mataio 13:​47-49.) E lau i miliona o tino e fia‵fia ki te galuega talai. Nisi o latou ko gasue‵sue ke fai latou pelā me ne Kelisiano ‵tonu, kae e se ko nisi tino. Ko oti ne ‵tofi aka a agelu ke “‵vae kea‵tea ne latou a tino amio ma‵sei mai tino amio‵tonu.” Ko tena uiga, ko oti ne ‵tofi latou ke fesoasoani o puipui a te fakapotopotoga ke ‵ma. E se fakauiga i ei me i a latou katoa kolā e fakagata te lotou ‵kau fakatasi mo tatou e se mafai o toe ‵foki mai; io me ko tena uiga ka se toe ai ne fakalavelave i te fakapotopotoga. Kae e mafai o mautinoa i a tatou me e ga‵lue malosi a agelu o fai ke tumau te ‵ma o ‵tou fakapotopotoga.

14-15. E mafai pefea o fakaakoako tatou ki te ‵saga tonu atu o agelu ki te ‵ma o te fakapotopotoga i mea tau amioga mo te feitu faka-te-agaga? (Onoono foki ki ata.)

¹⁴ E mafai pefea o fakaakoako tatou ki te ‵saga tonu o agelu o puipui te ‵ma o te fakapotopotoga? Mai te fai o ‵tou tusaga ke fakatumau te ‵ma o te fakapotopotoga i mea tau amioga mo te feitu faka-te-agaga. Ke fai te mea tena, e taumafai tatou o puipui a ‵tou loto mai te filifili o taugasoa ‵lei kae ‵teke atu so se fakamalosiga telā e mafai o fakamasei ei tatou. (Sala. 101:3) E mafai foki o fesoasoani atu tatou ki ‵tou taina tapuaki ke tumau i te fakamaoni ki a Ieova. E pela me se fakaakoakoga, ne a ‵tou mea e ‵tau o fai māfai e iloa aka ne tatou me ne fai ne se taina talitonu se agasala matagā? Ona ko te a‵lofa ki te tino tenā, ka fakamalosi atu tatou ke faipati atu a ia ki toeaina. Kafai e se fai ne ia, ka fakailoa atu ne tatou te fakalavelave tenā ki toeaina. E ma‵nako eiloa tatou ke maua fakavave ne se taina talitonu telā ko vāivāi faka-te-agaga a te fesoasoani!—Iako. 5:​14, 15.

¹⁵ Se mea fakafanoanoa, me i nisi tino kolā ne fai ne latou a agasala matagā ko oti ne tapale kea‵tea mai te fakapotopotoga. I vaegā tulaga penā, e ‘fakagata ne tatou a te ‵kau fakatasi’ mo latou.d (1 Koli. 5:​9-13) E fesoasoani atu te fakatokaga tenei ke fakatumau te ‵ma o te fakapotopotoga. E se gata i ei, kafai e filifili tatou ke se ‵kau fakatasi mo tino kolā ne tapale kea‵tea, ko fakaasi ‵tonu atu ne tatou a te alofa ki a latou. A te ‵tu ‵mautakitaki i ‵tou fakaikuga tenā e mafai o fakamalosi atu ki a latou ke toe mafaufau faka‵lei. Kafai e fai latou penā, ka fia‵fia eiloa tatou fakatasi mo Ieova mo ana agelu.—Luka 15:7.

16. I auala fea ka taumafai ei tatou o fakaakoako ki agelu?

¹⁶ Se tauliaga eiloa ke lavea ne tatou a te koga e ‵nofo i ei a tino faka-te-agaga ki ‵tou mata o te fakatuanaki kae ga‵lue fakatasi mo agelu! Ke na fakaakoako tatou ki olotou uiga ‵lei: te lotou loto maulalo, te lotou a‵lofa ki tino, te lotou kufaki, mo te lotou ‵saga tonu atu ki te ‵ma o te fakapotopotoga i mea tau amioga mo te feitu faka-te-agaga. Kafai e fakaakoako tatou ki agelu fakamaoni, ka fai foki tatou mo vaega o te kaukāiga o tino tapuaki o Ieova ki te se-gata-mai.